بۇگىندە مەكتەپ ماقتانىشىنا اينالعان زەرتحانا بىرنەشە باعىت بويىنشا جۇمىس ىستەيدى. ارقايسىسى وقۋشىنىڭ قابىلەتىن اشۋعا باعىتتالعان. ينجەنەريا الاڭىندا جاسوسپىرىمدەر كۇردەلى سىزبالار ازىرلەپ, كوپىرلەردىڭ بەرىكتىگىن سىنايدى, ءتىپتى جەل ەلەكتر ستانتسيالارىنىڭ مودەلدەرىن قۇراستىرادى. ال IT جانە روبوتوتەحنيكا باعىتىندا وقۋشىلار Arduino مەن LEGO جيىنتىقتارىن پايدالانىپ, روبوتتاردى باعدارلامالاپ, ولاردى ءتۇرلى كەدەرگىلەردەن وتكىزۋگە ماشىقتانادى.
زەرتحانانىڭ تاعى ءبىر ماڭىزدى بولىگى – كرەاتيۆتى حاب. مۇندا وقۋشىلار توپپەن جۇمىس ىستەپ, جوبالارىن قورعايدى, ستارتاپ يدەيالارىن تالقىلاپ, ءوز ويىن ەركىن جەتكىزۋدى ۇيرەنەدى. بۇل – تەك تەحنيكالىق ءبىلىم ەمەس, كوماندالىق جۇمىستى قالىپتاستىراتىن ورتا.
مەكتەپ وقۋشىلارىنىڭ قولىنان شىققان «BILIM TREND STEM», «اقىلدى جىلىجاي», «اقىلدى قوقىس جاشىگى» جوبالارى بۇگىندە ەرەكشە قىزىعۋشىلىق تۋدىرىپ وتىر. بۇل باستامالار ەكولوگيالىق جانە الەۋمەتتىك ماسەلەلەردى شەشۋگە باعىتتالعان ناقتى جوبالار رەتىندە باعالانىپ وتىر. وقۋشىلار 3D مودەلدەۋ ارقىلى جوبالارىن ازىرلەپ, 3D پرينتەردەن باسىپ شىعارادى, سونداي-اق باعدارلامالاۋ ارقىلى العاشقى ءموبيلدى قوسىمشالار مەن ويىندارىن جاساپ ءجۇر.
زەرتحانانىڭ باستى ەرەكشەلىگى – جوبالىق وقىتۋ ءتاسىلى. مۇندا ءار وقۋشى «بۇل ءبىلىم ماعان نە ءۇشىن قاجەت؟» دەگەن سۇراققا ناقتى جاۋاپ تابادى. ماسەلەن, سۋدىڭ ساپاسىن انىقتايتىن اۆتوماتتى قۇرىلعى جاساۋ ارقىلى ولار ەكولوگيا ماسەلەسىنە ناقتى ۇلەس قوسادى.
مۇنداي ءبىلىم الاڭدارى – تەحنولوگيالىق دامۋدىڭ بەرىك ىرگەتاسى. سەبەبى وقۋشى فيزيكا زاڭدارىن روبوت قۇراستىرۋ ارقىلى مەڭگەرىپ, ماتەماتيكالىق ەسەپتەردى 3D مودەلدەۋ ارقىلى شەشكەندە ونىڭ تانىمى كەڭەيە تۇسەدى.
جالپى, STEM زەرتحاناسى – بالالاردىڭ ارمانىنا قانات ءبىتىرىپ, ولاردى ۇلكەن عىلىم جولىنا جەتەلەيتىن ماڭىزدى ءبىلىم كەڭىستىگى.
«كەلەشەك مەكتەپتەرى»: ەلىمىزدە 217 زاماناۋي ءبىلىم وشاعى اشىلدى
