استانا. 5 ماۋسىم. بۇگىن ۆولەيبولدان قازاقستاننىڭ ايەلدەر قۇراماسى الەم گران-ءپريى جارىسىنىڭ الجيردە وتكەن ءبىرىنشى ىرىكتەۋ راۋندىن مەكسيكا كومانداسىن جەڭۋمەن اياقتادى. بۇل تۋرالى رەسپۋبليكا ۆولەيبول فەدەراتسياسى ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
فەدەراتسيا حابارلاعانداي, قازاقستان ۆولەيبولشى قىزدارى قارسىلاستارى قارسىلىعىن ءتورت پارتيادا قايتارا بىلگەن. ولار العاشقى ەكى سەتتە باسەكەلەستەرىن 25:16, 25:20 ەتىپ ەركىن ۇتىپ شىققان. بىراق ءۇشىنشى پارتيادا مەكسيكالىقتار ۆياچەسلاۆ شاپران شاكىرتتەرىن سوڭعى ساتكە دەيىن ۋىستارىندا ۇستاپ تۇرعان. ولار اقىرعى مەزەتتە جەڭىستى تارتىپ اكەتكەن – 25:21. وسىدان كەيىن ءتورتىنشى پارتيا دا اسا تارتىستى وتكەن. دەگەنمەن, بار شەبەرلىكتەرىن سالعان قازاقستاندىقتار ەڭ سوڭىندا مەرەيلەرىن ۇستەم ەتە بىلگەن. ەسەپ – 25:23!
كەزدەسۋدە قازاقستان قۇراماسى ساپىنان رادميلا بەرەسنەۆا (16 ۇپاي), ليۋدميلا يساەۆا جانە كريستينا انيكونوۆا (13 ۇپايدان) ۇپايدى كوبىرەك جيناپ, كوماندانىڭ جەڭىسىنە ۇلكەن ۇلەس قوستى.
وسىلايشا ءبىرىنشى ىرىكتەۋ راۋندى ويىندارىن ءۇشىنشى توپتا وتكىزگەن قازاقستان ۆولەيبولشى قىزدارى الجير جانە مەكسيكا قۇرامالارىنان باسىم ءتۇسىپ, 6 ۇپاي جينادى. ولار تەك پەرۋمەن وتكەن ءبىرىنشى ويىندا عانا قارسىلاستارىنا ەسە جىبەرىپ الدى.
ءبىزدىڭ قىزدار بۇدان ءارى الەم گران-ءپريى جارىسىنىڭ ەكىنشى ىرىكتەۋ راۋندى ويىندارىنا قاتىسۋ ءۇشىن كولۋمبياعا اتتانادى. ويىندار 11-13 ماۋسىم كۇندەرى وينالادى.
تالعات رايىمبەك.
دەرەك, فوتو: قازاقستان ۆولەيبول فەدەراتسياسىنىڭ ءباسپاسوز قىزمەتى.