تاۋشىمىلدىق تامىرى

ونى قازۋشىلارعا تىيىم بار ما؟ قازىر التايدىڭ اتقا مىنگەن شاعى. تاۋ مەن ساي-سالا جاسىل جەلەگىن جامىلىپ, جاسانىپ تۇر. اسىرەسە, مارقاكول جاقتى ايتساڭىزشى!.. كوڭىلگە كىربىڭ تۇسىرەتىنى – تۇمسا تابيعاتتىڭ تاماشا تارتۋىنىڭ قادىرىن بىلمەيتىندەر ءالى كوپ-اق. تاۋدىڭ ءسانى دە, ءمانى دە بولعان تاۋشىمىلدىققا تونگەن قاۋىپ جىلدان-جىلعا كوبەيمەسە, ازايماي تۇر. ويتكەنى, بۇل وسىمدىكتىڭ ءوزى دە, تامىرى دا, قىل اياعى تومارىندا جاتاتىن قارا قۇرت تا تالاي دەرتكە ءدارۋ. سونىسىنا قاراي سوڭعى جىلدارى تاۋشىمىلدىق تامىرىنان قارا بازاردا ميلليونعا باعالاناتىن قۇرت ىزدەپ, تاۋدىڭ بار قولاتىنداعى گۇلدى اقتارىپ تاستايتىن جۇگەنسىز جۇگەرمەكتەر قاپتاپ كەتتى. جۋىردا «موحناتكا» تەلىمىندەگى تەرەكتى اۋىلىنىڭ 20 جاسار تۇرعىنى تاۋشىمىلدىقتىڭ تامىرىن زاڭسىز قازىپ جاتقان جەرىنەن ۇستالدى. وبلىستىق ىشكى ىستەر دەپارتامەنتىنىڭ حابارلاۋىنشا, «وحوتزووپروم» مەكەمەسىنىڭ قىزمەتكەرلەرى كۇرشىم اۋدانىندا رەيد جۇرگىزۋ بارىسىندا ۇستالعان تەرەكتىلىك ازاماتتان ەلىمىزدىڭ «قىزىل كىتابىنا» ەنگەن تاۋشىمىلدىقتىڭ 35 ءتۇبى تاركىلەنگەن. پوليتسيا قىزمەتكەرلەرى اتالعان ايعاق بويىنشا قىلمىستىق كودەكستىڭ 339-بابىندا قاراستىرىلعان (جوعالۋ قاۋپى بار جانە سيرەك كەزدەسەتىن وسىمدىك تۇرلەرىن زاڭسىز الۋ بويىنشا) قىلمىستىق ءىس قوزعادى. بۇل – «مەن ۇرلىق قىلعاندا اي جارىق بولدى» دەپ, ىلۋدە بىرەۋدىڭ تۇتىلعانى عوي. ايتپەسە, جۇردەك موتوتسيكلىمەن ورمانشىعا دا, قورىقشىعا دا شاڭ قاپتىرىپ كەتەتىن قۋلار قانشا گۇلدىڭ وبالىنا قالدى دەسەڭىزشى؟.. دۋمان اناش, «ەگەمەن قازاقستان» شىعىس قازاقستان وبلىسى, كۇرشىم اۋدانى