ەڭ ماڭىزدى فورۋمعا دايىندىق ماسەلەسى قارالدى

سارسەنبى كۇنى مەملەكەتتىك حاتشى – سىرتقى ىستەر ءمينيسترى قانات ساۋداباەۆتىڭ توراعالىق ەتۋىمەن قازاقستاننىڭ ەقىۇ-عا توراعالىق ەتۋ ماسەلەلەرى ءجونىن­دەگى مەم­لە­كەتتىك كوميسسيانىڭ وتىرىسى بولدى. باستى ماسەلە پرەزيدەنت نۇرسۇلتان نازارباەۆتىڭ 16 تامىزدا اقوردادا 1-2 جەلتوقساندا استانا قالاسىندا بولاتىن ەقىۇ سامميتىنە دايىندىق ماسەلەلەرىن قاراستىرعان كەڭەستە بەرگەن تاپسىرما­لارىن ورىنداۋ بارىسىنا ارنالدى. وتىرىستا ءسوز سويلەگەن قانات ساۋدا­باەۆ: ءبىزدىڭ ەقىۇ-عا ءتور­اعالىق ەتۋىمىز جانە ۇيىم سام­ميتىن استانا قالاسىندا وتكىزۋگە بارلىق مۇشەلەردىڭ ءبىراۋىزدان داۋىس بەرۋى – الەمدىك قوعامداس­تىقتىڭ قازاقستاننىڭ تاۋەل­سىزدىك العان جىلداردا الەۋمەت­تىك-ەكو­نوميكالىق جانە قوعام­دىق-ساياسي دامۋدا قول جەتكىزگەن تولىمدى تابىس­تارىن تولىق مويىنداي­تى­نىن كورسەتەدى, دەدى. بۇگىنگى كۇنى قازاقستان تابىستى مەملەكەت رەتىندە عانا قالىپ­تا­­سىپ قويعان جوق, سونىمەن بىرگە, ول جاھاندىق قاۋىپسىزدىك پەن ىن­تىماقتاستىقتى قامتاما­سىز ەتۋگە سۇبەلى ۇلەس قوسا الاتىن بەدەلدى ايماقتىق دەرجاۆا­عا اي­نا­لىپ وتىر. وسىنىڭ ءبارى جاڭا قازاق­ستاننىڭ قۇرىلىسشى­سى جانە ارحيتەكتورى بولىپ وتىر­عان پرەزيدەنت نۇرسۇلتان نازار­باەۆ­تىڭ قايراتكەرلىك ىستەرىنىڭ تاما­شا جەمىسى جانە ونىڭ الەم­دىك اۋقىمداعى ليدەر رەتىندە تانى­لۋىنىڭ دالەلى, دەدى ق.ساۋداباەۆ. وسىدان ءارى ەقىۇ-نىڭ ءىس باسىنداعى توراعاسى رەتىندە قانات ساۋداباەۆ ۇيىمنىڭ قازىرگى احۋالى تۋرالى ايتتى. ول قازىر جاھان­دىق قاۋىپتەر مەن داعدارىس­تىق كەزەڭدەردى باستان كەشۋدە. سوندىقتان دا سامميت وتكىزۋ ۋا­قىت تۋدىرعان اسا وزەكتى قاجەتتىلىك بولىپ تابىلادى, دەي كەلىپ, ونىڭ قازاقستاندا وتكىزىلۋى ءبىز عانا ەمەس, بۇكىل تمد ەلدەرى ءۇشىن ماقتانىش ەكەنىنە ەكپىن ءتۇسىردى. استانا ءسامميتى – دايىن شە­شىمدەردىڭ ءسامميتى بولمايدى, مۇن­دا, ەڭ باستىسى, ءبىز جالپى­ادام­زاتتىق قۇندىلىقتاردى باس­شىلىققا الا وتىرىپ, ءبىر توقتام­عا كەلۋىمىز كەرەك. سونىڭ ىشىندە ەقىۇ-نىڭ جاۋاپكەر­شىلىك اي­ماعىندا ءبىرتۇتاس جانە بولىنبەيتىن قاۋىپسىزدىگى بار قاۋىمداستىق قۇرۋ جولىندا ستراتەگيالىق باعدارلار مەن “جول كارتاسىن” انىقتاۋىمىز قاجەت, دەدى شەشەن. ءسوزىنىڭ سوڭىندا ول مەملە­كەتتىك كوميسسيانىڭ نەگىزگى ءمىن­دەتى ەلباسىنىڭ اقوردادا 16 تامىزدا بولعان كەڭەستە بەرگەن تاپ­سىر­ما­لارىن بۇلجىتپاي ورىن­داۋدى قامتاماسىز ەتۋ ەكە­نىن اتاپ ءوتتى. وسىعان بايلانىس­تى وتى­رىستا استانا ءسامميتىن وتكىزۋگە بايلا­نىستى ءتيىستى مەملەكەتتىك ورگان­دارعا ناقتى تاپسىرمالار بەرىلدى. سامميتكە ۇيىمعا مۇشە بارلىق 56 ەلدىڭ ليدەرلەرىمەن قاتار, ەقىۇ-نىڭ 12 ارىپتەس ەلدەرىنىڭ باسشى­لارى دا قاتىسادى دەپ كۇتىلۋدە. سونداي-اق بارلىق بەدەلدى حالىق­­ارالىق ۇيىمداردىڭ جەتەك­شىلەرى دە بولاتىنى ءسوزسىز. ونىڭ ۇستىنە بارلىق مۇشە ەلدەر­مەن قاتار, كوپ­تەگەن قىزىعۋشى­لىق تانىتۋ­شى ەل­دەردىڭ باق وكىلدەرى دە استانا قالا­سىنا  كەلەرى انىق. ءبىر ءسوز­بەن ايتقاندا, بۇل تاۋەل­سىز قا­زاق­ستان توپىراعىندا وسى زامانعا دەيىن بولىپ كور­مەگەن ەڭ ماڭىزدى الەمدىك شارا بولعالى وتىر. جاقسىباي سامرات.