قوستاناي. 27 مامىر. وبلىس ورتالىعىنداعى توعىز جولدىڭ تورابىنا قوبىلاندى باتىرعا ەسكەرتكىش قويىلدى. ول ساعادات نۇرماعانبەتوۆ اتىنداعى قوردىڭ قوستاناي بولىمشەسى جۇرگىزگەن جۇمىستاردىڭ ارقاسىندا مۇمكىن بولدى. بۇل تۋرالى egemen.kz ءتىلشىسى حابارلادى.
حالقىمىزدىڭ باس باتىرىنىڭ ەڭسەلى ەسكەرتكىشى تۋعان جەردىڭ ءار سۇيەم جەرىن سىرتقى جاۋدان قورعاعان حالقىمىزدىڭ بار باتىرىنىڭ بەينەسى سەكىلدى ەلەستەيدى. ەرلىكتىڭ ەپوپەياسىنداي «قوبىلاندى باتىر» جىرىن وقىماعان قازاق كەم شىعار. وسى جىر ارقىلى تالاي ۇرپاق باتىرلىققا ەلتىپ, ەلىكتەپ ءوستى. تاۋەلسىزدىگىمىزدىڭ 25 جىلدىعى قارساڭىندا ۇلتتىق رۋحتى اسپانداتاتىن مۇنداي ەسكەرتكىشتىڭ ارقا تورىنەن ورىن الۋى زاڭدى ەدى.
قوستاناي قالاسىنىڭ اكىمى بازىل جاقىپوۆ: « ەلىمىزدىڭ تاۋەلسىزدىگى, جەرىمىزدىڭ اماندىعى ءۇشىن كۇرەسكەن ۇلى بابالار ەرلىگىن دارىپتەگەندە عانا جاس ۇرپاقتى ەلدىككە تاربيەلەيمىز. سوندا عانا تاۋەلسىزدىگىمىز باياندى, ماڭگىلىك ەل بولامىز», – دەدى. سونىمەن قاتار, ەسكەرتكىشتىڭ اشىلۋ سالتاناتىندا ءسوز العان اكادەميك ساعىندىق ساتىبالدين جانە س.نۇرماعانبەتوۆ اتىنداعى قور پرەزيدەنتى ماحمۇت نالىباەۆ وسىنداي يگىلىكتى ىستەرگە مۇرىندىق بولىپ وتىرعانىن تىلگە تيەك ەتتى. قازىر قوردىڭ التى وبلىستا فيليالدارى بار. ولار دەمەۋشىلەر جيناعان قارجىنىڭ كومەگىمەن قاجىمۇقانعا, يمانجۇسىپكە ەسكەرتكىش ورناتتى, كوپتەگەن قايىرىمدىلىق ىستەر تىندىردى. مىنە, قوبىلاندى باتىر ەسكەرتكىشى دە وسى قوردىڭ قوستاناي بولىمشەسى جۇمىسىنىڭ ارقاسىندا مۇمكىن بولدى. قوبىلاندى باتىر ەسكەرتكىشىنىڭ بوي كوتەرۋى ءۇشىن كوپتەگەن جۇمىستار اتقارعان قوردىڭ قوستاناي بولىمشەسىنىڭ جەتەكشىسى سەرىكباي بيسەتاەۆقا جينالعان جۇرت راحمەتىن ايتىپ, اق بوز ات مىنگىزدى. سەنات دەپۋتاتى سەرىك اقىلباي, دەمەۋشىلەر اتىنان ءسوز العان كاسىپكەر ىبىراش ەستاەۆ ەلىمىزدىڭ شەكارالىق وبلىسىنىڭ ءبىرى قوستانايدا ايبىندى باتىر ەسكەرتكىشىنىڭ اشىلۋى جاس ۇرپاقتىڭ رۋحىن كوتەرەتىنىن ايتتى.
ەسكەرتكىشتىڭ اشىلۋ سالتاناتىنا وسى جۇمىستىڭ اۆتورلارى بەلگىلى مۇسىنشىلەر اعايىندى ابدىكەرىم مەن ءابدىمۇتالىپ احمەتوۆتەر قاتىستى. وسى سالتاناتتى شارادا بەلگىلى ەسترادا ءانشىسى, قازاقستان رەسپۋبليكاسىنىڭ ەڭبەك سىڭىرگەن ءارتىسى باقتيار تايلاقباەۆ «قوبىلاندى باتىر» اتتى جاڭا ءاننىڭ تۇساۋىن كەستى. ونىڭ ءماتىنى مەن ءانىن جازعان بەلگىلى دارىگەر, مەديتسينا عىلىمدارىنىڭ دوكتورى تورەحان ءابىش تە ادەيى الماتىدان كەلدى. بەلگىلى ايتىس اقىنى مارجان ەسجانوۆا جىردان شاشۋ شاشتى. ەسكەرتكىشتىڭ اشىلۋىنا قازاقستاننىڭ بىرنەشە وبلىسىنان قوناقتار, بەلگىلى جازۋشى, تاريحشى عالىمدار كەلىپ قاتىستى. قوستانايلىقتار مەن قالا قوناقتار قوبىلاندى باتىرعا ارنالعان عىلىمي-پراكتيكالىق كونفەرەنتسياعا قاتىساتىن بولادى.
ءنازيرا جارىمبەتوۆا.
دەرەك, فوتو:egemen.kz.