فوتو: ەنەرگەتيكا مينيسترلىگى
جىل باسىندا ەنەرگەتيكا جانە اۋىل شارۋاشىلىعى مينيسترلىكتەرى ەگىس ناۋقانىنا ارنالعان 402 مىڭ توننا ديزەل وتىنىن جەتكىزۋ كەستەسىن بەكىتتى. بيىل جەتكىزىلىم 1 اقپاندا باستالىپ, 30 ماۋسىمعا دەيىن جالعاسادى.
ەنەرگەتيكا مينيسترلىگى ۇسىنعان ديزەل وتىنىنىڭ باعاسى وڭىرلەردەگى جەتكىزۋ ستانتسياسىنا دەيىن ققس-پەن بىرگە ليترىنە 263 تەڭگە. سوڭعى باعانى وڭىرلىك وپەراتورلار ايقىندايدى جانە ول ليترىنە 281 تەڭگەگە دەيىن بولۋى مۇمكىن. بۇل ورتاشا بولشەك ساۋدا باعاسىنان 49 تەڭگەگە نەمەسە 15%-عا تومەن.
اۋىل شارۋاشىلىعى تاۋارىن وندىرۋشىلەرگە ارنالعان ديزەل وتىنىن ءبولۋدىڭ اشىقتىعىن جانە ونىڭ قوزعالىسىن باقىلاۋدى قامتاماسىز ەتۋ ماقساتىندا بۇعان دەيىن بىرقاتار قوسىمشا شارالار ەنگىزىلگەن بولاتىن.
اتاپ ايتقاندا, جەكە پين-كودتار بەلگىلەنىپ, وتىندى سارى, كوك جانە قىزىل تۇستەرگە بوياۋ جۇيەسى ەنگىزىلدى, سونداي-اق ەلەكتروندىق شوت-فاكتۋرالار جۇيەسىندە ديزەل وتىنىنا ارنالعان جەكە ۆيرتۋالدى قويما قۇرىلدى.
قابىلدانعان شارالار ديزەل وتىنىن ماقساتسىز پايدالانۋ كولەمىن ازايتۋعا مۇمكىندىك بەردى. اتاپ ايتقاندا, ناقتى تۇتىنۋ كولەمى 729 مىڭ توننادان 602 مىڭ تونناعا دەيىن تومەندەپ, 21%-عا قىسقاردى.
ەنەرگەتيكا مينيسترلىگى اۋىل شارۋاشىلىعى تاۋارىن وندىرۋشىلەردى ديزەل وتىنىمەن ۇزدىكسىز قامتاماسىز ەتۋ ماسەلەسىن تۇراقتى باقىلاۋدا ۇستاپ وتىر.
