ەستافەتا

وبلىستىق حالىق شىعار­ما­شىلىعى ءۇيىنىڭ مۇرىندىق  بولۋىمەن قازاق حاندىعىنىڭ 550 جىلدىعىنا, ۇلى جەڭىستىڭ 70 جىلدىعىنا, كەڭەس وداعىنىڭ باتىرى ءاليا مولداعۇلوۆانىڭ 90 جىلدىعىنا جانە قازاقستان حالقى اسسامبلەياسى مەن ەلىمىزدىڭ اتا زاڭىنىڭ 20 جىلدىعىنا ارنالعان «ونەرىم – مەرەيىم» اتتى ەستافەتاسى  باستاۋ الدى. بۇل مادەني شارا وسىمەن ءۇشىنشى رەت ۇيىمداستىرىلىپ وتىر.  ونەر ەستافەتاسىنىڭ  ماقساتى مادەنيەت جانە ونەر مەكەمەلەرى اراسىندا شىعارماشىلىق بايلانىستى دامىتۋ, ءوزارا تاجىريبە الماسۋ جانە مادەنيەت قىزمەتكەرلەرىنىڭ كاسىبي دەڭگەيى مەن مارتەبەسىن كوتەرۋ بولىپ تابىلادى. ونەر ەستافەتاسى ەكى اي ءىشىن­دە وبلىستىڭ ءبىر اۋدانىنان كە­لەسى اۋدانىنا اۋىسىپ, ۇلكەن شىعارماشىلىق شەبەرلىك  شىڭداۋ جولىنان وتەدى. ەستافەتا بارىسىندا ءار اۋدان وزدەرىنىڭ اۋداندىق مادەنيەت ۇيلەرى مەن اۋىلدىق كلۋبتارىنىڭ سۋرەتتەرىن «قۇرمەت كىتابىنا» ەنگىزىپ, كەلەسى اۋدانعا تاپسىرىپ وتىرادى. ونەر ەستافەتاسى العاش وتكىزىلگەن جىلى «قۇرمەت كىتابىنا» وبلىستىڭ مادەنيەتى مەن ونەرىنىڭ دامۋىنا ۇلەسىن قوسقان تۇلعالاردىڭ سۋرەتتەرى ەنسە, ال كەلەسى جىلى شىعارماشىل ۇجىمداردىڭ سۋرەتتەرى بەرىلەدى. وسى  جولى  وبلىستىق حا­لىق شىعارماشىلىعى ءۇيىنىڭ انشىلەرى, جىرشى-تەرمەشىلەرى نۇرگۇل جۇماعۇلوۆا, قۋانىشكۇل سەرىكباەۆا, قۇرالاي الەنوۆا, حالىقتىق جانە ۇلگىلى اتاقتارى بار بي ۇجىمدارى العا اۋداندىق مادەنيەت ۇيىندە اۋىل تۇرعىندارىنا ونەر كورسەتتى. بۇل شاراعا اۋدان ونەرپازدارى دا قاتىسىپ, كورەرمەندەرگە ءان مەن بيدەن شاشۋ شاشتى, كۇيمەن كوڭىلدەرىن كوتەردى. شارا بارىسىندا وبلىس­تىق حالىق شىعارماشىلىعى ءۇيى ديرەكتورىنىڭ ورىنباسارى ءسانيا جارىقوۆا ەستافەتانىڭ سيمۆولى «قۇرمەت كىتابىن» وسى اۋداننىڭ مادەنيەت جانە تىلدەردى دامىتۋ ءبولىمىنىڭ باسشىسى بەكجان اپپازوۆقا تابىستادى. مۇنداي ونەردەگى ومىرشەڭ بايلانىستىڭ شىعارماشىلىقتى دامىتۋعا ىقپال ەتەتىنى ءسوزسىز. سوندىقتان دا بولار, سوڭعى جىلدارى وڭىردە ونەردىڭ قاي سالاسىنىڭ دامۋى ايقىن اڭعارىلادى, وعان جىل سا­يىن اقتوبە وڭىرىندە ونەردىڭ الۋان سالاسىنان بايقاۋ-كونكۋرستاردىڭ, فەستيۆالداردىڭ ارتا ءتۇسۋى دالەل بولا الادى. سونداي-اق, ءتۇرلى بايقاۋلارعا اۋداننان شىققان ونەرپازدار قاتىسىپ, ولجالى ورالىپ ءجۇر. مىنە, وسىنداي الىس اۋىلدارداعى ونەر يەلەرىنىڭ  شەبەرلىگىن شىڭداپ, تالانتىن اشاتىن مادەني شارالاردىڭ اراسىندا «ونەرىم – مەرەيىم» اتتى ونەر ەستافەتاسىنىڭ الار ورنى ايرىقشا. ساتىبالدى ءساۋىرباي, «ەگەمەن قازاقستان». اقتوبە وبلىسى.