الماتى كۇندەرى الىس كورەيانىڭ تەگۋ قالاسىندا وتۋدە

كەشە تەگۋدە الماتىنىڭ مادەنيەت كۇندەرىنىڭ اشىلۋ سالتاناتى بولىپ ءوتتى.  راسىمگە الماتى قالاسىنىڭ اكىمى احمەتجان ەسىموۆ پەن تەگۋ قالاسىنىڭ مەرى كيم بۋم-يل قاتىستى. وسىناۋ مادەنيەت كۇن­دە­رىنىڭ اياسىندا ءارالۋان جانرداعى مۋزىكا سالالارى ارتىستەرىنىڭ قاتىسۋىمەن وتەتىن ۇلكەن گالا-كونتسەرت جوسپار­لانۋدا. مۇندا نۇرجامال ۇسەنباەۆا, اسىلبەك ەڭسەپوۆ, ايگۇل قوسانوۆا سىندى دارىندى ونەر يەلەرى, سونداي-اق “ارناۋ” دۋەتى, “سازگەن سازى” فولكلورلىق-ەتنوگرافيالىق ءانسامبلى جانە باسقالار ونەر كورسەتپەك. سو­نىمەن بىرگە وتاندىق دي­زاي­نەر­لەردىڭ ءساندى كيىمدەرى تانىس­تىرىلىپ, الماتى تۋرالى سۋرەت كورمەلەرى, قولدانبالى ونەر جانە كونە زەرگەرلىك بۇيىم­دار كورمەلەرى ۇيىمداستىرىلماق. الماتى مەن تەگۋ ارا­سىن­داعى باۋىرلاستىق باي­لا­نىس­تاردىڭ ورناتىلۋى تۋرالى كەلىسىمگە تاۋەلسىزدىكتىڭ سوناۋ اراي تاڭىندا, 1991 جىلى قول قويىلعاندىعىن ەسكە سالا كەتكەن ارتىق بولماس. تەگۋ اۋماعى ءھام حالقىنىڭ سانى جونىنەن كورەيا رەسپۋب­ل­ي­كاسىنىڭ اسا ءىرى قالالارىنىڭ ءبى­رىنەن سانالادى. ول ءارى ەكس­پورتقا شىعارىلاتىن تاۋارلار وندىرەتىن ورتالىقتاردىڭ ءبىرى بولىپ تابىلادى. قالادا ماشينا جاساۋ جانە مەتالل وڭدەۋ سالاسى جاقسى دامىعان. تەگۋدىڭ اتاعى شەتكە توقىما ونەركاسىبى ونىمدەرىن شىعارۋ ارقىلى دا شىققان. الداعى ۋاقىتتا ارۋ الماتى مەن تىندىرىمدى تەگۋ اراسىنداعى بايلانىستاردىڭ جاڭا بەلەستەرگە كوتەرىلەتىنىنە كۇمان جوق. قورعانبەك امانجول.