كەشە مەملەكەت باسشىسى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ شۇعىل وتىرىسى ءوتتى, دەپ حابارلادى پرەزيدەنتتىڭ ءباسپاسوز قىزمەتى.
وتىرىس بارىسىندا ىشكى ىستەر ءمينيسترى ق.قاسىموۆتىڭ, ۇلتتىق قاۋىپسىزدىك كوميتەتىنىڭ توراعاسى ۆ.جۇماقانوۆتىڭ, سونداي-اق, قاۋىپسىزدىك كەڭەسىنىڭ باسقا دا مۇشەلەرىنىڭ الماتى قالاسىنداعى وقيعالارعا قاتىستى باياندامالارى تىڭدالدى.
قازاقستان پرەزيدەنتى قازا بولعاندار مەن زارداپ شەككەندەردىڭ وتباسىلارىنا كوڭىل ايتتى جانە ولارعا مەملەكەتتىك ورگانداردىڭ بارلىق قاجەتتى كومەكتى كورسەتۋىن تاپسىردى.
– مەن قازا تاپقان پوليتسەيلەردىڭ وتباسىلارىنا كوڭىل ايتا وتىرىپ, ولارعا كومەك بەرۋ ءۇشىن ءتيىستى جەرگىلىكتى ورگاندارعا زاڭ اياسىندا بارلىق شارانى قولعا الۋدى تاپسىرامىن. الدا قانداي ءىس-ارەكەتتى قولعا الاتىنىمىزدى جوسپارلاۋ ءۇشىن ماعان وقيعا بارىسىن بايانداپ بەرسەڭىزدەر دەيمىن. ىشكى ىستەر ءمينيسترى قالمۇحانبەت قاسىموۆ پەن ۇلتتىق قاۋىپسىزدىك كوميتەتىنىڭ توراعاسىن تىڭداعىم كەلىپ وتىر, – دەدى نۇرسۇلتان نازارباەۆ.
جيىن بارىسىندا ىشكى ىستەر ءمينيسترى قالمۇحانبەت قاسىموۆ پرەزيدەنتكە الماتى وقيعاسىنىڭ تولىق حرونولوگياسىن ءمالىم ەتتى.
«بۇگىن تاڭەرتەڭگى ساعات 10:54-تە بەلگىسىز بىرەۋ الماتى اۋداندىق ىشكى ىستەر بولىمىنە كەلگەن. پوستىدا وتىرعان پوليتسيا قىزمەتكەرى ونىڭ قۇجاتىن سۇراعاندا, قىلمىسكەر تاپانشاسىن الىپ شىعىپ, وعان ەكى رەت وق اتقان. پوليتسيا قىزمەتكەرىن جارالاعان سوڭ قىلمىسكەر ونىڭ قارۋىن الىپ, كەزەكشى بولىمگە قاراي بىرنەشە رەت وق اتقان. اۋداندىق ىشكى ءىستەر ءبولىمىنىڭ اۋلاسىندا تۇرعان ادامدارعا قاراي تاعى بىرنەشە رەت قارۋ جۇمساعان. سول جەردە ءتورت پوليتسيا قىزمەتكەرى مەن ءبىر قاراپايىم ادام جاراقات الدى. بۇل جاراقات العان ادام ءبىزدىڭ بۇرىنعى قىزمەتكەرىمىز, قازىر زەينەتتە جۇرگەن ادام ەدى. وسىدان كەيىن قىلمىسكەر كوشەگە جۇگىرىپ شىعىپ, كولىك توقتاتادى دا, كولىككە وتىرىپ كەتەدى.
قىلمىسكەر سودان سوڭ شاقىرۋ بويىنشا كەلە جاتقان پاترۋلدىك پوليتسياعا وق اتقان جانە ۇلتتىق قاۋىپسىزدىك كوميتەتى دەپارتامەنتىنىڭ عيماراتىنا كەلىپ, تاعى ءبىر پاترۋلدىك كولىككە وق جاۋدىرعان. وسىلايشا, تاعى ەكى قىزمەتكەرىمىزدى جارالادى. ارتىنشا, ول وقيعا ورنىنان قاشىپ, تاعى ءبىر اۆتوكولىكتى توقتاتقان. وندا شەكارا قىزمەتىنىڭ اعا لەيتەنانتى وتىرعان. قىلمىسكەر كولىكپەن اباي اتىنداعى كوشەگە دەيىن جەتىپ قالماقشى بولعان. الايدا, شەكارا قىزمەتىنىڭ وكىلى قارسىلىق تانىتقان. ول ءۇشىنشى مەكەنجايعا بارعان شاعىندا ءبىزدىڭ قىزمەتكەرلەرمەن اتىسقان. ءبىر قىزمەتكەرىمىز قازا تاپتى, ەكىنشى قىزمەتكەرىمىز قىلمىسكەردى جارالاپ, ونىڭ قولىنا كىسەن سالدى. بارلىق قارۋ تاركىلەندى.
ءبىزدىڭ قىزمەتكەرلەرگە وق اتقان تاپانشانى الماتى اۋداندىق ىشكى ىستەر ءبولىمىنىڭ جانىنان تاپتىق. وتكەن تۇندە, ساعات 03:52-دە بۇل ادام ءبىر ايەلدى ءولتىرگەن. كۋاگەرلەردىڭ ايتۋىنشا, قىلمىسكەر تۇندە جەڭىل ءجۇرىستى ايەلدەرمەن سوزگە كەلگەن, ءبىر ايەل وزبەكستان ەلىنىڭ ازاماتشاسى ەكەن. ول ايەل وتىرعان كولىككە كەلىپ, تاكسي جۇرگىزۋشىسىنەن كولىكتىڭ جارىعىن قوسۋدى سۇرايدى, تاكسيست ايتقانىن ورىنداماعان سوڭ ول بۇگىن قىلمىس جاساعان قارۋمەن اتقان. ءسويتىپ, كولىكتى ايداپ اكەتكەن. ول كولىكتى ءبىز قازا بولعان ايەلدىڭ دەنەسىمەن بىرگە تاپتىق», – دەدى ق.قاسىموۆ.
ودان ءارى قاۋىپسىزدىك كەڭەسىنىڭ وتىرىسىندا ۇقك باسشىسى ۆلاديمير جۇماقانوۆ الماتىدا پوليتسەيلەرگە وق جاۋدىرعان قىلمىسكەر تۋرالى ايتىپ بەردى.
«كۋلەكباەۆ رۋسلان الپىسباي ۇلى, 1990 جىلى 11 ماۋسىمدا تۋعان, قىزىلوردا وبلىسىنىڭ تۋماسى, بۇنىڭ الدىندا بايقوڭىر قالاسىندا تۇرعان. ءۇيلەنگەن. سوڭعى كەزدەرى الماتى وبلىسى ىلە اۋدانى ىنتىماق اۋىلىندا تۇرىپ كەلگەن, ۇيالى تەلەفون ساتۋمەن اينالىسقان. 2010 جىلى 27 تامىزدا شىمكەنت قالاسى ەڭبەكشى اۋداندىق سوتىندا قىلمىستىق كودەكستىڭ 178-بابى 2-بولىگى بويىنشا («كۇش كورسەتۋ ارقىلى توناۋ») سوتتالعان. 2012 جىلى 8 مامىردا قىزىلوردا وبلىستىق سوتىمەن قر قك-ءنىڭ 251-بابى («اتىس قارۋىن زاڭسىز ساتىپ الۋ جانە ساقتاۋ») بويىنشا 2 جىلعا جانە 11 ايعا باس بوستاندىعىنان ايىرىلدى. كولونيادا سالافيتتەرگە قوسىلىپ كەتكەن», – دەدى ۇقك-ءنىڭ باسشىسى.
پرەزيدەنتتىڭ ءباسپاسوز قىزمەتىنىڭ ءمالىمەتىنشە, مەملەكەت باسشىسى ازاماتتاردى اقپاراتتىق كەڭىستىكتەگى ىقتيمال ارانداتۋشىلىقتارعا بوي الدىرماۋعا شاقىردى.
– قازىر قۇقىق قورعاۋ ورگاندارى جۇمىس ىستەپ جاتىر, قاسكۇنەمدەردىڭ كىم جانە قانداي ماقسات كوزدەگەنىن انىقتاۋدا. جۇرت كوپ جينالاتىن ورىنداردى قورعاپ, جارالانعاندارعا مەديتسينالىق كومەك كورسەتۋ جونىندە جەدەل شارالار قابىلداۋ كەرەك. قىلمىسكەرلەردى انىقتاۋ ءۇشىن شۇعىل تۇردە تولىق تەرگەۋ جۇرگىزۋ قاجەت. سونداي-اق, الماتى تۇرعىندارىنا تۇراقتى تۇردە مالىمەت بەرىپ, جالپى قوعامدىق تىنىشتىقتى قامتاماسىز ەتۋ كەرەك. قاۋەسەت تاراتۋشىلاردىڭ اياۋسىز تۇردە جولىن كەسىپ, ارانداتۋشىلاردى انىقتاۋ ماڭىزدى. الماتىداعى جانە رەسپۋبليكاداعى بارلىق ازاماتتار ءتارتىپتى رەتكە كەلتىرۋ ءۇشىن ەڭ قاتاڭ شارالار قابىلدانىپ جاتقانىنا سەنىمدى بولۋعا ءتيىس, – دەدى قازاقستان پرەزيدەنتى.
وتىرىس قورىتىندىسى بويىنشا نۇرسۇلتان نازارباەۆ ىشكى ىستەر مينيسترىنە وقيعا ورنىنا بارۋدى جانە الماتى قالاسىنىڭ اكىمىمەن بىرلەسىپ, قالاداعى جاعدايدى تۇراقتاندىرۋ جونىندە شارالار قابىلداۋدى تاپسىردى.
سونىمەن قاتار, مەملەكەت باسشىسى اقپارات جانە كوممۋنيكاتسيالار مينيسترلىگىنە ازاماتتاردىڭ بارلىق ساۋالدارىنا جەدەل جاۋاپ بەرىپ, حالىققا ۋاقتىلى جانە تولىق اقپارات بەرىپ وتىرۋدى تاپسىردى.
سۋرەتتى تۇسىرگەندەر
س.بوندارەنكو, ب.وتارباەۆ