تۋريزم – دۇرىس ۇيىمداستىرا بىلسە جىلدىڭ ءتورت مەزگىلىندە دە سۋالمايتىن ءسۇتتى ساۋىن سيىر. جەرى استىندا قارا باقىر قازبا بايلىعى جوق كوپتەگەن مەملەكەتتەر ءدال وسى تۋريزمنەن كۇرەپ پايداعا شىعىپ وتىر. ال, قازاقستاندا حالىقارالىق ءتۋريزمدى دامىتۋدىڭ العىشارتتارى كوپ. شەتەلدەن كەلەتىن ساياحاتشىلار تەك ەجەلگى تاريحي ەسكەرتكىشتەر, كونە ساۋلەت ورنىن تاماشالاۋمەن قاتار, اسەم تابيعات اياسىندا راحاتتانىپ دەمالۋدى دا ويلايدى.
تۇلكىباس اۋدانى ماشات شاتقالىنان اشىلعان «اق شاتىر» دەمالىس ايماعى ەڭ تالعامپاز ساياحاتشىلاردىڭ كوڭىلىنەن شىعادى. ەكى جوتانىڭ ورتاسىنداعى ماشات شاتقالىن جۇماق مەكەن دەسەڭىز دە بولادى. كوكتەمنەن قوڭىر كۇزگە دەيىن كوك كويلەگىن ۇستىنەن شەشپەيتىن ماشاتتىڭ قاق ورتاسىن جارىپ ارىندى تاۋ وزەنى اعىپ جاتىر. شىمكەنتتىڭ شىلىڭگىر ىستىعى شەكەڭىزدى تەسسە, ماشاتتىڭ مۇزدان جاڭا ەرىتىپ العانداي سۋى اياعىڭىزدى مالساڭىز بويىڭىزدان توق قۋاتىن وتكىزگەندەي بولادى. اۋاسى كاۋسار, ساپ-سالقىن, سۇلۋلىعىنا ماساتتانعان تابيعات. اشىلۋ سالتاناتىنا قاتىستىق. بيىك جوتاعا «اق شاتىر» دەمالىس ايماعى دەگەن جازۋ قاراڭعىلىق قىمتاعاندا كەرەمەتتەي كوز تارتادى. اۋماعى ءۇش گەكتارعا سوزىلىپ جاتقان دەمالىس ورنىنا ساياحاتشىلاردان بولەك قالا, اۋدان تۇرعىندارى, وبلىسقا كەلگەن قوناقتارعا بارشا جاعداي جاسالعان.
كوزدىڭ جاسىنداي مولتىلدەپ جاتقان باسسەين, قاراعايدان قيىلعان ءىرىلى-شاعىن كوتتەدج, سۋ جاعاسىنداعى تاپشاندار دەمالىسىڭىزدى جاقسى وتكىزۋىڭىزگە دايىن.
– وسى «اق شاتىردى» سوعۋعا قىرۋار ينۆەستيتسيا تارتىلعان. قازىر مۇندا 80 ادام تۇراقتى جۇمىسپەن قامتىلدى. بۇگىنگى تاڭدا ەڭ ۇلكەن جوبا ءارى ۇلكەن دەمالىس ورىندارىنىڭ ءبىرى. بۇل جەردە 800-گە تارتا دەمالۋشى ءبىر مەزەتتە تىنىعا الادى. ونىڭ ۇلەسى ەكونوميكانىڭ دامۋىنا, سالىقتىڭ تۇسۋىنە سەبەپ بولادى, – دەيدى «وڭتۇستىك» تۋريستىك اقپاراتتىق ورتالىعىنىڭ باسشىسى جاسۇلان تولەبەكوۆ.
ادەتتە, جۇرت شۆەيتساريا دەسە اۋزىنىڭ سۋى قۇريدى. ال, قازاقستان ءتۋريزمىنىڭ ءبىر بۇتاعى «اق شاتىر» دەمالىس ايماعى الەمدەگى ماقتاۋلى تابيعات ورىندارىنان ەش كەم تۇسپەيدى. وزىمىزدىكى ىرگەدە تۇرعاندا باسقانىڭ تاڭسىعى مەن قاڭسىعى نەگە كەرەك؟
باقتيار تايجان,
«ەگەمەن قازاقستان»
وڭتۇستىك قازاقستان وبلىسى