سپورتتى دامىتۋ باستى نازاردا

مەملەكەتتىك حاتشى گۇلشارا ابدىقالىقوۆا حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەردى قابىلدادى. بۇل كەزدەسۋ ۇستىمىزدەگى جىلى استانادا وتەتىن دزيۋدودان الەم چەمپيوناتى اياسىندا ورىن الىپ وتىر. مەملەكەتتىك حاتشى الەم چەمپيوناتىن وتكىزۋدى بەلگىلەۋ كەزىندە ەلىمىزگە تاڭداۋ جاساعانى ءۇشىن حالىقارالىق دزيۋدو فەدەراتسياسى باسشىسىنا ريزاشىلىعىن ءبىلدىردى. جانە قازاقستاندا سپورتتىڭ بارلىق تۇرىنە قىزىعۋشىلىق ارتىپ كەلە جاتقاندىعى دا اتالدى. سونىڭ جارقىن دالەلى رەتىندە جاقىندا پايدالانۋعا بەرىلگەن مۇز سارايىن اتاۋعا بولادى. «ەلىمىزدە جىل سايىن جاڭا سپورت نىساندارى پايدالانۋعا بەرىلۋدە. ونىڭ ۇستىنە كەلەسى جىل وليمپيادا وتەتىن جىل بولعان­دىقتان, سپورتتىڭ بارلىق تۇرىنەن دايىندىق باستالىپ تا كەتتى. جالپى, قازاقستاندا كوپتەگەن سپورت تۇرلەرىنەن جارىستار وتكىزىلىپ كەلەدى», – دەدى مەملەكەتتىك حاتشى. قازىرگى تاڭدا دزيۋدو ەلىمىزدەگى ەڭ تانىمال سپورت تۇرلەرىنىڭ ءبىرى بولسا, ونىمەن 80 مىڭنان استام قازاقستاندىق تۇراقتى تۇردە اينالىسادى. ەل پرەزيدەنتى نۇرسۇلتان نازارباەۆ دەنە تاربيەسىنە, بۇقارالىق سپورتقا جانە بۇل سالاداعى جوعارى جەتىستىكتەرگە ايرىقشا ءمان بەرەتىنىن اتاي كەلە, گۇلشارا ابدىقالىقوۆا بۇگىندە حالىقارالىق تالاپتارعا ساي سپورتتىق نىساندار بوي كوتەرۋدە جانە الەمدىك دەڭگەيدەگى سپورتتىق شارالار وتكىزىلۋدە ەكەندىگىن اتاپ ءوتتى. حالىقارالىق دزيۋدو فەدەرا­تسياسىنىڭ پرەزيدەنتى م.ۆيزەر دوداعا الەمنىڭ كوپتەگەن ەلدەرىنەن سپورتشىلار كەلىپ قاتىسسا, وسىنداي سپورت تۇرلەرىنىڭ جانكۇيەرلەرى قازاقستانعا نازار سالاتىنى اتاپ ءوتىلدى. مەيماننىڭ ايتۋىنشا, قازىر ەلىمىزدە مەكتەپ وقۋشىلارى مەن بالالارعا ارنالعان «مەكتەپ­تەگى دزيۋدو» جوباسى ازىرلەنۋدە. اتال­عان جوبانى قارجىلاندىرۋ حالىقارالىق دزيۋدو فەدەراتسياسى تاراپىنان جۇرگىزىلمەك. رەتىنە قاراي, تاۋەلسىزدىكتەن بەرگى كەزەڭدە ەل دزيۋدوشىلارى وليمپيادا ويىندارىندا 1 كۇمىس مەدال السا, الەم چەمپيوناتتارىندا – 1 التىن, 2 كۇمىس جانە 3 قولا مەدال, ازيا ويىندارىندا – 32 مەدال, ونىڭ ىشىندە 1 التىن, 10 كۇمىس جانە 21 قولا العان. اسقار تۇراپباي ۇلى, «ەگەمەن قازاقستان».