قازاق سپورتشىسىنىڭ دەلەبەسىن قوزدىرار ۇلتتىق رۋحتاعى ۇران تۋا ما؟
اپتا باسىندا الماتىدا 7-ءشى قىسقى ازيا ويىندارى كەزىندە اسقاقتايتىن ءانۇراننىڭ ماتىنىنە بايقاۋ جاريالاۋعا بايلانىستى ءباسپاسوز ءماسليحاتى بولىپ ءوتتى. اق ازيادانىڭ بويتۇمارى سىندى ۇران كەلەر ويىنداردا دا دوستىق پەن بەيبىتشىلىكتى پاش ەتەتىندەي, ءبىتىمگەرشىلىك جانە توپتاستىرۋشىلىق الەۋەتىن اشۋعا باعىتتالعان.
ءباسپاسوز ءماسليحاتىندا بايقاۋدىڭ تالاپتارى مەن وتكىزۋ ءتارتىبى, بايقاۋعا قاتىسۋشىلاردىڭ ءمارتەبەسى, ۇسىنىلعان ماتىندەردىڭ اۋەنىمەن ۇيلەسۋىن باعالاۋدىڭ, جەڭىمپازداردى انىقتاۋ مەن ماراپاتتاۋدىڭ جاي-جاپسارى جاريا ەتىلدى.
“ازيادانىڭ ءانۇرانى قانداي بولۋ كەرەك؟” دەگەن ساۋال بۇعان دەيىن دە باق وكىلدەرى تاراپىنان ارا-تۇرا كوتەرىلىپ تۇراتىن. ال الدا وتەتىن ازيادانىڭ لوگوتيپىن جاساۋعا باقانداي ەكى جىل كەتكەنىن ەسكەرسەك, 5 ايدا ۇلتتىق رۋحتا اسقاقتايتىن, وتاندىق سپورتشىلارىمىزدىڭ دەلەبەسىن قوزدىرار, قازاقى بوياۋى قانىق دۇنيە تۋسا يگى!
ال ۇيىمداستىرۋشىلار ازيادا ءانۇرانى مىندەتتى تۇردە گيمن جانرىندا جازىلىپ, ءماتىنى قازاق, ورىس جانە اعىلشىن تىلدەرىندە بولعانىن قۇپ كورەدى. ال ءباسپاسوز ءماسليحاتىندا جۋرناليستەر قاۋىمىنىڭ ازياداعا كەلەتىن 32 مەملەكەتتىڭ ىشىنەن ورىس ءتىلىن بىلەتىن ەلدەر ساۋساقپەن سانارلىق, سوندىقتان ءانۇران قازاق جانە اعىلشىن تىلدەرىندە جازىلسا دا جارار ەدى دەگەن ۋاجىنە, “7-ءشى قىسقى ازيا ويىندارىن ۇيىمداستىرۋ كوميتەتىنىڭ اتقارۋشى ديرەكتسياسى” اق ۆيتسە-پرەزيدەنتى ەۆگەني نيكيتينسكي:
– ءبىز ازيادا ءانۇرانىنا بايلانىستى قوماقتى جۇلدە قورى بار بايقاۋ ۇيىمداستىرىپ وتىرمىز. جالپى, بايقاۋ ەكى كەزەڭنەن تۇرادى. جۇمىستاردى قابىلداۋ بۇگىننەن باستالىپ, ۇستىمىزدەگى جىلدىڭ 1 قازانىنا دەيىن جالعاسادى. 6 قازانعا دەيىن جۇمىستاردى ىرىكتەۋ جۇمىستارى جۇرەدى. بايقاۋ تالاپتارىنا لايىقتى بىرنەشە جوبا 7 قازاندا استانا قالاسىندا وتەتىن ۇلكەن كونتسەرتتە كورەرمەندەردىڭ اشىق داۋىسىنا سالىنىپ, قاي كومپوزيتوردىڭ ءانى جەڭىمپاز بولاتىنى انىقتالادى. تاعى ءبىر ەسكەرەتىن ءجايت, ءانۇران ءماتىنىنىڭ قاي تىلدە جازىلعانى ماڭىزدى ەمەس. ەڭ باستىسى – ءانى مەن ءسوزى ۇيلەسىپ تۇرسا بولعانى, – دەدى.
بايقاۋدىڭ شارتتارىن كوميسسيا مۇشەلىگىنە الىنعان ەركەش شاكەەۆ, جەڭىس سەيدوللا, رينات ابدىحالىقوۆ, قىدىرالى بولمانوۆ سىندى ونەر ادامدارى قۋاتتاپ وتىر. سول سياقتى كوميسسيا قۇرامىندا مۇرات قۇسايىنوۆ, بايعالي سەركەباەۆ, ماقسات جاۋتىكوۆ, ەرىك تاستامبەكوۆ سىندى ونەر مايتالماندارى بار.
قابىلەتى مەن قارىمىنىڭ ارقاسىندا بايقاۋدىڭ ەڭ ۇزدىك شىعارماسىنىڭ يەسى 1 ميلليون تەڭگەنى قالتاسىنا باسىپ, ابىرويدان دا كەندە بولمايتىن ءتۇرى بار. سول سياقتى ازيادا ءانۇرانىنا ارنالىپ بەينەكليپ تە تۇسىرىلمەك. ال ورىنداۋشىسىنا كەلەر بولساق, ول قازاق ءانشىسى نەمەسە شەتەلدىك بەلگىلى تانىمال ونەر ادامى بولۋى دا ابدەن مۇمكىن. بۇل ماسەلە ءبىراز پىكىرتالاسقا تامىزىق بولاتىن سىڭايلى.
ايناش ەسالي. الماتى.
* * *
جۇلدەلى ورىندار جەتكىزبەي بارادى
سەيسەنبى كۇنى قازاقستان سپورتشىلارى ات سپورتى, ەسكەك ەسۋ, كوركەم گيمناستيكا جانە كانوە ەسۋدەن (كانوە-سلالوم) جارىسقا شىقتى. ات سپورتىندا ەل نامىسىن تيمۋر پاتاروۆ قورعادى. بالا كەزىنەن ات قۇلاعىندا ويناپ وسكەن جاسوسپىرىم جارىستىڭ وسى تۇرىنەن ەڭ مىقتى دەگەن ەلدەردىڭ وكىلدەرىمەن ءبىر توپتا باق سىناستى. ءبىرىنشى كۇنى تيمۋر بارلىق كەدەرگىلەردى قينالماي وتسە, سوڭعى كۇنى ەكى كەدەرگىدەن اسا المادى. ال بۇل 8 بالل ايىپ بەرىلەدى دەگەن ءسوز. ءسويتىپ, ول 9-ورىندى قاناعات تۇتتى. دەگەنمەن, ونىڭ جارىسىن ءبىزدەن دە باسقا ەلدەردىڭ وكىلدەرى جاقسى باعالاۋدا. راسىمەن دە ەگەر وسى سىنعا 32 مەملەكەتتىڭ وكىلدەرى قاتىسسا, تيمۋردىڭ قازاقستانعا اكەلگەن 9-ورنى جامان كورسەتكىش ەمەس. بىزدەن كەيىنگى ورىنداردا ات سپورتى جاقسى دامىعان برازيليا, اقش, قىتاي, بەلگيا, سينگاپۋر مەن باسقا دا ەلدەر قالدى. كانوە-سلالومدا تيموفەي ەمەليانوۆ 12-ورىندى مىسە تۇتتى. بۇل سىنعا كاسىپقوي ءتورت سلالوميست قانا قاتىستى. سونىڭ وزىندە دە ونىڭ جولى بولمادى. كوركەم گيمناستيكادا كەرەكۋلىك يۋليا كيزيما باق سىنادى. باپكەرى وكسانا برونسكايانىڭ ايتۋىنشا, ەگەر ول 10-15 ۇزدىك گيمناسشىنىڭ قاتارىنا قوسىلسا, وسىنىڭ ءوزى ءبىز ءۇشىن ۇلكەن جەتىستىك بولماق. گاندبولدان قىزدار قۇراماسى 3-ءشى ورىن ءۇشىن برازيليامەن بولاتىن ماتچقا دايىندالۋدا. وسى ويىندا قىزدارىمىز جەڭسە, بۇل قازاقستان قۇراماسىنىڭ وليمپياداداعى ءۇشىنشى قولا جۇلدەسى بولادى. ءبىزدىڭ تاعى ءبىر سپورتشىمىز قايرات اعىباەۆ دزيۋدودان بىرىككەن “ەسسەن” كومانداسى ساپىندا ونەر كورسەتتى. كەشە بەت قاتتالىپ جاتقاندا, قايرات كومانداسىمەن بىرگە وليمپيادانىڭ باس جۇلدەسىن جەڭىپ الدى. بۇل مەدال ەلىمىزدىڭ جۇلدەلەر قاتارىنا كىرمەسە دە اعىباەۆتىڭ وتانىمىز ءۇشىن جانە ءوزى ءۇشىن جەڭىپ العان چەمپيوندىق اتاق بولىپ سانالادى. قازىر قازاقستان قۇراماسى جالپى كوماندالىق ەسەپتە ءۇش التىن (ەكەۋى ەسەپتە), ەكى كۇمىس جانە ەكى قولا ءجۇلدەمەن 205 ەلدىڭ ىشىندە 24-ءشى ورىندا تۇر. ارداق توعىموۆ, جۋرناليست, ارنايى “ەگەمەن قازاقستان” ءۇشىن – سينگاپۋردەن. * * *ايدىنداعى كەزەكتى ايقاس
وسى كۇندەرى حوككەيدەن ەرلەر اراسىندا ەل كۋبوگى جولىنداعى كەزەكتى باسەكەلەر وتۋدە. كەشە كەشكىسىن جارىستىڭ جارتىلاي فينالدىق كەزدەسۋلەرى وينالدى. وندا وسكەمەننىڭ “كازتسينك-تورپەدو” كومانداسى مەن قاراعاندىنىڭ “سارىارقا” كلۋبى, اتىراۋدىڭ “بەيبارىس” جانە رۋدنىيدىڭ “گورنياك” كوماندالارى كەزدەستى. ال وسىنىڭ الدىندا ەكى توپقا بولىنگەن سەگىز كوماندانىڭ ويىندارى مارەسىنە جەتكەن بولاتىن. “ا” توبىندا ءبىرىنشى ورىندى “سارىارقا”, ودان كەيىنگى ورىنداردى “گورنياك”, “ارلان”, “بارىس-2” كلۋبتارى السا, “ۆ” توبىندا “بەيبارىس”, “كازتسينك-تورپەدو”, “قازاقمىس”, “ەرتىس-پاۆلودار” كوماندالارى وسى ورنالاسقان جايى بويىنشا ورىندارعا يە بولدى. 19 تامىز كۇنى باستالعان جارىستا ءار كوماندا ءۇش كەزدەسۋدەن وتكىزدى. تەك “بەيبارىس” قانا ەشبىر ويىندا جەڭىلمەدى. ول “ەرتىس-پاۆلوداردى” 3:0 ەسەبىنەن جەڭىپ, قالعان ەكەۋىندە تەڭ وينادى. ال “ا” توبىندا ءبىرىنشى ورىنعا جايعاسقان “سارىارقا” بولسا, ەكى ويىندا جەڭىپ, بىرەۋىندە (استانالىق “بارىس-2” كومانداسىنان) جەڭىلدى. دەگەنمەن, قاراعاندىلىق حوككەيشىلەر تۋرنير كەستەسىندە ەڭ كوپ شايبا سالعان كوماندا بولىپ وتىر. ولار قارسىلاستار قاقپاسىنا 19 شايبا سوقسا, وزدەرىنە 13 شايبا جىبەرىپ الدى. ازىرشە بيىلعى جارىستا 8 ۇپاي جيناعان “سارىارقا” كومانداسىنىڭ شابۋىلشىسى اندرەي تروششينسكي بەرگەن پاستارى مەن سوققان شايبالارىنا قاراي ءبىرىنشى ورىندا كەلەدى. ال ونىڭ ءارىپتەسى انتون دۋبينين استانالىقتار وتكىزگەن سوڭعى ويىندا ەكى رەت نىسانانى ءدال كوزدەپ, سالعان شايبالارى بويىنشا مەرگەندەر ءتىزىمىنىڭ كوش باسىندا تۇر. داستان كەنجالين.
