اتىراۋ. 7 ماۋسىم. اتىراۋ وبلىسىندا اۋىلداستارىنىڭ 13 باس ءىرى قارا مالىن ۇرلاعان كۇدىكتى 2 ايعا قاماۋعا الىندى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
قىزىلقوعا اۋداندىق سوتىنىڭ تەرگەۋ سۋدياسىمەن كۇدىكتىنىڭ ءىس-ارەكەتى قىلمىستىق كودەكستىڭ 188-بابىنىڭ 3-بولىگىمەن سارالانىپ وتىر. ويتكەنى, سوتقا ۇسىنىلعان ءىستىڭ قۇجاتتارى مەن ءىس ماتەريالدارىندا كورسەتىلگەندەي, كۇدىكتى جامانسور ەلدى مەكەنى تۇسىندا ورىستە جۇرگەن 13 ءىرى قارانى ۇرلاعان. مۇقىر اۋىلىندا تۇراتىن تۇرعىندار يەلىگىندەگى وسىنشا مالدى جاسىرىن جىمقىرۋ ماقساتىمەن ماقات كەنتىنە ايداپ اكەتكەن. ءسويتىپ, ءوزىنىڭ اۋىلداستارىنا ءىرى كولەمدە شىعىن كەلتىرگەن.
مال ۇرلاۋ دەرەگىن ءجىتى سارالاعان قىزىلقوعا اۋداندىق سوتىنىڭ قاۋلىسىمەن كۇدىكتى 2 ايعا مەرزىمگە قاماۋعا الىندى.
جولداسبەك شوپەعۇل.
دەرەك: اتىراۋ وبلىستىق سوتىنىڭ ءباسپاسوز قىزمەتى.
فوتو: kostanaytany.kz.