دوستىق داستارقانى

جايىلىپ, تاتۋلىق پەن بىرلىكتىڭ باستاۋىنا اينالعان ۇلىستىڭ ۇلى كۇنى وزگەشە كەيىپتە اتاپ ءوتىلدى اقتىڭ مولاياتىن, تىرشىلىكتىڭ جاڭاراتىن, كوڭىلدىڭ كەڭيتىن, بەرەكە مەن بىرلىككە, تازالىق پەن مەيىرىمدىلىككە, شاتتىق پەن قۋا­نىشقا جەتەلەيتىن ءاز ناۋرىز مەرەكەسىنە تاۋەلسىزدىگىمىزدىڭ شيرەك عاسىرداعى جارقىن بەلەستەرى مەن جاسام­پازدىقتىڭ جارقىن جولدارى ارقاۋ ەتىلدى. جىل باسىن تويلاۋعا ارنالعان كەشەندى جوسپار شەڭبەرىندە 350-دەن استام قوعامدىق-مادەني شارالار قامتىلىپ, «قوش كەلدىڭ, مەرەيلى ناۋرىز!» تەاترلاندىرىلعان-حو­رەوگرافيالىق قويىلىممەن باس­تالدى. ونىڭ سوڭى كوپشىلىكتىڭ قوسىلۋىمەن «قارا جورعا» بيىنە ۇلاستى. جينالعاندار نازارىنا «سەگىز سەرى», «سلادكايا ياگودا», «ەسىل اۋەندەرى», «سلاۆيانكا», «قى­زىل­جار», «بالقاديشا» سەكىل­دى وڭىرگە تانىمال حالىقتىق, فولكلورلىق انسامبلدەر مەن ۆوكالدىق توپتاردىڭ كونتسەرتتىك باعدارلاماسى ۇسىنىلدى. سولتۇستىكقازاقستاندىقتارعا ارناعان قۇت­تىق­­تاۋ سوزىندە ايماق باسشىسى ەرىك سۇلتا­نوۆ بارشا جۇرتتى تابيعاتتىڭ قايتا تۇلەۋى مەن جاڭارۋىنىڭ تاماشا مەزگىلىمەن قۇتتىقتاپ, كوك­تەمدەي كوگىلدىر كوڭىل, كەڭ رياسىز ءومىر تىلەدى. «دوستىق» ءۇيى الدىندا ەتنو­مادەني بىرلەس­تىكتەردىڭ دايىنداۋىمەن ۇزىندىعى 25 مەترلىك «دوستىق» داستارقانى جايىلىپ, ناۋ­رىز كوجە, ۇلتتىق تاعامدار تاراتىلدى. ورتالىق الاڭدا «باۋىرساق-فەست» اكتسياسى, كيىمدەر دەفيلەسى, وتباسىلىق ويىن-ساۋىقتار, سپورت­تىق جارىستار, ەتنواۋىل مەن قول­ونەر بۇيىمدارى كورمەسى, ادەت-عۇرىپ, سالت-ءداستۇر راسىمدەرى ۇيىم­داستى­رىلىپ, ۇلتتىق قۇندىلىقتار بارىنشا ناسيحاتتالدى. «جارايسىڭدار, اجەلەر!» باي­قاۋىندا ال­فەرا ابدراحيەۆا ءبىرىنشى ورىندى جەڭىپ السا, اقمولا, قاراعاندى, پاۆلودار, سولتۇستىك قا­زاقستان وبلىستارىنان 12 اقىن قاتىسقان اي­ماقارالىق ءسوز سايىسىندا پەتروپاۆلدىق جار­قىن جۇپارحان توپ جاردى. اقشاڭقان كيىز ۇيلەر كونكۋرسىندا گران-پري ايىرتاۋ اۋدانىنا بۇيىردى. ال مەملەكەتتىك مەكەمەلەر اراسىندا وبلىستىق ىشكى ىستەر دەپارتامەنتىنىڭ مەرەيى ۇستەم بولدى. وسى كۇنى بىرقاتار الەۋمەتتىك نىساندار اشىلىپ, پايدالانۋعا بەرىلدى. قىزىلجار وڭىرىندە ءۇش كۇن بويى تويلانعان ۇلىستىڭ ۇلى كۇنىندە ادامدار ءبىر-بىرىنە وتاننىڭ تىنىشتىعىن, ەلدىڭ اماندىعىن تىلەپ, اۋا رايىنىڭ جىلۋىن جاقسىلىققا جورىدى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.