اقتوبەدە فۋتبول بيلەتتەرى عالامتور ارقىلى ساتىلا باستادى

اقتوبە. 30 ماۋسىم. ەندى كەز كەلگەن اقتوبەلىك, ءتىپتى قالا قوناعى قوبىلاندى باتىر اتىنداعى ورتالىق ستاديوندا وتەتىن تەڭبىل دوپ دوداسىنا بيلەتتەردى ۇيدەن شىقپاي-اق, عالامتور ارقىلى ساتىپ الا الادى. بۇل تۋرالى egemen.kz ءتىلشىسى حابارلادى. ينتەرنەتتىڭ وسىناۋ يگىلىگى 30 ماۋسىم كۇنى ىسكە قوسىلدى. قوبىلاندى باتىر اتىنداعى ورتالىق ستاديوننىڭ ديرەكتورى قاجىمۇقان دەمەۋوۆتىڭ ايتۋىنشا, اتالعان ەلەكتروندىق جۇيەنىڭ ءوزى ءبىر جىلعا جۋىق ۋاقىت ارالىعىندا جاسالعان. جان-جاقتى سىناقتان وتكەن جاڭا جوباعا سايكەس, ەندى عالامتور قولدانۋشىسى www.aktobe-stadion.kz سايتىنا كىرىپ, ارتىنشا وندا تىركەلگەننەن كەيىن بيلەتتى ساتىپ الا الادى. عالامتور سايتتارىندا ءار قولدانۋشىعا ءبىر-ءبىر بيلەتتەن ساتىلادى. تيىسىنشە, ونىڭ بارلىق جەكە مالىمەتتەرى جۇيەگە ءتۇسىپ تۇرادى. كەيىن الدا-جالدا الگى ادام ءتارتىپ بۇزسا, بولماسا مۇلدە كەلمەي قالسا, ءبارى بەلگىلى بولىپ وتىرادى. ستاديوننىڭ جانكۇيەرلەر وتىراتىن بولىگىنە دە بەينەكامەرا قويىلادى. ونلاين-ساتىلىمدى جۇرگىزۋ ءۇشىن سايتقا تىركەلۋ قاجەت. ول ءۇشىن ءار ادام جىلىنا 200 تەڭگە تولەۋى ءتيىس. ساتىبالدى ءساۋىرباي. دەرەك, سۋرەت: egemen.kz.