«تسيفرلىق مەملەكەت قۇرۋ ماسەلەسىنە ايرىقشا كوڭىل ءبولۋ كەرەك. بۇل قازاقستاننىڭ بولاشاعىنا تىكەلەي اسەر ەتەدى. سوندىقتان جۇمىسقا سەلقوس قاراپ, جايباراقات جۇرۋگە بولمايدى. ايتپەسە, قولداعى مۇمكىندىكتەن ايىرىلىپ قالامىز», دەدى پرەزيدەنت.
مەملەكەت باسشىسىنىڭ ايتۋىنشا, تسيفرلىق تاسىلدەر ارتىق شىعىندى قىسقارتىپ, اكىمشىلىك كەدەرگىلەردى ازايتۋعا مۇمكىندىك بەرەدى. سونىمەن قاتار باسقارۋداعى ءتيىمسىز شەشىمدەردى بارىنشا ازايتۋعا جول اشادى. بۇل ۇدەرىستىڭ وزەگىندە جاساندى ينتەللەكت تۇرۋى ءتيىس.
«جاساندى ينتەللەكتىنى تولىققاندى ەنگىزۋ بۇكىل تسيفرلاندىرۋ ساياساتىنىڭ وزەگى بولۋعا ءتيىس. جاساندى ينتەللەكتىگە نەگىزدەلگەن اسا ماڭىزدى تسيفرلىق جوبالاردى جۇزەگە اسىرۋ ماسەلەسىن ايرىقشا نازاردا ۇستاۋ كەرەك», دەدى قاسىم-جومارت توقاەۆ.
توقاەۆ: جاساندى ينتەللەكتىنى پايدالانۋ ءۇشىن ءتيىستى زاڭنامالىق نەگىز قالىپتاستىرۋ مىندەت
پرەزيدەنت ۇكىمەتكە مۇنداي جوبالاردى تولىق ءارى ۋاقتىلى قارجىلاندىرۋ ءۇشىن نەگىزگى باسىمدىقتاردى ناقتى ايقىنداۋدى تاپسىردى. ايتپەسە, اۋقىمدى جوسپارلاردىڭ قاعاز جۇزىندە قالىپ قويۋ قاۋپى بار ەكەنىن قاداپ ايتتى.
سونىمەن قاتار مەملەكەت باسشىسى تسيفرلاندىرۋعا قاتىستى ءفورماليزمدى سىنعا الدى. ونىڭ ايتۋىنشا, كەي جاعدايدا ۇكىمەت مۇشەلەرى مەن اكىمدەر سالالارداعى كەمشىلىكتەردىڭ ءبارىن جاپپاي تسيفرلاندىرۋمەن «جابۋعا» تىرىسادى.
«جاپپاي تسيفرلاندىرۋ ەنگىزىلسە, بارلىق ولقىلىق وزدىگىنەن جويىلادى دەيدى. بۇل ارادا نە ايتۋعا بولادى؟ ادامدار ءوزىن قورعاۋدىڭ, باسىن اراشالاپ الۋدىڭ نەبىر قۇيتىرقى ءادىسىن تابادى», دەدى پرەزيدەنت.
قاسىم-جومارت توقاەۆ ساپالى تسيفرلىق دامۋ ۇدەرىسىن جەكە سەكتورمەن تىعىز بايلانىستا قاراستىرۋ قاجەت ەكەنىن اتاپ ءوتتى. ۇكىمەت بيزنەسكە تسيفرلىق تاسىلدەردى ەنگىزۋگە مۇمكىندىك بەرەتىن ناقتى قولداۋ شارالارىن ازىرلەۋى ءتيىس.
مەملەكەت كورسەتەتىن قىزمەتتەردى تسيفرلاندىرۋ جانە مەملەكەتتىك دەرەكقورلاردى ءوزارا كىرىكتىرۋ جۇمىستارى ءجۇرىپ جاتقانىمەن, مالىمەتتەردى باسقارۋ ءىسىنىڭ ساپاسى ءالى دە كوڭىل كونشىتپەيدى. وسىعان بايلانىستى پرەزيدەنت دەرەكتەردى مەملەكەتتىڭ ستراتەگيالىق رەسۋرسى رەتىندە باسقارۋعا كوشۋدىڭ ماڭىزىن اتاپ ءوتتى.
«بىرىڭعاي ستاندارت ەنگىزىپ, مالىمەتتەردى مەملەكەتتىڭ ستراتەگيالىق رەسۋرسى رەتىندە باسقارۋعا كوشۋ وتە ماڭىزدى. ۇكىمەتكە ستراتەگيالىق جوسپارلاۋ جانە رەفورمالار اگەنتتىگىمەن, سونداي-اق ۇلتتىق بانكپەن بىرلەسىپ جىل سوڭىنا دەيىن مەملەكەتتىك مالىمەتتەردى باسقارۋدىڭ ءبىرتۇتاس جۇيەسىن قۇرۋدى تاپسىرامىن», دەدى مەملەكەت باسشىسى.
پرەزيدەنت سوڭعى ۋاقىتتا مەملەكەتتىك تسيفرلىق جۇيەلەردىڭ ءجيى ىستەن شىعۋىن ءىت-شەشىمدەردىڭ ەسكىرۋىمەن جانە باسقارۋ ساپاسىنىڭ تومەندىگىمەن بايلانىستىردى. مۇنداي ولقىلىقتار مەملەكەتتىڭ بيزنەس پەن ازاماتتارمەن قارىم-قاتىناسىنا كەرى اسەر ەتەتىنىن ايتتى.
تسيفرلىق ترانسفورماتسيانىڭ بارلىعى QazTech پلاتفورماسىنىڭ نەگىزىندە جۇرگىزىلۋى ءتيىس. وسىعان بايلانىستى ۇكىمەت بىرىڭعاي تسيفرلىق پلاتفورماعا كوشۋدى قامتاماسىز ەتۋى قاجەت.
ەلىمىزدە بارلىق مەملەكەتتىك قىزمەت ءبىر پلاتفورماعا كوشىرىلەدى
پرەزيدەنت ۆەدومستۆولاردىڭ تسيفرلاندىرۋمەن ۇزاق ۋاقىت بويى باقىلاۋسىز, ارقايسىسى ءوز بەتىنشە اينالىسقانىن سىنعا الىپ, بۇل قازىنا قارجىسىنىڭ ءتيىمسىز جۇمسالۋىنا اكەلگەنىن اتاپ ءوتتى. باس پروكۋراتۋرادا وتكەن جيىندا شاشىراڭقى جۇيەلەردى بىرىكتىرۋگە قاجەت قارجى كولەمى جاريالانعانىن دا ەسكە سالدى.
«باسىن اشىپ ايتايىن, مۇنداي اقشا جۇمسالۋى مۇمكىن ەمەس. اقشاسى بولسا, عيماراتتى اقىماق تا سالادى, ال وسى مىندەتتى قارجىسىز شەشۋگە شەبەرلىك قاجەت. ال شەبەرلىكتەرىڭىزدى كورسەتىڭىزدەر. ۇكىمەت بيۋدجەتتەن قىرۋار قاراجات شىعىنداماي, تاپسىرمانى ورىنداۋدىڭ جوسپارىن ۇسىنۋعا ءتيىس», دەدى قاسىم-جومارت توقاەۆ.
مەملەكەت باسشىسى تسيفرلىق جاڭعىرۋ تەك تەحنولوگيالىق ەمەس, باسقارۋشىلىق جاۋاپكەرشىلىك پەن ناقتى ناتيجەگە نەگىزدەلۋى ءتيىس ەكەنىن تاعى ءبىر مارتە قاداپ ايتتى.
