شىمكەنت قالالىق كواليتسياسىنىڭ جەتەكشىسى بولىپ مۇرات جولدىحوجاەۆ تاعايىندالدى. الداعى ۋاقىتتا قۇرامىندا 150 ادامى بار كواليتسيا جۇمىس ىستەيدى. ولاردىڭ قاتارىنا ساياسي پارتيا وكىلدەرى, پارتيالىق جاقتاستار, قوعام قايراتكەرلەرى, زيالى قاۋىم وكىلدەرى مەن جاستار بەلسەندىلەرى تارتىلعان. ۇگىت-ناسيحات كەزەڭىندە كواليتسيا مۇشەلەرى بەكىتىلگەن جەلىلىك كەستەگە سايكەس ونلاين جانە وفلاين فورماتتا كەزدەسۋلەر, پىكىرتالاستار مەن ءتۇسىندىرۋ ءىس-شارالارىن وتكىزۋدى جوسپارلاپ وتىر.
الماتىدا حالىقتىق كونستيتۋتسيانى قولدايتىن قالالىق كواليتسيانىڭ العاشقى وتىرىسى وتەدى
ايتا كەتسەك, كەشە استانا قالاسىندا قازاقستان رەسپۋبليكاسى پارلامەنتى ءماجىلىسىنىڭ توراعاسى, پارتيا توراعاسى ەرلان قوشانوۆتىڭ قاتىسۋىمەن ەلىمىزدىڭ جەتەكشى قوعامدىق-ساياسي كۇشتەرى «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» اتتى جالپىۇلتتىق كواليتسياعا بىرىكتى. كواليتسيا قۇرامىنا بەس جەتەكشى ساياسي پارتيا – «AMANAT», «اۋىل», «اق جول», «Respublica», «قازاقستان حالىق پارتياسى» جانە ميلليونداعان ازاماتتىڭ مۇددەسىن بىلدىرەتىن 300-دەن استام قوعامدىق ۇيىم ەندى.
بارلىق ساياسي كۇشتەر قابىلداناتىن جاڭا اتا زاڭ جوباسىنا ءبىراۋىزدان قولداۋ ءبىلدىرىپ وتىر. ۇسىنىلعان وزگەرىستەر مەن تولىقتىرۋلار كونستيتۋتسيانىڭ بارلىق بولىمدەرىن قامتىپ, 77 باپقا قاتىستى ەنگىزىلمەك. بۇل جالپى ءماتىننىڭ 84 پايىزىن قۇرايدى. جاڭا رەداكتسيا 11 ءبولىم مەن 96 باپتان تۇرادى (بۇرىن 9 ءبولىم, 99 باپ بولعان).
قالالىق كواليتسيا جۇمىسى الداعى رەفەرەندۋم قارساڭىندا قوعامدى توپتاستىرىپ, ءاربىر ازاماتتىڭ پىكىرىن ەسكەرۋگە جانە ەلدىڭ بولاشاعىنا قاتىستى ماڭىزدى شەشىمگە بەلسەندى قاتىسۋىنا باعىتتالماق.
