ەلدىڭ جەتكەن تابىسىن ايتقاندا, كەيبىرەۋلەر ونى ار-تىق ماقتانداي كورەدى. بىلە بىلسەك, ول ءبىزدىڭ ءجۇرىپ وتكەن جولىمىزدىڭ دۇرىستىعىنىڭ دالەلى. پرەزيدەنت كەلتىرگەن مىنا ءبىر تسيفردى اتتاپ ءوتۋ قيىن. 1994 جىلى ەلىمىزدە ىشكى جالپى ءونىمنىڭ مولشەرى جەتى ءجۇز دوللاردان شامالى عانا اسقان ەكەن, بيىلعى جىل باسىندا ول 9 مىڭ اقش دوللارىنان اسىپتى. 12 ەسە ءوسىپتى! مۇنداي ءوسىم تاۋەلسىزدىككە قولى جەتكەن ەشبىر ەلدىڭ العاشقى 20 جىلىندا بولماعان ەكەن. جۇرت ونەگە تۇتىپ ايتار وڭتۇستىك كورەيا, مالايزيا, سينگاپۋر ەلدەرىندە دە مۇنداي ءوسىم قارقىنى بولماعان, ءتىپتى جارتىسىنا دا جەتپەپتى.
قۇقىق قورعاۋ سالاسىنىڭ ادامدارىن دا سول تابىستار تەبىرەنتەدى. وسىناۋ ۇلكەن ىستە ولار دا وزدەرىنىڭ ۇلەسى بار دەپ ەسەپتەيدى. ءبىز ىسىمىزگە كەدەرگى كەلتىرەتىن قىلمىستارعا قارسى كۇرەس ارقىلى ۇلكەن مىندەتتەردى جۇزەگە اسىرۋعا ۇلەس قوسامىز. بۇل جايىندا پرەزيدەنت جولداۋىندا دا ايتىلعان.
اسىرەسە, ەلباسىنىڭ سىبايلاس جەمقورلىققا قارسى كۇرەستى كۇشەيتۋ تۋرالى ايتقاندارىن حالىق ايرىقشا قۇپتاپ قارسى الاتىنى انىق. راسىندا دا, سوڭعى كەزدە بۇل كۇرەس جاڭا سيپاتقا يە بولدى. قارماققا شورتانداردىڭ ىلىنە باستاعانىن حالىق قۇپتاپ وتىر. سوڭعى ەكى جىلدا رەسپۋبليكالىق دەڭگەيدەگى 40-تان استام باسشى, 250-دەن استام وبلىستىق, قالالىق دەڭگەيدەگى باسشىلاردىڭ جەمقورلىققا بايلانىستى قىلمىستىق جاۋاپقا تارتىلۋى تالايلاردى قىلمىستان تارتىنۋعا ءماجبۇر ەتتى. ءتىپتى مينيسترلەر, نەبىر تۇكىرىگى جەرگە تۇسپەيتىن كومپانيالاردىڭ باسشىلارى دا جازادان قۇتىلمادى. ەندى كىم دە بولسا, زاڭنان اتتاعان كۇندە جازادان قۇتىلمايتىن كۇن تۋدى.
جۇرت سوت ادامدارىن جازالاۋشىداي, قاتىگەزدەۋ كورەدى. استە دە ولاي ەمەس, قىلمىسقا قاتالدىق ول ەڭ الدىمەن ادامعا قامقورلىق دەپ قابىلداعان ءجون. ەشكىم دە ادامداردىڭ قۇقىنا, مەنشىگىنە قول سۇقپاۋعا ءتيىس. ول ءۇشىن جازالاناتىنىن سەزىنۋگە ءتيىس. سونىمەن قاتار, قىلمىستىق زاڭدىلىقتا قايىرىمدىلىققا ايرىقشا ءمان بەرىلە باستادى. قوعامدىق قاۋىپ تۋدىرمايتىن قىلمىستارعا ەركىنەن ايىرمايتىن جازا قولدانۋ ويلاستىرىلۋدا. سونىڭ ارقاسىندا بيىلدىڭ وزىندە جەڭىل جانە ورتاشا قىلمىس جاساعان 2 مىڭداي ادام ەركىنەن ايىرۋ ورىندارىنان بوساتىلاتىندىعىن حالىق قولدايتىنى انىق.
جولداۋدى تىڭداعاندا, كوپتەگەن ويعا كەلدىك. ءوتكەنى-ءمىزدى ەكشەپ, الدىمىزعا قارادىق. ءسىرا, جۇرتتىڭ ءبارى سولاي ەتتى عوي دەيمىن.
قالداربەك دوسىمبەت, مەدەۋ اۋداندىق سوتىنىڭ توراعاسى.
الماتى قالاسى.