قىزىلوردا وبلىسى اكىمىنىڭ قولداۋىمەن سىر ايماعىنداعى ۇلتتىق مۇراعات قورىنا جاتاتىن قۇجاتتار ەلەكتروندى مۇراعاتقا كوشىرىلمەك. وبلىستىق مۇراعات قورىنداعى قۇجاتتاردى ساندىق ۇلگىگە كوشىرۋ ماقساتىندا جەرگىلىكتى بيۋدجەتتەن 32 ملن. 974 مىڭ تەڭگە قارجى قارالىپ, وسى باعدارلامامەن جۇمىس جاسايتىن اقپاراتتىق تەحنولوگيالار ءبولىمى ءۇشىن 4 شتاتتىق بىرلىك بەرىلگەن.
سىر ايماعىنداعى مۇراعاتتار قورلارىنداعى قۇجاتتاردى ساندىق ۇلگىگە كوشىرۋگە بايلانىستى ءبولىنگەن قارجىعا سايكەس تەندەر جاريالانىپ, ناتيجەسىندە “لەتوگراف يت كونسالتينگ قازاقستان قىزمەتى” جشس جەڭىمپاز بولىپ تانىلادى.
لەتوگراف جۇيەسىنىڭ ەرەكشەلىگى – باعدارلامالىق كودقا ءوزگەرىس ەنگىزۋدى تالاپ ەتپەيدى, قاجەتتىلىگىنە قاراي قىزمەتىن ءوزگەرتۋگە بولادى,-دەيدى “لەتوگراف يت كونسالتينگ قازاقستان قىزمەتى” جشس ديرەكتورىنىڭ ورىنباسارى م.پروكوپەۆا.
بۇگىندە ەلەكتروندى مۇراعات ءۇشىن ارنايى اۆتوماتتاندىرىلعان باعدارلامانى ورناتۋعا رەسەيدىڭ ماسكەۋ قالاسى مەن الماتىدان ارنايى اتباسىن بۇرعان ماماندار ششۇعىل كىرىسىپ تە كەتتى.
ەركىن ءابىل. قىزىلوردا.
* * *
60 قول اربا سىيلادى
وبلىس ورتالىعىنداعى “باقىت باعاناسى” ەسكەرتكىشىنىڭ الاڭىندا “بىرلىگىمىز جاراسقان!” رەسپۋبليكالىق اكتسياسى اياسىندا اقتوبەلىكتەر ايتا جۇرەتىندەي ادەمى شارا ءوتتى. شاراعا قاتىسقان دەنساۋلىق ساقتاۋ مينيسترلىگى جانىنداعى “دەنساۋلىق ساقتاۋ ينۆەستيتسيالىق جوبالارىن باسقارۋ ورتالىعى”جشس-ءنىڭ باس مەنەدجەرى ارىنعازى بەركىمباەۆ ءوزىنىڭ قارجىسى ەسەبىنەن 60 ءمۇگەدەك ادامعا قولاربا سىيلادى. اقتوبە قالاسى اكىمىنىڭ ورىنباسارى ءسانيا قالدىعۇلوۆا جەرگىلىكتى بيلىكتىڭ مۇمكىندىگى شەكتەۋلى مۇگەدەك جاندارعا قايىرىمدىلىق جاساۋ ماقساتىندا ۇيىمدارمەن, كاسىپورىندارمەن, كاسىپكەرلەرمەن ءبىرلەسە جۇمىس جاساپ وتىرعانىن جەتكىزدى. اتىمتاي جومارتتىق تانىتقان ازامات ارىنعازى بەركىمباەۆ قالا اكىمدىگىمەن اقىلداسا كەلىپ, مۇمكىندىگى شەكتەۋلى جاندارعا قايىرىمدىلىق كومەك كورسەتۋدى شەشكەنىن, مۇنىڭ اقتوبەلىكتەرگە دەگەن از عانا قولداۋى ەكەنىن ايتتى. ءوز كەزەگىندە ءسوز العان وبلىستىق مۇگەدەكتەر ۇيىمىنىڭ توراعاسى فەدور چەمودانوۆ پەن سال اۋرۋلارىنا شالدىققان ازاماتتاردى قورعاۋ قوعامىنىڭ ءتورايىمى قۇرالاي ءبايمەنوۆا وعان قايىرىمدىلىق كومەگى ءۇشىن ريزاشىلىق ءبىلدىردى. ساتىبالدى ءساۋىرباي. اقتوبە وبلىسى.
