كوشە جانە قوعامدىق ورىنداردا جاسالعان قىلمىستاردىڭ سەبەبى نەدە؟ جانە دە قارىزى بارلاردى ىزدەستىرۋ جونىندەگى جۇمىستىڭ تيىمدىلىگى قانداي؟ وسى ماسەلەلەردى تالقىلاۋ ماقساتىندا ەلوردانىڭ «ەسىل» اۋداندىق پروكۋراتۋراسى كەشە اكىمدىكپەن جانە جەرگىلىكتى پوليتسيامەن ۆەدومستۆوارالىق كەڭەس وتكىزدى.
وتىرىستا كوشە قىلمىسى قوعامعا تىكەلەي اسەر ەتەتىندىكتەن, وعان بەيجاي قاراۋعا بولمايتىندىعى ەرەكشە اتالدى. ويتكەنى كوشەلەر مەن قوعامدىق ورىندارداعى قۇقىق بۇزۋشىلىقتار 142 جانە 168 پايىزعا ارتقان. سارالاۋ ناتيجەسى كورسەتكەندەي, ىشكى ىستەر ورگاندارى تاراپىنان قىلمىستىڭ الدىن الۋعا قاتىستى جۇمىستاردى ءتيىمدى ءارى ۇتىمدى جۇرگىزۋ جايى جولعا قويىلماعان. سونىڭ سالدارىنان كوڭىل كوتەرۋ جانە ساۋدا ورىندارىندا جازعى مەزگىلدە قىلمىستىڭ سانى وسە تۇسكەن. اسىرەسە جاستار مەن مەكتەپ وقۋشىلارى بۇل كەزدە ءوز ۋاقىتتارىن كوبىنەسە كوشەدە وتكىزەتىنى بەلگىلى. سوندىقتان كۇندىز ازاماتتاردىڭ جەكە م ۇلىكتەرىن: ۇيالى تەلەفون, سومكەلەرىن, ۆەلوسيپەدتەرىن, پلانشەتتەرىن جانە وزگەلەرىن ۇرلاۋ, سونداي-اق توناۋ فاكتىلەرى كوپتەپ ورىن الۋدا. ال كەش باتقاندا بۇزاقىلىق, توبەلەس جانە وزگە دە تىنىشتىقتى كەتىرگەن جايتتار ورىن الادى ەكەن. كوشەدەگى جانە قوعامدىق ورىندارداعى قىلمىستىق ارەكەتتەردىڭ 38 پايىزى كەشكى 17-22 ساعات ارالىعىندا ورىن السا, 34 پايىزى تۇنگى 00-دەن تاڭعى ساعات 5-9 ارالىعىندا, ال 16 پايىزى تاڭعى 6-11 ساعات ارالىعىندا جاسالادى.
سونداي-اق, كەڭەستە ەلوردانىڭ بىرقاتار كوڭىل كوتەرۋ ورىندارىندا ورىن العان بۇزاقىلىقتار دا اتالماي قالمادى. مىسالى, «لابيرينت» كافەسىندە 21 بۇزاقىلىق تىركەلسە, «يزيۋم» كافەسىنە قاتىستى 17 فاكتى اتالدى. كۇن سايىن قالا كوشەلەرىندە 24 پاترۋلدىك توپ كەزەكشىلىك جاساسا, 8 ستاتسيونارلىق پوليتسيا پۋنكتى جۇمىس ىستەيدى. الايدا ولاردىڭ اتقارعان بۇل جۇمىسىنان ازىرگە ناتيجە تومەن. ولاي بولسا قابانباي باتىر مەن قورعالجىن تاسجولى بويىنداعى قىلمىستىق ارەكەتتەردىڭ تىيىلار ءتۇرى جوق. سول سياقتى يلينكا كەنتىندە دە قىلمىس ءورشىپ تۇر. بۇل ەلدى مەكەندە قۇقىق بۇزۋشىلىق نەگىزىنەن كۇندىزگى ۋاقىتتا جاسالاتىن بولسا, اۆتوپاترۋل پوليتسياسى تەك كەشكى 19-دان كەيىن عانا جۇمىسىنا كىرىسەدى ەكەن. سونداي-اق, ەلوردانىڭ مارتەبەسىنە سايكەس سىرتتان كەلۋشىلەردى, بۇرىن سوتتالعانداردى, ارنايى ەسەپتە تۇراتىنداردى انىقتاۋ ۇلكەن ماڭىزعا يە. وسى تۇرعىدان كەلگەندە جەرگىلىكتى پوليتسيا ءوز پاتەرلەرىن جالعا بەرەتىن كاسىپكەرلەرمەن جۇمىستى جولعا قويماعان. اۋداندا قوعامدىق ورىنداردا ورىن العان بارلىق قىلمىستىق ارەكەتتەردىڭ تەك 15 پايىزى عانا اشىلادى ەكەن. كەيبىر قىلمىستىق ىستەردى تەكسەرۋ بارىسى كورسەتكەندەي, تەرگەۋ ورگاندارى جەدەل قىزمەتتەرمەن بىرلەسىپ, ىسكە ايعاقتاردى تىركەمەيتىنى بەلگىلى بولدى. تارقاتىپ ايتقاندا, بەينە باقىلاۋ كامەرالارى ارقىلى جازىلىپ الىنعان جازبالاردى تالاپ ەتۋ, سول ارقىلى كىنالى ادامداردى انىقتاۋ جولعا قويىلماعان. سوتقا دەيىنگى تەرگەۋدىڭ دۇرىس ۇيىمداستىرىلماۋىنان قىلمىس جاساعان ادام جاۋاپكەرشىلىكتەن سىتىلىپ كەتىپ جاتادى. قوعامدىق ورىنداردا جاسالعان 1177 قىلمىستىق ارەكەتتىڭ 74-ءى بويىنشا كۇدىكتىلەر ۇستالعان. وندا دا ولار كۇزەت قىزمەتكەرلەرىنىڭ نەمەسە جاپا شەگۋشىلەردىڭ ءوز كۇشىمەن قولعا ءتۇسىپ وتىر. قىلمىستىق ءىستىڭ تەك 69 پايىزى عانا سوتقا جولدانعان نەمەسە جابىلعان. ال قالعان قىلمىستىق ءىس-ارەكەتتىڭ 31 پايىزىندا كىنالى جاندار ءالى كۇنگە جاۋاپقا تارتىلماي كەلەدى. بۇل ءوز كەزەگىندە تۇرعىندار اراسىندا قۇقىقتىق نيگيليزمدى تۋدىرىپ, قىلمىسكەرلەردىڭ جاۋاپقا تارتىلماۋىنان قوعامداعى نەمقۇرايدىلىققا سوقتىرادى دەيدى پروكۋرورلار.
اسقار تۇراپباي ۇلى,
«ەگەمەن قازاقستان»