الماتىداعى «اتاكەنت» كەشەنىندە قازاقستاندىق «KIHE-2016» –حالىقارالىق XXIII «دەنساۋلىق ساقتاۋ» كورمەسى تابىسپەن ءوتتى. حالىقارالىق سەرىكتەسى – ITE كومپانيالار توبىمەن بىرگە Iteca وتاندىق كورمە كومپانياسى ۇيىمداستىرعان كورمەگە دۇنيەجۇزىنىڭ 19 مەملەكەتىنەن 200-گە جۋىق كومپانيا مەديتسينا جانە مەديتسينالىق تەحنولوگيالار سالاسىندا جاڭا ازىرلەمەلەرىن ۇسىندى.
اسىرەسە, شەتەلدىك سالالىق مينيسترلىكتەردىڭ قاتىسۋىمەن ەكسپوزيتسيا مازمۇنى ارتا ءتۇستى. ماسەلەن, گەرمانيا, مىسىر, قىتاي جانە چەح رەسپۋبليكاسى, سونداي-اق, وڭتۇستىك كورەيا مەن تۇركيا ەلدەرىنىڭ كومپانيا توپتارى ۇلتتىق ستەندىلەرى, ءنوۆوسىبىر وبلىسىنىڭ ستەندى جەكە اۋقىمدى ەكسپوزيتسيا رەتىندە قاتىستى.
قازاقستاندا ءبىرىنشى رەت «ينتەرمەديكا الماتى» كومپانياسى ەڭ ىقشام جانە دىبىسسىز ۋلترادىبىستىق «Alpinion E-Cube-5» سكانەرىن كورسەتcە, «مەديليۋكس» كومپانياسى جاڭا تۋىلعان نارەستەلەردە كەڭىردەك ينتۋباتسياسى پروتسەدۋراسى كەزىندە قولدانىلاتىن قازاقستان نارىعىنداعى بىرەگەي «InfantView» بەينەلارينگوسكوپىن تانىستىردى. «بوريسوۆ مەديتسينالىق پرەپاراتتار زاۋىتى» (بەلارۋس رەسپۋبليكاسى) زاماناۋي جابدىقتار, ەڭ سوڭعى تەحنولوگيالار, ونىمدەر ساپاسىن باقىلاۋداعى ەڭ ناقتى ادىستەردى ۇسىنسا, «Lauma Medical» برەندى ءوز قىزمەتىندەگى جاڭا باعىتتى – مەديتسينالىق كومپرەسسورلىق تريكوتاجىن العا تارتتى. سونىمەن قاتار, «EGO Zlin» چەح كومپانياسى اپات مەديتسيناسىندا قولدانىلاتىن ءونىمدەردىڭ تولىق سپەكترىن, «ZPT Vigantice spol. s.r.o.» قوعامى مەديتسينالىق قاتىناستار جۇيەسىن ۇسىندى.
سونداي-اق, كورمە شەڭبەرىندە جەكە ەكسپوزيتسيا رەتىندە «ەمدەۋ-ساۋىقتىرۋ جانە مەديتسينالىق تۋريزم» تاقىرىبى قامتىلىپ, ازەربايجان, گەرمانيا, مىسىر, قازاقستان, تۇركيا, ۋكراينا جانە ەستونيا ەلدەرىنىڭ مەديتسينالىق ورتالىقتارى مەن كلينيكالارى ءوز قىزمەت تۇرلەرىنەن حاباردار ەتتى.
ءۇش كۇنگە سوزىلعان كورمە شەڭبەرىندە وتاندىق مەديتسينالىق ورتالىقتار, كلينيكالار, سالا ماماندارى مەن ەمدەلۋشىلەر, سونداي-اق, حالىقارالىق مەديتسينالىق مەكەمەلەردىڭ وكىلدەرى قاتىساتىن ۆ2ۆ پىشىمىندەگى بيزنەس كەزدەسۋلەر ۇيىمداستىرىلىپ, مەديتسينالىق جابدىقتار, تەحنيكا, فارماتسەۆتيكالىق ونىمدەر مەن مەديتسينالىق قىزمەت ۇسىناتىن جەتەكشى وندىرۋشىلەر تانىستىرۋ راسىمدەرى مەن شەبەرلىك-سىنىپتارىن وتكىزدى. سونىمەن قاتار, ىسكەرلىك باعدارلاماسى بويىنشا «ەاەق شەڭبەرىندەگى دارىلىك قۇرالدار مەن مەديتسينالىق بۇيىمداردىڭ ورتاق نارىعى. قازاقستان رەسپۋبليكاسىنىڭ بىرىڭعاي ديستريبۋتسيا جۇيەسىن قالىپتاستىرۋ ستراتەگياسى» تاقىرىبىندا ءدوڭگەلەك ۇستەل, «قازاقستانداعى مەديتسينالىق تۋريزم: اقيقات جانە دامۋ پەرسپەكتيۆاسى» كونفەرەنتسياسى ءوتتى. دوڭگەلەك ۇستەل بارىسىندا «سك فارماتسيا» جشس باسقارما باسشىسى نۇرجان الىباەۆ بايانداما جاساپ, قاتىسۋشىلاردى 2016-2019 جىلدارعا ارنالعان جوسپارىمەن تانىستىردى.
سونداي-اق, ول بىرىڭعاي ديستريبيۋتور احۋالدىق ورتالىعىن قۇرۋ – مەديتسينالىق ۇيىمدارعا تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا دارىلەر مەن مەديتسينالىق بۇيىمداردى ۇزدىكسىز جەتكىزۋ جۇمىسىن جەتىلدىرۋ, وتاندىق تاۋار وندىرۋشىلەردى قولداۋ, بيۋدجەتتىك قارجىنى ۇنەمدەۋ مەن ءبىرىڭعاي ديستريبيۋتوردىڭ قارجىلىق تۇراقتىلىعىن قامتاماسىز ەتۋ جۇمىستارىن جەتىلدىرۋگە ءمۇمكىندىك بەرەتىنىن اتاپ ايتىپ, ونلاين-رەجىمدە تاۋار قورى, قويما, ترانسپورت جاعدايى تۋرالى ءمالىمەتتەردى كورۋگە, دارىلەر مەن مەديتسينالىق بۇيىمداردى جەتكىزۋ تۋرالى, ولاردىڭ مەديتسينالىق ۇيىمدار اراسىنداعى قالدىعى جايىندا اقپاراتتى كورۋگە بولاتىنىن جەتكىزدى.
سونىمەن بىرگە, شارادا وتاندىق فارماتسەۆتيكالىق ءوندىرۋشىلەردى قولداۋ ماسەلەلەرى, قر فارماتسەۆتيكالىق نىساندارىنا ينۆەستيتسيالاردى تارتۋ مەن قازاقستان نارىعىنا دارىلىك زاتتار مەن مەديتسينالىق بۇيىمداردى جىبەرۋ ءجۇيەسىن جەتىلدىرۋ ماسەلەلەرى تالقىلاندى.
گۇلزەينەپ سادىرقىزى,
«ەگەمەن قازاقستان»
الماتى