وتاندىق كاسىپورىندارعا سەرتيفيكات تاپسىرىلدى

اتىراۋ. 25 ءساۋىر. اتىراۋدا سولتۇستىك كاسپي جوباسىنىڭ وپەراتورى «نورت كاسپيان وپەرەيتينگ كومپاني ن.ۆ.» (نكوك) كومپانياسى قازاقستاندىق 17 كومپانياعا ستاندارتتاۋ جونىندەگى حالىقارالىق ۇيىمنىڭ (سحۇ) ISO 9001, ISO 14001, OHSAS 18001, ISO 22000 سەرتيفيكاتتارىن بەرۋ سالتاناتتى شاراسىن ۇيىمداستىردى. ولاردىڭ بارلىعى ساپانى باسقارۋ ورتالىعى («QMC» جشس) وتكىزگەن وقۋدان ويداعىداي ءوتىپ, Rina Services SpA Kazakhstan كومپانياسىمەن سەرتيفيكاتتالدى. بۇل تۋرالى egemen.kz ءتىلشىسى حابارلادى. وتاندىق كاسىپورىنداردىڭ وقۋ مەن سەرتيفيكاتتاۋ شىعىندارىن نكوك كومپانياسى قازاقستاندىق قامتۋدى دامىتۋ جونىندەگى ۇزاق مەرزىمدى ارنايى باعدارلاما شەڭبەرىندە ءوز موينىنا العان. باعدارلاما مىندەتتەرىنىڭ ءبىرى جەرگىلىكتى كومپانيالاردىڭ حالىقارالىق ستاندارتتارعا سايكەس تۇراقتى دامۋىنا ىقپال ەتۋگە, سونىمەن قاتار قازاقستاندىق مامانداردىڭ بىلىكتىلىگىن ارتتىرۋعا باعىتتالعان. قازاقستاندىق 17 كاسىپورىن باسشىلارىنا ISO 9001, ISO 14001, OHSAS 18001, ISO 22000, ISO 50001 حالىقارالىق ستاندارتتارى بويىنشا سەرتيفيكاتتاردى تابىس ەتكەن نكوك كومپانياسىنىڭ جەرگىلىكتى قامتۋ جونىندەگى مەنەدجەرى داۋىربەك وتەجانوۆتىڭ ايتۋىنشا, نكوك-تىڭ قازاقستاندىق قامتۋدى دامىتۋ جونىندەگى باعدارلامالاردى جۇزەگە اسىرۋ شەڭبەرىندەگى مەملەكەت ساياساتىنا جان-جاقتى قولداۋ كورسەتىلەدى, سونىمەن قاتار, جەرگىلىكتى جابدىقتاۋشىلاردىڭ الەۋەتىن وسىرۋگە قولداۋ كورسەتۋ باعىتىندا اۋقىمدى جۇمىس جۇرگىزىلە بەرىلەدى. «كومپانيادا جەرگىلىكتى قامتۋدى دامىتۋ بويىنشا جۇيەلى تاسىلدەمە جۇزەگە اسىرىلۋدا جانە ناقتى مىندەتتەر بەلگىلەنگەن ۇزاق مەرزىمدى ستراتەگيا قابىلدانعان. نكوك شەتەلدىك مەردىگەرلەردەن گورى جەرگىلىكتى كومپانيالاردى تارتۋعا مۇددەلى, بۇل رەتتە ولار سولتۇستىك كاسپي بويىنشا ءونىم ءبولىسۋ تۋرالى كەلىسىمدە بەلگىلەنگەن كريتەريلەرگە سايكەس بولۋى كەرەك جانە ولاردىڭ تاۋارلارى مەن قىزمەتتەرى باسەكەلەسۋگە جارامدى بولۋى ءتيىس. ISO ستاندارتتارى بويىنشا حالىقارالىق سەرتيفيكات جەرگىلىكتى كومپانيالارعا كوپتەگەن دەڭگەيلەردە ەلەۋلى ىقپالىن تيگىزەدى. ونىڭ ۇستىنە, ولار سەرتيفيكاتتار العاننان كەيىن سولتۇستىك كاسپي جوباسىنىڭ تەندەرلەرىنە اناعۇرلىم سەنىمدى قاتىسۋمەن قاتار, دۇنيە ءجۇزى بويىنشا باسقا دا حالىقارالىق كومپانيالارعا ءوز تاۋارلارى مەن قىزمەتتەرىن ۇسىنۋداعى باسەكەلەستىك دەڭگەيىن ارتتىرا الادى», – دەدى ول. ونىڭ ءمالىم ەتۋىنشە, ISO ستاندارتتارىنىڭ ەنگىزىلۋى بىرىنشىدەن, قازاقستاندىق كومپانيالاردىڭ ونىمدىلىگىن وڭتايلاندىرۋعا جانە تيىمدىلىگىن ارتتىرۋعا, ەكىنشىدەن, ولار ءۇشىن تەندەرلىك قۇجاتتاردىڭ تولىق جانە ساپالى تۇردە ۇسىنىلۋىن قامتاماسىز ەتە وتىرىپ, كومپانيالاردىڭ كەلىسىمشارت بەرۋدەگى مۇمكىندىكتەرىن كەڭەيتۋگە, جانە كەلىسىمشارت بويىنشا جۇمىستاردىڭ, سونىمەن قاتار ۋاقتىلى جەتكىزىلىمدەردىڭ بيۋدجەت شەڭبەرىندە, بارلىق تەحنيكالىق كريتەريلەرگە جانە ساپا تالاپتارىنا سايكەس ورىندالۋىنا, بۇل رەتتە تاپسىرىس بەرۋشىلەرىنىڭ تالاپتارىن تولىق قاناعاتتاندىرۋعا تەڭدەسسىز قولداۋ كورسەتىلۋىن قامتاماسىز ەتۋگە مۇمكىندىك بەرەدى. «ءبىز سولتۇستىك كاسپي كونسورتسيۋمىنا حالىقارالىق ستاندارتتار بويىنشا سەرتيفيكاتتاۋدان ءوتۋ بارىسىندا كورسەتكەن قولداۋى ءۇشىن ريزامىز. كورسەتىلگەن قولداۋدىڭ ناتيجەسىندە ءبىزدىڭ كومپانيامىز قىزمەتىمىزدىڭ تيىمدىلىگىن ارتتىرىپ, كورسەتىلەتىن قىزمەتتەرىمىزدىڭ دەڭگەيىن كوتەردى جانە سپەكترىن كەڭەيتتى», – دەدى «قازەلەكتروماش» ديرەكتورىڭ ورىنباسارى الەكساندرا راسپوپينا. جولداسبەك شوپەعۇل. دەرەك: egemen.kz. فوتو: راحىم قويلىباەۆ.