28 اقپانعا قاراعان ءتۇنى الماتى حالىقارالىق اۋەجايىندا وليمپيادا چەمپيونى ميحايل شايدوروۆتى سالتاناتتى قارسى الۋ ءراسىمى ءوتتى. ۇشاق رەيسى كەشىكسە دە, جانكۇيەرلەر تاراماي, ءوز چەمپيونىن كۇتىپ الدى, دەپ حابارلايدى Egemen.kz.
تۇنگى ۋاقىتقا قاراماستان, اۋە ايلاعىنىڭ حالىقارالىق تەرمينالىندا تۋعان-تۋىستارى, دوستارى, جۋرناليستەر جانە جانكۇيەرلەرى قارسى الدى.
تاريحي جۇلدەنىڭ يەگەرى تۋعان قالاسىنىڭ تۇرعىندارىنا العىس ايتىپ, ولاردىڭ قولداۋىن ەرەكشە سەزىنگەنىن اتاپ ءوتتى.
ءداستۇر بويىنشا چەمپيونعا قىمىز بەن ىستىق باۋىرساق ۇسىنىلدى. وسى ساتتە مانەرلەپ سىرعاناۋشىنىڭ جانىندا اكەسى ستانيسلاۆ شايدوروۆ پەن قازاقستاننىڭ مانەرلەپ سىرعاناۋ قۇراماسىنىڭ باس باپكەرى اسەم كاسانوۆا بولدى.
جينالعان قاۋىمعا ءسوز سويلەگەن ميحايل تولقىنىسىن جاسىرا الماي, قازاقستاندىقتارعا كورسەتكەن ەرەكشە قولداۋى ءۇشىن تاعى دا ريزاشىلىعىن ءبىلدىردى.
«مەنى ەموتسيا كەرنەپ تۇر. ارنايى كەلىپ, مەنى كۇتىپ العاندارىڭىزعا راقمەت. وتە قۋانىشتىمىن. سۇيىكتى قالاما كەلىپ, سىزدەردىڭ وسىنداي جىلى لەبىزدەرىڭىزدى كورۋ – مەن ءۇشىن سوزبەن ايتىپ جەتكىزە المايتىن دۇنيە!» دەدى شايدوروۆ جانكۇيەرلەرىنە.
ايتا كەتەيىك, سالتاناتتى شارا سوڭىندا سپورتشىعا ەرەكشە سىيلىق تابىستالدى. تانىمال قازاقستاندىق سۋرەتشى اسەل سابىرجانقىزى ميحايل شايدوروۆقا ونىڭ كىلەمگە توقىلعان پورترەتىن سىيعا تارتتى. ايتا كەتەيىك, بۇل بىرەگەي تۋىندىنى جاساۋ بارىسىندا سۋرەتشى قىلقالامنىڭ ورنىنا كونكي پايدالانعان.
ايتا كەتەيىك, 25 اقپان ءتۇنى استانا حالىقارالىق اۋەجايىندا وليمپيادا چەمپيونى ميحايل شايدوروۆتى جانكۇيەرلەرى كۇتىپ الدى. ەلگە ورالعان بويدا ميحايل شايدوروۆقا ءۇش بولمەلى پاتەر بەرىلسە, سوفيا سامودەلكينا مەن جاتتىقتىرۋشىسىنا ءبىر بولمەلى پاتەر سىيعا تارتىلدى.
پرەزيدەنت ميحايل شايدوروۆتى ءىى دارەجەلى «بارىس» وردەنىمەن ماراپاتتادى