كەشە ماسكەۋدە قازاقستاننىڭ رەسەيدەگى ەلشىسى مارات ءتاجين ماسكەۋ مەملەكەتتىك ۋنيۆەرسيتەتىنىڭ ازيا جانە افريكا ەلدەرى ينستيتۋتىنىڭ (ممۋ ااەي) قۇرىلعانىنا 60 جىل تولۋىنا ارنالعان سالتاناتتى ءماجىلىسكە قاتىستى.
ءوزىنىڭ سوزىندە قازاقستان ەلشىسى مارات ءتاجين ممۋ ااەي – كاسىبي شىعىستانۋشىلار مەن افريكاتانۋشىلار, ءىس جۇزىندە ازيا مەن افريكانىڭ بارلىق ەلدەرى مەن وڭىرلەرى بويىنشا ماماندار دايىنداۋدا جەتەكشى الەمدىك ورتالىقتاردىڭ ءبىرى ەكەنىن اتاپ كورسەتتى.
م.ءتاجين, سونداي-اق, ممۋ ااەي-ءدىڭ قازاقستانعا شىعىستانۋ سالاسىندا ماماندار دايىنداۋعا قوسىپ كەلە جاتقان ۇلكەن ۇلەسىن كولدەنەڭ تارتتى.
«بۇگىندە ممۋ ااەي-ءدى ءبىتىرىپ شىققان كوپتەگەن قازاقستاندىقتار ەلىمىز ەكونوميكاسىنىڭ ءتۇرلى سالالارى مەن باعىتتارىندا جەمىستى جۇمىس ىستەپ ءجۇر. وسى قابىرعادا العان بىلىمدەرى تاجىريبەمەن تولىقتىرىلىپ وتىرعاندىقتان, ولار قازاقستاندى شەتەلدەردە دە لايىقتى كورسەتىپ كەلەدى. تەك سوڭعى جىلدىڭ وزىندە ممۋ ااەي-دە ءتۇرلى ماماندىقتار بويىنشا 20-دان استام قازاقستاندىق وقىپ, تاجىريبەدەن ءوتتى», – دەدى قازاقستان ەلشىسى.
ديپلومات, سونىمەن قاتار, ممۋ ااەي-دە ازيا مەن افريكا حالىقتارىنىڭ 40-تان استام تىلىمەن قاتار, جوعارى كاسىبي دەڭگەيدە قازاق ءتىلى دە وقىتىلىپ كەلە جاتقانىنا نازار اۋداردى. قازاقستاندىق جوو-لارمەن جانە زەرتتەۋ ورتالىقتارىمەن تىعىز ارىپتەستىك بايلانىستار جولعا قويىلعان.
بۇدان بولەك, ول 2015 جىلى ممۋ ااەي-ءدىڭ بازاسىندا قازاق حاندىعى قالىپتاسۋىنىڭ 550 جىلدىعىنا ارنالعان «تۇركى ەلىنەن قازاق حاندىعىنا دەيىن» دەپ اتالاتىن حالىقارالىق عىلىمي-پراكتيكالىق كونفەرەنتسيانى بىرلەسىپ وتكىزۋدىڭ تابىستى تاجىريبەسى جۇزەگە اسقانىن اتاپ ءوتتى. سالتاناتتى ءماجىلىس كونتسەرتتىك باعدارلامامەن اياقتالسا, ونىڭ بارىسىندا ممۋ ااەي-ءدىڭ ستۋدەنتتىك كۆارتەتى قازاقتىڭ «ارمانداستار» ءانىن ورىندادى.
«ەگەمەن-اقپارات»