الماتىدا كەشە بولعان جاعدايعا بايلانىستى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين ءوز پىكىرىمەن ءبولىستى. ول قىلمىستىق توپتارمەن, سونداي-اق, ەكسترەميزم مەن تەرروريزمگە قارسى كۇرەستە قوعام بولىپ بەلسەندى قولداۋ كورسەتۋ ەداۋىر كۇش بولا الاتىندىعىن ايتادى.
– ارينە, تەرروريزمگە قارسى كۇرەستە الدىڭعى شەپتە ەلىمىزدىڭ كۇشتىك قۇرىلىمدارى تەمىردەي ءتارتىپ ورناتىپ, تاباندى قارسىلىق كورسەتە الاتىندىعى بەلگىلى. دەسەك تە, وسى ورايدا وعان قوسىمشا كومەك رەتىندە قوعام تاراپىنان بەلسەندى قولداۋ كورسەتىلگەنى قاجەت. ماسەلەن, Facebook نەمەسە WhatsApp سىندى الەۋمەتتىك جەلىلەردە ءارتۇرلى اقپاراتتار شاپشاڭ تارايتىندىعىن ەسكەرسەك, وسى الەۋەتتىڭ ءوزىن بيلىك مۇمكىندىگىنشە ءوز پايداسىنا قولدانعانى ماقۇل. رەسمي تۇردە بەكىتىلىپ, راستالعان مالىمەتتى تاراتۋدى ايتپاعان كۇننىڭ وزىندە, بۇل جەلىلەردىڭ الەۋەتى كۇشتىك قۇرىلىمداردىڭ كومەكشى قۇرالى بولا الاتىندىعى ءسوزسىز. ياعني, قوعام تىنىشتىعىن بۇزىپ جۇرگەن بۇزاقىعا قاتىستى باعىت-باعدارلار مەن قانداي دا ءبىر اقپاراتتاردى الۋ ارقىلى كۇدىكتىنى قولعا تۇسىرۋگە ابدەن بولادى.
ال ەندى تەرىس اعىمنىڭ جەتەگىندە كەتكەن راديكالداردىڭ نە سەبەپتى كۇشتىك قۇرىلىمدارعا اتا جاۋىنداي وشتەسۋ سەبەبىن تۇسىندىرۋگە تىرىسىپ كورەيىن. ولار كوپ رەتتە وزدەرىنىڭ ارام ويلارىن جۇزەگە اسىرۋ ءۇشىن قارۋ الىپ, قوعام تىنىشتىعىن بۇزۋ ارقىلى ەلدى ۇرەيدە ۇستاعىسى كەلەدى. ونداي نيەتىن ىسكە اسىرۋى ءۇشىن ازعىنعا كەرەك قارۋ كۇشتىك قۇرىلىم مەن پوليتسەيلەردىڭ قولىندا جۇرەتىنى بەلگىلى. مىنە, ولاردىڭ قۇقىق قورعاۋ ورگاندارىنىڭ وكىلدەرىنە شۇيلىككىش كەلەتىنىنىڭ سەبەبى وسى. ەندەشە, «قانىپەزەردىڭ قولىنا قارۋ تۇسكەن سوڭ, ولار تەك ەل بيلىگىنە عانا قاۋىپ توندىرەدى, قاراپايىم ازاماتتارعا تيىسپەيدى» دەگەن ۇعىم اقىلعا قونىمسىز. سوندىقتان دا, مۇنداي ارەكەت قاشان دا قوعام ءۇشىن وتە قاۋىپتى.
جالپى, قازىر مەملەكەت قوعام قاۋىپسىزدىگىن باستى نازارعا الىپ, ازاماتتاردىڭ اماندىعىن ساقتاۋدا سان ءتۇرلى شارالاردى قولعا الىپ جاتىر. قاي ەلدە بولسا دا بيلىكتىڭ وسىنداي ارەكەتكە باراتىنى ءسوزسىز. الماتى قالاسىندا قاۋىپسىزدىكتى قامتاماسىز ەتۋدىڭ قىزىل دەڭگەيى ەنگىزىلۋىنەن-اق جاعدايدىڭ الاڭداتارلىقتاي ەكەندىگىن ارقايسىمىز تۇسىنىستىكپەن قابىلداۋىمىز قاجەت. ونىڭ بىردەن-ءبىر بەلگىسى – تۇرعىندار ءاربىر ەسكەرتۋگە قۇلاق اسىپ, بەيبەرەكەت ءجۇرىستى دوعارىپ, ءۇي-جايلارىنان شىقپاي, ارنايى قۇرىلىمداردىڭ رەسمي مالىمەتتەرىن عانا باسشىلىققا الۋى كەرەك.
مەن اقتوبەدە بولعان لاڭكەستىك وقيعاعا قاتىستى بىلدىرگەن پىكىرىمدە ەكسترەميزم مەن تەرروريزم قاتەرىنىڭ ۇزاقمەرزىمدى ترەند ەكەنىن ايتقان بولاتىنمىن. قازىر سونى تاعى ءبىر ەسكە تۇسىرۋىمە تۋرا كەلىپ تۇر. ويتكەنى, ەندىگى جەردە ءبىزدىڭ قوعام مەن مەملەكەتىمىز ۇزاققا سوزىلاتىن كۇرەسكە دايىندالۋى ءتيىس. ونىڭ ۇستىنە مۇنداي قاتەرمەن ءبىز عانا بەتپە-بەت كەلىپ وتىرعان جوقپىز. سوڭعى كۇندەردەگى فرانتسيا مەن تۇركياداعى جاعدايلار الەم نازارىن وزىنە اۋدارىپ, دۇنيەنى ۇرەي قۇشاعىندا قالدىردى», – دەدى ە.قارين.