قوستانايدا بيزنەستى دامىتۋعا 1 ميلليارد تەڭگە ءبولىندى

قوستاناي. 26 ءساۋىر. «بايتەرەك» ۇلتتىق باسقارۋشى حولدينگىنىڭ باسقارما توراعاسى قۋاندىق بيشىمباەۆتىڭ قوستاناي وبلىسىنا ساپارى بارىسىندا وسى حولدينگتىڭ ەنشىلەس ۇيىمدارىنىڭ ءبىرى «دامۋ» كاسىپكەرلىكتى دامىتۋ قورىنىڭ باسقارما توراعاسى قانىش تولەۋشين مەن وبلىس اكىمى ارحيمەد مۇحامبەتوۆ ورتا جانە شاعىن بيزنەستى دامىتۋ جونىندەگى مەموراندۋمعا قول قويدى. بۇل تۋرالى egemen.kz ءتىلشىسى حابارلادى. اتالعان شارا اياسىندا شاعىن جانە ورتا بيزنەستى دامىتۋدىڭ وڭىرلىك باعدارلاماسىن جۇزەگە اسىرۋ ءۇشىن قوستاناي وبلىستىق اكىمدىگى 500 ميلليون تەڭگە, «دامۋ» كاسىپكەرلىكتى دامىتۋ قورى 500 ميلليون تەڭگە قاراجات بولەتىن بولدى. قاراجات ەكىنشى دەڭگەيلى بانكتەر ارقىلى بەرىلەدى. باعدارلاماعا قاتىسۋشىلارعا سالالىق شەكتەۋ قويىلمايدى. نەسيە اينالىمداعى قاراجاتتى تولىقتىرۋ جانە قۇرال-جابدىقتاردى جاڭعىرتۋ ءۇشىن ءبولىنىپ وتىر. بيزنەسى بار كاسىپكەرلەر ءۇشىن 80 ميلليون تەڭگەگە دەيىن, ال بيزنەستى جاڭا باستاعاندار ءۇشىن 20 ميلليون تەڭگەگە دەيىن بەرىلەدى. جىلدىق سىياقى مولشەرى 8,5 پايىزدى قۇرايدى. اتالعان باعدارلاماعا سايكەس نەسيە العان كاسىپكەرلەردىڭ كەپىلگە مۇلكى جەتىمسىز بولعان جاعدايدا «دامۋ» قورىنىڭ كەپىلدەمەسىن پايدالانا الادى. قور باسشىسى قانىش تولەۋشين: «ءوڭىردىڭ دامۋ باعىتىنا وراي, اۋىلداعى جانە اۋدانداعى جوبالارعا باسىمدىق بەرىلەتىن بولادى. بۇرىنعىعا قاراعاندا ۇستەمە پايىز ازايىپ كەلەدى, قاراجات قولجەتىمدى بولا تۇسكەن. ءبىز قوردىڭ كىرىسى ازاياتىنىن تۇسىنەمىز, بىراق قور پايدانىڭ استىندا قالۋدى ەمەس, كاسىپكەرلەرگە ارزان, ۇزاق مەرزىمدى ءارى قولجەتىمدى نەسيە بەرۋدى ماقسات ەتكەندىكتەن وسىنداي قادامعا بارىپ وتىر», – دەدى. ءنازيرا جارىمبەتوۆا. دەرەك, سۋرەت: egemen.kz.