حالىقتىڭ قوشەمەتىنە بولەنىپ, العىسىنا كەنەلگەنى كوپ ناسيحاتتالا بەرمەيتىن سالا قىزمەتكەرلەرى – توتەنشەلىكتەر. توتەنشە جاعدايلار مينيسترلىگىنە باعىنىستى مەكەمەنىڭ جۇرەك جۇتقان, قانداي قاۋىپ-قاتەرگە دە قاسقايىپ قارسى تۇراتىن جاۋىنگەرلەرىنىڭ جارقىن ىستەرى ءاردايىم قۇرمەتكە لايىق. كۇن مەن ءتۇن الماسقان تاۋلىكتىڭ ءار مەزەتىندە قالتقىسىز قىزمەت اتقاراتىن قۇتقارۋشىلار – ناعىز وت پەن سۋ كەشەتىن جاندار.
توتەنشە جاعدايلار مينيسترلىگىنىڭ ماماندارى دا ادام ءومىرىن قۇتقارۋدى ءوزىنىڭ ومىرلىك ميسسياسىنا بالايدى. ءاردايىم ازاماتتاردىڭ قاۋىپسىزدىگى جولىندا ءوز ءومىرىن قاتەرگە بايلايتىن قىزمەتكەرلەردى جەبەيتىن كوپتىڭ العىسى بولسا كەرەك.
سونداي جاننىڭ ءبىرى – ازامات جانالين. اقتوبە وبلىسى ىرعىز اۋدانى توتەنشە جاعدايلار ءبولىمىنىڭ باستىعى قىزمەت بارىسىندا كەز كەلگەن ساتتە كومەك كورسەتۋگە دايىن ەكەنىن دالەلدەپ كەلەدى. ونىڭ جۇمىسى تەك كاسىبي بورىش ەمەس, كۇندەلىكتى ەرلىك پەن ادالدىقتىڭ ۇلگىسى دەۋگە تۇرارلىق. مىندەتىنە ادالدىق, ەرلىك پەن جانقيارلىق تانىتقانى ءۇشىن ازاماتتىق قورعاۋ مايورى ازامات جانالين پرەزيدەنتتىڭ جارلىعىمەن «ەرلىگى ءۇشىن» مەدالىمەن ماراپاتتالدى. بۇل ماراپات – ونىڭ جۇزدەگەن ادامنىڭ ءومىرىن قۇتقارۋ جولىنداعى ءارى توتەنشە جاعدايلاردىڭ الدىن الۋداعى جانقيارلىق ەڭبەگىنىڭ قۇرمەتى. بىلتىر ونىڭ باسشىلىعىمەن قۇتقارۋشىلار قاۋىپتى جاعدايلاردان 500-دەن اسا ادامدى قاۋىپسىز جەرگە شىعاردى. جايساڭباي مەن قۇيىلىس اۋىلدارىنداعى سۋ تاسقىنى كەزىندە ونداعان تۇرعىن ءۇي مەن الەۋمەتتىك نىساندار سۋ استىندا قالدى. دەر ۋاقىتىندا ارەكەت ەتكەن قۇتقارۋشىلاردىڭ ارقاسىندا ەشكىم زارداپ شەكپەدى. تۇرعىندار ەڭ قيىن ساتتەردە ونىڭ جەتەكشىلىگىندەگى قۇتقارۋشىلار ءبىرىنشى بولىپ كومەككە كەلگەنىن ءاردايىم ماقتانىشپەن ايتادى.
قىس مەزگىلى قاي كەزدە دە اقتۇتەك بورانىمەن تۇرعىنداردىڭ ەسىندە قالادى. سىن ساتىندە «سامارا – شىمكەنت» تاسجولىندا قۇتقارۋشىلار اۋا رايىنىڭ قولايسىز جاعدايىندا قالعان جولاۋشىلارعا بىرنەشە رەت كومەككە شىقتى. 21 قاڭتاردا توعىز شەتەلدىك ازامات مىنگەن اۆتوبۋس ەۆاكۋاتسيالاندى, ال كەلەسى كۇنى تاعى 84 جولاۋشى مىنگەن اۆتوبۋس قار قۇرساۋىندا قالدى, ولاردىڭ اراسىندا ايەلدەر مەن بالالار دا بار ەدى. جۇيەلى جانە جىلدام ارەكەتتەردىڭ ارقاسىندا بارلىعى قاۋىپسىز جەرگە امان-ەسەن جەتكىزىلدى.
«قار قۇرساۋىندا قالىپ, ۇرەي قىسقاندا ازامات جانالين باستاعان قۇتقارۋشىلار وراسان كومەك كورسەتتى. سەكسەننەن اسا جولاۋشىمىز, ارامىزدا بالالار دا بار. ۋاقىت ۇزاعان سايىن ساقىلداعان سارى اياز قىسقاندا شىداتپايدى. سىن ساعاتىندا كومەككە كەلگەن ازاماتتارعا العىسىمىز شەكسىز», دەيدى قار قۇرساۋىندا قالعان جولاۋشىنىڭ ءبىرى س.بەركىنعاليەۆ.
قاڭتار ايىندا ورال قالاسىنداعى 2-قۇرىلىس قيىلىسى №1 ۇيدە ءورت شىققانى تۋرالى حابارلاما تۇنگى ساعات 21.55-تە تۇسەدى. قالانىڭ توتەنشە جاعدايلار باسقارماسىنا قاراستى №1 مامانداندىرىلعان ءورت ءسوندىرۋ ءبولىمىنىڭ بولىمشە كومانديرى, ازاماتتىق قورعاۋ ستارشيناسى ايبار ماحمۇتوۆ باستاعان قۇتقارۋشىلار توبى دەرەۋ ىسكە كىرىسىپ, وقيعا ورنىنا ەكى مينۋت ىشىندە جەتەدى. كورشىلەرى قىزىل جالىن شارپىعان شاڭىراقتا زەينەتكەر اجە تۇراتىنىن ايتادى. دەرەۋ ىسكە كىرىسىپ, ءبىر توپ ءورتتى سوندىرۋگە كىرىسكەندە ايبار تالعات ۇلى قالىڭ ورتكە ۇمتىلىپ, دەرەۋ پاتەردە قالعان تۇرعىندى ىزدەۋگە بەل بايلايدى. بىراق قىزىل جالىن شارپىعان ءتىلسىز جاۋعا بەتتەۋ مۇمكىن ەمەس. پاتەرگە اۋىزعى ەسىك ارقىلى كىرۋ مۇمكىن بولماعان سوڭ تىسقا شىعىپ قابىرعاداعى تەرەزەدەن ىشكە ءتۇسۋدى قۇپ كورەدى. اسقان تاۋەكەلمەن پاتەرگە كىرىپ, زەينەت جاسىنداعى تۇرعىندى ىزدەي باستادى. جيھازدار لاپىلداي جانىپ قويۋ ءتۇتىن مەن ىستان ەشتەڭەنى بولجاپ بىلمەيدى. اقىرىندا ىستان ەسىنەن تانىپ قالعان تۇرعىندى تاۋىپ, تەرەزە ارقىلى تىسقا شىعارادى. جۇرەك قاعىسى السىرەگەن اجەگە جەدەل جاردەم بريگاداسى كەلگەنشە العاشقى مەديتسينالىق كومەكتى دە كورسەتەدى.
«مەن ەسىمدى اۋرۋحانا توسەگىندە ازەر جيدىم. ءورت تۇتانىپ, كوك ءتۇتىن قويۋلانا تۇسكەندە اجالىم جەتكەنى وسى شىعار دەپ ويلادىم. وزدىگىمنەن تىسقا شىعۋعا دارمەنىم بولمادى. كەيىن ەستىپ ءبىلدىم, ايبار تالعات ۇلى باستاعان ءورت سوندىرۋشىلەر كومەككە كەلىپ قۇتقارعان ەكەن. ومىرگە قايتا كەلگەندەي بولدىم», دەيدى زەينەتكەر ۆ.بەزسونوۆا.
اباي وبلىسىندا تجم اۆياتسياسى حابار ۇزىلگەن جىلقىشىلاردى تابۋعا سەپتەسىپ, كوپتىڭ العىسىنا كەنەلدى. وبلىستىق توتەنشە جاعدايلار دەپارتامەنتىنە كوكپەكتى اۋدانىنىڭ بيعاش اۋىلىنداعى «ارقالىق» شارۋا قوجالىعىنان 19 اقپاندا كۇندىزگى ساعات 11.00 شاماسىندا جىلقى ءۇيىرىن ىزدەۋگە كەتكەن ءۇش ادامنىڭ بايلانىسقا شىقپاعانى تۋرالى حابارلاما تۇسەدى. ولاردىڭ ناقتى قاي جەردە ەكەنى بەلگىسىز, ويتكەنى ۇيالى تەلەفوندارى ءسوندىرۋلى بولعان. ىزدەستىرۋ-قۇتقارۋ جۇمىستارىنا تجد-نىڭ كۇشتەرى مەن قۇرالدارى جۇمىلدىرىلدى. ىزدەۋ ايماعى كۇردەلى, تاۋلى ايماق بولعاندىقتان, قر تجم «قازاۆياقۇتقارۋ» اق-نىڭ مي-8 تىكۇشاعىن كوتەرۋ تۋرالى شەشىم قابىلداندى. سونىمەن قاتار ىزدەۋ جۇمىستارىنا جول تالعامايتىن كولىك پەن ۇشقىشسىز ۇشۋ اپپاراتى تارتىلىپ, قولجەتىمسىز اۋماقتاردى جەدەل تەكسەرۋدىڭ قامىنا كىرىستى. تىكۇشاقپەن اۋەدە ەكى ساعاتتان اسا ۇشىپ ىزدەستىرۋدىڭ ناتيجەسىندە 1984, 1979 جانە 2003 جىلى تۋعان ءۇش ەر ادام تابىلدى.
ء«بىز ۇشەۋ ەدىك. بەسىن اۋا اقتۇتەك بوران كۇشەيىپ, جىلقى ىزدەۋگە شىققان ءبىزدى باعدارىمىزدان ايىردى. تابيعاتتىڭ توسىن مىنەزى ساباسىنا تۇسكەنىن كۇتىپ «ارقارلىداعى» قىستاققا ايالداپ, قوندىق. بايلانىس تەلەفوندارىمىزدىڭ قۋاتى تاۋسىلىپ سونگەندىكتەن ەشكىمگە حابار ايتا المادىق. اۋىلداستارىمىز ءبىزدى ۋايىمداپ, توتەنشە جاعدايلار دەپارتامەنتىنە قوڭىراۋ شالىپ بايانداعان ەكەن. ەرتەڭىنە بوران باسىلعان سوڭ جىلقىنى تۇگەندەپ جۇرگەندە توتەنشە جاعداي قىزمەتكەرلەرى تىكۇشاقپەن كەلىپ قاجەتتى كومەكتەرىن كورسەتتى. كەز كەلگەن ساتتە ادامداردىڭ ومىرىنە قاتەر تونبەسىن دەپ وزدەرى تاۋەكەلگە باراتىن جاندارعا العىسىمىز شەكسىز. بايلانىس ۇزىلگەنىنە قاراماستان دەر ۋاقىتىندا بىزگە جەتتى», دەيدى جىلقىشى جاراس قوجەكەنوۆ.
توتەنشە جاعدايلار مينيسترلىگىنىڭ مالىمەتىنشە, بىلتىر 11 ايدىڭ ىشىندە ۆەدومستۆوعا باعىنىستى قۇتقارۋ بولىمشەلەرىنىڭ قىزمەتكەرلەرى ءورت ءسوندىرۋ مەن اۆاريالىق قۇتقارۋ جۇمىستارىنا 93 294 رەت شىعىپتى. ءابجىل ارەكەت ەتۋدىڭ ناتيجەسىندە 11 481 ادام قۇتقارىلىپ, 11 465 ادام توتەنشە جاعداي ايماقتارىنان ەۆاكۋاتسيالاندى. زارداپ شەككەن 4 101 ادامعا العاشقى مەديتسينالىق كومەككە جۇگىنىپ, 8 888 ادامعا مەديتسينالىق-پسيحولوگيالىق كومەك كورسەتىلدى. ال «قازاۆياقۇتقارۋ» اق اۋە كەمەلەرى ىزدەستىرۋ-قۇتقارۋ جۇمىستارىنا, ءورت سوندىرۋگە سونىمەن قاتار جەكە قۇرامدى تاسىمالداۋ ماقساتىندا 2 247 مارتە ۇشۋ ورىندادى. ونىڭ ىشىندە سانيتارلىق اۆياتسيا جەلىسىمەن 506 ۇشۋ ورىندالىپ, 484 ناۋقاس تاسىمالداندى. اپاتتار مەديتسيناسى ورتالىعىنىڭ قىزمەتكەرلەرى 9 194 رەت ساپارعا شىعىپ, زارداپ شەككەن 4 007 ادامعا دەر كەزىندە جاردەمگە جەتتى. بىلتىر «112» بىرىڭعاي كەزەكشى-ديسپەتچەرلىك قىزمەتىنىڭ پۋلتىنە حالىقتان 5 024 743 قوڭىراۋ تۇسكەن.