شىمكەنت. 5 ماۋسىم. وڭتۇستىك قازاقستان وبلىسىنىڭ ورتالىعىندا «مەرەيلى وتباسى-2016» بايقاۋىنىڭ ءۇشىنشى كەزەڭى مارەگە جەتىپ, ءوزىنىڭ جەڭىمپازىن انىقتادى. بۇل تۋرالى egemen.kz ءتىلشىسى حابارلادى.
بيىل قاتارىنان ءۇشىنشى جىل وتكىزىلىپ وتىرعان شارانىڭ فينالىنا 30 وتباسى قاتىستى. ولار بۇعان دەيىن اۋداندار مەن قالالاردا وتكەن بايقاۋلاردا وزىپ شىققان اۋلەتتەردەن قۇرالدى. ەلباسىنىڭ تىكەلەي تاپسىرماسىمەن قولعا الىنعان كونكۋرس بۇل جولى دا اسا قىزىقتى ءوتتى. وندا ەڭبەكتە, سپورتتا, شىعارماشىلىقتا, عىلىمدا جەتىستىككە جەتىپ كەلە جاتقان ىرگەلى شاڭىراق وكىلدەرى وزدەرىن جان-جاقتى ەتىپ كورسەتۋ ءۇشىن بارلارىن سالدى.
ۇلتتىق بايقاۋدىڭ قورىتىندىسىندا العاشقى ءۇش جۇلدەلى ورىننىڭ يەلەرى انىقتالدى. ال «مەرەيلى وتباسى» مارتەبەسىنە كەنتاۋلىق وشاقباەۆتار اۋلەتى لايىق دەپ تانىلدى. ەكىنشى ورىنعا سارىاعاشتىق كۋلگينوۆتار, ءۇشىنشى ورىنعا تۇلكىباستىق ەشەنقۇلوۆالار كوتەرىلدى.
سالتاناتتى شاراعا قاتىسقان وبلىس اكىمىنىڭ ورىنباسارى ۇلاسبەك سادىبەكوۆ جۇلدەگەرلەر وتباسىلاردى ماراپاتتاپ, سىيلىقتار تابىس ەتتى. جەڭىمپاز اتانعان اۋلەتكە وتباسىلىق شيپاجاي ءۇشىن تەگىن جولداما بەرىلدى. ول سونىمەن قاتار الداعى قىركۇيەك ايىندا استانا قالاسىندا وتەتىن رەسپۋبليكالىق بايقاۋدا وڭتۇستىك قازاقستان ءوڭىرىنىڭ نامىسىن قورعايتىن بولادى.
وبلىستىق بايقاۋدا سونداي-اق ونىڭ فينالىندا ونەر كورسەتكەن بارلىق قاتىسۋشىلار باعالى سىيلىقتارمەن ماراپاتتالدى.
ايتا كەتەيىك, قاراتاي وشاقباەۆ – قازاق ادەبيەتىنە, تۇرمىس-سالت جىرلارىنا ولەڭدەر مەن تەرمەلەر, باتا, ناقىل, وسيەت سوزدەر قوسقان فولكلورتانۋشى. كەنتاۋ قالالىق اقساقالدار القاسىنىڭ بەدەلدى مۇشەسى. سونىمەن قاتار, «باتاسى - بۇلاق ارداگەرلەر» سايىسىنىڭ جۇلدەگەرى. «كەشىگىپ كەلگەن كوكتەم» اتتى جىر كىتابىنىڭ اۆتورى. زەينەتكەر, جەكە كاسىپكەر قاراتاي وشاقباي ۇلى - كەنتاۋ قالاسىنىڭ «قۇرمەتتى ازاماتى». بۇگىندە ول 7 ۇلدان 25 نەمەرە مەن 21 شوبەرە ءسۇيىپ وتىر.
باقتيار تايجان.
دەرەك: egemen.kz.