«ەسكىگە – جاڭا ولشەۋىش, جامانعا – جاقسى ولشەۋىش», دەيدى ءبىزدىڭ حالقىمىز. كەشەگى كەڭەستىك كەزەڭدە ەركىمىزدىڭ شەكتەۋلى بولعانى سونشالىق, قالاۋىمىز قالىپتان, تىلەۋىمىز تۇيىقتان شىعا الماي, كونبىستىكپەن كۇن كەشكەن ەدىك.
اللانىڭ قۇدىرەتىمەن تاۋەلسىزدىككە جەتىپ, ءوز جەرىمىزگە ءوزىمىز يە بولدىق. باقىتتى, قۋاتتى دەربەس ەل بولۋ – بابالاردىڭ ارمانى ەدى.
مىنا شەكسىز عالامدا ءوز دالاڭ مەن ءوز وتانىڭ بولعانى قانداي باقىت!
تاۋەلسىز قازاقستان تاڭعاجايىپ جەتىستىكتەرگە جەتتى.
ماڭدايىنا قاسىرەت شەككەن حالقىن ۇلى وتكەلدەن وتكىزۋ تاعدىرى جازىلعان ن.نازارباەۆ ۇلتىنىڭ ۇلى ارماندارىن جۇزەگە اسىرا ءبىلدى.
از عانا جىلدا اسپاننىڭ استىن جايناتىپ, استانا-شاھار تۇرعىزدى.
ەلدىڭ بىرلىگى ارتىپ, بەرەكەسى كىردى.
ىرگەمىز – تىنىش. تۇندەرىمىز – بەيبىت. كۇندەرىمىز – نۇرلى.
مازاسى قاشىپ, الا توپالاڭ بولىپ جاتقان ەلدەردى دە كورىپ وتىرمىز.
سۇيسىنگەن بولىپ, سۇقتانا قارايتىن قاراۋ جۇرتتىڭ بار ەكەنىن دە ءىشىمىز سەزەدى.
ىزگىلىكتى ىستەرىمەن, اقىل-پاراساتىمەن الەمگە تانىلعان پرەزيدەنتتى قازاقستان حالقى قولدايدى. ەلى ەلباسىنا سەنەدى.
ەرتەڭى – كەشەگىدەن, كەلەشەگى بۇگىنگىدەن جارقىن بولار دەپ ۇمىتتەنەدى. سوندىقتان دا, پرەزيدەنتتىڭ جىل سايىنعى جولداۋىن اسىعا كۇتەدى.
ەلباسىنىڭ بيىلعى جولداۋىنىڭ ماڭىزدىلىعى – ادام ءومىرىن قورعاۋدىڭ, ادام تۇرمىسىن جاقسارتۋدىڭ, ادام جانىن ىزگىلەندىرۋدىڭ جولدارىنىڭ بارىنشا كەڭ قاراستىرىلعاندىعىندا.
ءبىلىم ساپاسىن دامىتۋدىڭ, حالىققا مەديتسينالىق قىزمەت كورسەتۋدى كۇشەيتۋدىڭ, تۇرعىن ۇيمەن, تۇششى سۋمەن قامتاماسىز ەتۋدىڭ بۇگىنى مەن كەلەشەگىن مەڭزەگەن باعدارلامالار – «ءوڭشەڭ عانا جاقسى» ويلار جانىمىزدى جادىراتتى.
ەلباسىنىڭ مەملەكەتتىك ءتىلدى مەڭگەرگەن قازاقستاندىقتاردىڭ 2020 جىلعا قاراي, كەم دەگەندە, 95 پايىزعا جەتۋى ءتيىس دەۋى – ءتىل تاعدىرىنا الاڭدايتىن ەل زيالىلارىنىڭ ويىنان شىقتى دەپ ويلايمىن. بۇل حالىقتىڭ كوكەيىندە جۇرگەن ماسەلە ەدى. بۇل مىندەت حالىقتىڭ وزىنە دە جۇكتەلىپ وتىر. قازاقستاندى وتانىم دەيتىن ادامدار ءۇشىن قازاق ءتىلىن ۇيرەنۋ – قاسيەتتى ءىس. جولداۋدىڭ بۇل جولدارىنا قالامگەر رەتىندە مەن دە ۇلكەن ۇمىتپەن قارايمىن. قازاقشا كىتاپ وقيتىن ەل بولامىز دەگەن وي ءبىزدى دە ىنتالاندىردى. جاڭا, كوركەم تۋىندىلاردىڭ جازىلۋىنا دەم بەرەدى.
مەن ءوزىم مالعا باي, كەزىندە تالاس قاراكول قوي زاۋىتى دەپ اتالعان قازاعى كوپ دارقان ءولكەنىڭ قىزىمىن. جىلدان-جىلعا تۇرعىندارى قالاعا قاراي كوشىپ جاتقان ءۇشارال دەگەن اۋىلىمنىڭ تاعدىرى ويلانتاتىن. ءبۇگىنگى جولداۋداعى حالىقتىڭ ءال-اۋقاتىنىڭ كوتەرىلۋىنە, جۇمىسپەن قامتىلۋىنا, اۋىل شارۋاشىلىعىنىڭ دامۋىنا باعىتتالعان شارالاردىڭ العا قويىلۋى – مەنىڭ تۋعان اۋىلىمنىڭ عانا ەمەس, بۇكىل اۋىل-ايماقتىڭ قايتا گۇلدەنۋىنە سەپ بولار دەپ سەنەمىن.
ەرتەڭگە دەگەن سەنىم – ەلدىڭ ۇلكەن تىرەگى.
كۇلاش احمەتوۆا, اقىن, قر مەملەكەتتىك سىيلىعىنىڭ لاۋرەاتى.