اتىراۋ. 27 مامىر. اتىراۋ وبلىسىنىڭ جىلىوي اۋدانىندا تۇراتىن كاسىپكەر باعىتجان دوستانوۆ ءوزى تۋىپ-وسكەن شوقپارتوعاي اۋىلىنداعى مەكتەپكە سپورت كەشەنىن سىيعا تارتتى. بۇل تۋرالى egemen.kz ءتىلشىسى حابارلادى.
باعىتجان دوستانوۆ قايىرىمدى ىستەرىمەن تەك شوقپارتوعاي اۋىلىنا عانا ەمەس, اۋدان مەن وبلىستان اسىپ, ەل كولەمىنە كەڭىنەن تانىلعان بالجىگىتوۆتەر اۋلەتىندە ۇلتتىق قۇندىلىقتارمەن تاربيەلەنگەنىن ماقتان تۇتادى. ول قازىر ءوزى باسقاراتىن قۇرىلىس كومپانياسىنا اۋداننىڭ 200-دەن استام تۇرعىنىن جۇمىسقا تارتىپتى.
«ءوزىم دە بالا كۇنىمنەن سپورتقا قۇمار بوپ ءوستىم. سول كەزدە سپورت كەشەنىن تۇرعىزسام دەگەن ويعا بەكىنگەن ەدىم. وتكەن جىلى وسى ويىمدى ىسكە اسىرۋ ءۇشىن مەكتەپ جانىنان سپورت كەشەنىن سالۋدى قولعا الدىم. سپورت كەشەنىن «ىرىس» دەپ اتاۋدى ۇيعاردىق. اۋىل بالالارى ءۇشىن سالىنعان سپورت نىسانىن مەكتەپكە سىيعا تارتۋ قاجەت دەپ شەشتىم», – دەيدى كاسىپكەر باعىتجان دوستانوۆ.
كاسىپكەر بۇل كەشەندى سالۋعا 87 ميلليون تەڭگە قارجى جۇمساپتى. عيماراتقا قاجەتتى بۇيىمداردى دا ءوز قارجىسىنا ساتىپ اپەرگەن. ەندى سپورت كەشەنىنە ءبىر جىل بويى دەمەۋشىلىك كورسەتىپ, سۋ, گاز جانە ەلەكتر ەنەرگياسىنىڭ تولەمدەرىن ءوز ەسەبىنەن تولەۋدى كوزدەپ وتىر. سونىمەن بىرگە, سپورتتىڭ كۇرەس تۇرىنەن ءبىر جاتتىقتىرۋشىنى جالاقىمەن قامتۋدى دا ءوز مىندەتىنە الدى.
جولداسبەك شوپەعۇل.
دەرەك: egemen.kz.
فوتو: راحىم قويلىباەۆ.