انتىنا ادال دارىگەر

ەربول نۇرعالي ۇلىنىڭ دارىگەر اتانۋىنا و باستا اسىل اجەسى اسەر ەتىپتى. اجەسى رىسكۇل پويىزبەن كەلە جاتىپ, قاراعاندى مەديتسينا ۋنيۆەرسيتەتىندە دارىگەر ماماندىعىن وقىپ جاتقان ستۋدەنتپەن ساپارلاس بولادى. جاس جىگىتتىڭ ۇلكەنگە دەگەن قۇرمەتى مەن ءتالىم-تاربيەسىنە ىشتەي ريزا بولىپ, ومىرگە كەلگەن نەمەرەسىنىڭ قۇرمەتىنە ەربول دەپ اتىن قويىپ, دارىگەر بولىپ, ەلدىڭ العىسىندا جۇرەتىن ەر-ازامات بولسىن دەپ ىرىمداپتى. سول ءازيز انانىڭ اق باتاسى مەن نيەتى قابىل بولىپ, نەمەرەسى دە قاراعاندىداعى مەديتسينا ۋنيۆەرسيتەتىنەن وقىپ, شىڭدالادى.

جاس كەزىندە ەربول اسكەري سالاعا اۋەس بولىپتى. اكەسى نۇرعالي مەن اناسى التىنگۇل مەديتسينا سالاسىن تاڭداۋعا باعىتىن بەرىپتى. اكەسى ۇنەمى قاراعاندى قالاسىندا تابىستى ەڭبەك ەتىپ جۇرگەن اۋىلىنىڭ ماقتانىشى جانىبەك ەسىمدى دارىگەردى ۇلگى قىلىپتى. «جانىبەكتەي بولساڭ, ءبىزدىڭ ارمانىمىز – سول», دەگەن اكە اماناتىن ورىندايدى. ءبىر قىزىعى, سول ۇلگى تۇتقان دارىگەرىنىڭ ح.ماقاجانوۆ اتىنداعى اۋرۋحانانىڭ شۇعىل جاراقات بولىمشەسىندە تراۆماتولوگ بولىپ ەڭبەك ەتكەنىن كەيىن ءبىلىپ, تاعدىر سايكەستىگىنە تاڭىرقاپتى.

وڭتۇستىك وڭىردەن ارقاعا امانات ارقالاپ كەلگەن ول 2010 جىلى قاراعاندى مەملەكەتتىك مەديتسينا ۋنيۆەرسيتەتىنە «جالپى مەديتسينا» ماماندىعى بو­يىنشا وقۋعا ءتۇسىپ, ودان سوڭ «جالپى حيرۋرگيا» ماماندىعى بويىنشا ينتەرناتۋراعا قابىلدانادى. كاسىبي ءبىلىمىن تەرەڭدەتىپ, تراۆماتولوگيا جانە ورتوپەديا (ەرەسەكتەر جانە بالالار) ماماندىعى بويىنشا رەزيدەنتۋراعا ءتۇسىپ, ونى دا ءساتتى ءتامامدايدى.

جالىنداپ تۇرعان جاس جىگىتتىڭ ەڭبەك جولى ستۋدەنت كەزىندە باستالادى. ح.ماقاجانوۆ اتىنداعى تراۆماتولوگيا جانە ورتوپەديا ورتالىعىنىڭ شۇعىل جاراقات بولىمشەسىندە تاجىريبە جيناقتاۋعا بارعان ول الدىمەن سانيتار, كەيىن مەيىرگەر رەتىندە ەكى جىل جۇمىس ىستەيدى.

رەزيدەنتۋرادا وقىپ جۇرگەن كەزىندە, تەمىرتاۋ قالاسىنداعى ورتالىق اۋرۋ­حا­نانىڭ تراۆمپۋنكتىندە تراۆماتولوگ دارىگەر بولىپ ەڭبەك ەتەدى. 2020 جىلدان باستاپ ح.ماقاجانوۆ اتىنداعى كوپبەيىندى اۋرۋحانادا قىزمەت اتقارىپ كەلەدى. وسى جىلدار ىشىندە جەدەل تراۆماتولوگيالىق پۋنكتتە, جەدەل قابىلداۋ بولىمىندە, ەرەسەكتەر ورتوپەدياسىندا, بۋىندار ارتروسكوپياسى, بالالار جاراقاتى, كومبۋستيولوگيا جانە ءىرىڭدى تراۆماتولوگيا بولىمشەلەرىندە جۇمىس ىستەپ, بىلىكتىلىگىن ارتتىرادى. كەيىنگى ءۇش جىلدا شۇعىل جاراقات بولىمشەسىندە ەڭبەك ەتىپ ءجۇر.

تاجىريبەلى تراۆماتولوگ ءوز سالاسىن­داعى كەز كەلگەن وپەراتسيا ءتۇرىن جاسايدى. ونىڭ ىشىندە بۋىنداردى ەندوپروتەزدەۋ, جاراقات كەزىندەگى سۇيەك سىنىقتارىن زاماناۋي تەحنولوگيالارمەن بەكىتۋ, تىزە جانە يىق بۋىندارىنىڭ ارتروسكوپياسى, قول, اياق جانە جامباس سۇيەكتەرىنە رەكونسترۋكتيۆتىك وپەراتسيا­لار جاسايدى.

كاسىبي دامۋ جولىندا شەتەلدىك تاجىري­بەنى مەڭگەرۋگە دە ەرەكشە ءمان بەرەدى. 2020 جىلى تۇركيا رەسپۋب­لي­­كا­سىنىڭ بۋرسا قالاسىندا ء«ىرى بۋىندار ارتروسكوپياسى» بويىنشا, 2023 جىلى رەسەي فەدەراتسياسىنىڭ تاتارستان رەسپۋبليكاسى, قازان قالاسىندا تىزە جانە يىق بۋىندارىنىڭ ارتروسكوپيا­سى بويىنشا بىلىكتىلىگىن ارتتىرادى.

راسىندا, بىلىكتى مامان, تاجىريبەلى تراۆماتولوگ, ارداقتى ازاماتقا راحمەت الۋ – ۇيرەنشىكتى ءۇردىس. ماسەلەن, 86 جاستاعى داميلا مۇحاجانوۆا ەسىمدى اجە وپەراتسياسى ءساتتى وتكەن سوڭ, قولىن جا­يىپ, اق باتاسىن جاۋدىرىپتى. اقپاندا جاۋعان اق جاۋىن مۇز بولىپ قاتىپ, سونىڭ سالدارىنان جاراقات العاندار كوپ بولدى. داميلا اجەي دە اۋلاسىندا تايىپ قۇلاپ, سول جاق سان سۇيەگىن اۋىر جاراقاتتاپ الادى.

– سول كۇنى ماعان جابىق رەپوزيتسيا جانە سول جاق سان سۇيەگىنە گامما-ستەرجەنمەن بلوكتالعان ينترامەدۋلليارلى وستەوسينتەز وپەراتسياسى جاسالدى. وپەراتسيا جوعارى كاسىبي دەڭگەيدە ءوتىپ, قازىرگى تاڭدا جاعدايىم جاقسارىپ, بىرتىندەپ اياققا تۇرىپ كەلەمىن. ەڭ الدىمەن, ەربول ەسىمدى دارىگەردىڭ بىلىكتىلىگى, ادامگەرشىلىگى ماعان ۇلكەن دەمەۋ بولدى. وسىنداي كۇردەلى ساتتە كاسىبي كومەك كورسەتىپ, اياعىمنان تىك تۇرۋىما سەبەپكەر بولعان تراۆماتولوگ دارىگەرگە انالىق اق باتامدى جاۋدىردىم. ۇلكەن ادامعا بۇل – وڭاي جاعداي ەمەس. ەلگەزەك ەربول بالامنىڭ ەڭبەگى جانسىن, – دەيدى داميلا اجەي.

وتكەن اپتادا ورالسىن جالنازار­ ۇلى ەسىمدى جاس جىگىت تە مۇزدان تايىپ قۇلاپ, وڭ تىزەسىن جاراقاتتاپ الادى. سودان اۋىرسىنىپ, جاراقات العان تۇسى ءىسىنىپ, اۋرۋحاناعا تۇسەدى.

– تەكسەرۋ ناتيجەسىندە شۇعىل تۇردە وپەراتسيا قاجەت ەكەنى ايتىلدى. دارىگەرلەردىڭ كاسىبي ءتۇسىندىرۋى مەن قولداۋى ماعان سەنىم بەردى. ماعان وڭ جاق تىزە بۋىنىنا ارتروسكوپيالىق وپەراتسيا جاسالىپ, مەديالدى مەنيسكتىڭ زاقىمدالعان بولىگىنە پارتسيالدى رەزەكتسيا جۇرگىزىلدى, بۋىن ىشىنە ساناتسيا جاسالىپ, بلوكادا جويىلدى. وپەراتسيا جەڭىل ءوتتى. قازىرگى تاڭدا وڭ جاق تىزەم وڭالىپ كەلەدى. وسى ورايدا قولى التىن دارىگەر ەربول مىرزاعا ريزاشىلىعىمدى جەتكىزگىم كەلەدى, – دەيدى ورالسىن.

ال بىلىكتى تراۆماتولوگ ۇلكەنگە قۇرمەت, كىشىگە ىزەت كورسەتۋدى, باتا الۋدى بالا كەزدەن ۇيرەتكەن اكە-اناسىنا ريزاشىلىعىن جەتكىزەدى.

– تراۆماتولوگ دارىگەر رەتىندە ءاربىر كۇن مەن ءۇشىن ۇلكەن جاۋاپكەرشىلىك پەن سەنىم. جاراقات العان ناۋقاستىڭ اۋىر­سىنۋىن جەڭىلدەتىپ, ونىڭ قايتادان ەركىن قيمىلداپ, قالىپتى ومىرگە ورالۋىنا سەبەپكەر بولۋ – ءبىز ءۇشىن مىندەت ءارى مارتەبە, – دەيدى تراۆماتولوگ ەربول نۇرعالي ۇلى.

وسىلايشا, اسىل جار, ارداقتى اكە ەربول نۇرعالي ۇلى ەلدىڭ العىس-باتاسىمەن باقىتقا كەنەلىپ كەلەدى.

قاراعاندى وبلىسى