انگليانىڭ گرينۆيچ ۋنيۆەرسيتەتىنىڭ ستۋدەنتى, 21 جاسار اقتوبەلىك قىز ايگەرىم يسماعۇلوۆا كۇتپەگەن جەردەن ۇلىبريتانيا پاتشايىمى ەليزاۆەتا ءىى-ءنىڭ 90 جاسقا تولۋىنا بايلانىستى وتەتىن تويعا شاقىرۋ بيلەتىن الدى. بولاشاق قارجىگەر بۇعان مەرەيتوي قارساڭىندا وينالعان شاقىرۋ بيلەتىن ۇتىپ الۋ ارقىلى قول جەتكىزدى. وسىنىڭ ارقاسىندا ول پاتشايىمنىڭ اتا-تەكتىك سارايىندا ءۇش كۇن بويى تويلاناتىن ۇلان-اسىر توي قوناقتارىنىڭ ءبىرى بولعالى تۇر.
شەكتەۋلى مولشەردە بولىنگەن تويعا شاقىرۋ بيلەتى نەگىزىنەن كورولدىك ازاماتتارى اراسىندا وينالعان. وعان, سونداي-اق, تىلەك بىلدىرگەن كەز كەلگەن ادام, سونىڭ ىشىندە سىرتتان كەلىپ وقىپ جاتقان ستۋدەنتتەر دە قاتىسا العان. مىنە, وسىنداي مۇمكىندىك تۋعان كەزدە ونى ايگەرىم پايدالانىپ قالعان.
«مەن بيلەتتى سۋىرىپ العاندا, تىلدەن ايىرىلىپ قالعانداي كۇي كەشتىم. مۇنشالىقتى ساتتىلىك بولادى دەپ كۇتكەن ەمەس ەدىم. مۇنداي بيلەت مۇلدەم ساتىلمايتىن ەدى», – دەيدى قۋانىشتان كوڭىلى شالقىپ تۇرعان قازاق قىزى.
پاتشايىم ەليزاۆەتانىڭ 90 جىلدىق مەرەيتويىنا كىلەڭ لوردتار مەن جوعارى قاۋىم مۇشەلەرى قاتىسادى. ونىڭ باعدارلاماسىندا تۇسكى اس, بالدىق بي كەشى, پاتشايىم اتتى گۆاردياسىنىڭ سالتاناتتى شەرۋى سەكىلدى كوپتەگەن قىزىقتى شارالار بار.
ەليزاۆەتا ءىى 21 ساۋىردە تۋعان. بىراق رەسمي تويلاۋدى ماۋسىم ايىنا قالدىرعان بولاتىن. ءوز تۋعان كۇنىندە پاتشايىم جۇبايىمەن بىرگە ۆيندزور پاركىندەگى «پاتشايىم سوقپاعىن» رەسمي تۇردە اشادى. ونىڭ بويىندا جوعارى مارتەبەلىنىڭ ومىرىندەگى 63 ماڭىزدى وقيعامەن تانىسۋعا بولادى. وسىدان سوڭ پاتشايىم بيىل 90-عا تولىپ وتىرعان وتانداستارىمەن بىرگە شاي ىشەدى. كەشكە قاراي ۆيندزور زاموگىندا وتباسى شەڭبەرىندە كەشكى اس بەرىلەدى. وسى كەزدە بۇكىل ەلدە اسپانعا وتشاشۋ اتىلادى.
مۇرات ايتقوجا