استانا. 2 ماۋسىم. قازاقستان پرەزيدەنتى جانىنداعى مەملەكەتتىك باسقارۋ اكادەمياسىنا ۇلىبريتانيا ەلىنەن لورد فرەنسيس مود كەلدى. بۇل تۋرالى مەملەكەتتىك باسقارۋ اكادەمياسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى بولاتبەك ءابدىراسيلوۆ لورد فرەنسيس مودتى قابىلدادى. كەزدەسۋ بارىسىندا فرەنسيس ۇلىبريتانيانىڭ مينيسترلەر كابينەتىندە مەملەكەتتىك قىزمەتتىڭ دامۋىنا جاۋاپتى بولعانىن جانە وسى سالادا بىرقاتار رەفورمالار جونىندە باستاما كوتەرگەنىن, سونىمەن بىرگە مەملەكەتتىك باسقارۋ جۇيەسىنە يننوۆاتسيالاردى ەنگىزۋمەن اينالىسقانىن ايتتى. ناتيجەسىندە مەملەكەتتىك جوبالار مەن باعدارلامالاردىڭ اۋديت جۇيەسى ەنگىزىلىپ, ءىرى جوبالاردى باسقارۋ جونىندەگى ارنايى اگەنتتىك قۇرىلعان.
بۇگىندە ونىڭ باسشىلىعىمەن كوشباسشىلىق اكادەمياسى اشىلعان جانە وكسفورد ۋنيۆەرسيتەتىنىڭ سايد بيزنەس-مەكتەبىمەن بىرلەسىپ مەملەكەتتىك ورگانداردىڭ باسشىلارىن جوبالىق باسقارۋ بويىنشا وقىتۋ ءۇشىن ارنايى وقۋ باعدارلامالارىن ازىرلەگەن. بۇل ۇلىبريتانيادا يكەمدى جوبالىق باسقارۋ قاعيداتتارى مەن ولاردى باعالاۋ جۇيەسىن قىسقا مەرزىم ىشىندە ەنگىزۋگە مۇمكىندىك بەردى. سونىمەن قاتار, جوبالاردى ىسكە اسىرۋ تيىمدىلىگىن تەكسەرۋ ناتيجەلەرى تۋرالى ەسەپتەردى تۇراقتى تۇردە جاريالاۋ ەنگىزىلىپ, ازاماتتاردىڭ مەملەكەتكە دەگەن سەنىم دەڭگەيىن ارتتىرۋعا ىقپال ەتتى. وسىلايشا, ۇلتتىق جوبالاردى باسقارۋ بولىگىندە, ۇكىمەتتىڭ اشىقتىق جانە ايقىندىق قاعيداتتارى ءىس جۇزىنە اسىرىلدى.
رەكتور بولاتبەك ءابدىراسيلوۆ اكادەمياداعى وقۋ پروتسەسىن جاڭعىرتۋ, مەملەكەتتىك قىزمەتشىلەردى وقىتۋدا يننوۆاتسيالىق تاسىلدەردى ەنگىزۋ, قازاقستاننىڭ مەملەكەتتىك باسقارۋ جۇيەسىنە يننوۆاتسيالىق تاسىلدەردى ەنگىزۋ بويىنشا جاڭا باستامالار ازىرلەۋ بارىسى تۋرالى جانە ۇلىبريتانيانىڭ مەملەكەتتىك ورگاندارىمەن, وقۋ ورىندارىمەن, سونداي-اق, بريتاندىق مەملەكەتتىك باسقارۋ جۇيەسىنە جوبالىق مەنەدجمەنتتى ەنگىزۋمەن اينالىسقان كومپانيالار توڭىرەگىندە ءوزارا ءىس-قيمىل تاجىريبەسىن باياندادى.
كەزدەسۋ سوڭىندا لورد مود اكادەميانىڭ قىزمەتىنە جوعارى باعا بەردى جانە ەكىجاقتى ىنتىماقتاستىقتى دامىتۋعا, ونىڭ ىشىندە قازاقستاننىڭ مەملەكەتتىك ورگاندارىنىڭ باسشىلارىنا ارنالعان جوبالىق مەنەدجمەنت بويىنشا سەمينارلار تسيكلىن ۇيىمداستىرۋعا قىزىعۋشىلىق تانىتتى.
تالعات رايىمبەك.
دەرەك: پرەزيدەنت جانىنداعى مەملەكەتتىك باسقارۋ اكادەمياسىنىڭ ءباسپاسوز قىزمەتى.
فوتو: inform.kz.