پرەزيدەنتتىڭ ايتۋىنشا قارجىنى قازىنادان الىپ, ونى ينۆەستيتسيا دەپ كورسەتە سالۋ الدەقايدا وڭاي. اۋىردىڭ ۇستىمەن, جەڭىلدىڭ استىمەن جۇرمەي, نارىقتىق ەكونوميكا قاعيداتتارىنا باعىنۋ قاجەت.
«بىزگە جاڭا ءارى ساپالى ينۆەستيتسيا تارتۋعا ارنالعان ءبىرتۇتاس ستراتەگيا قاجەت. بۇل ستراتەگيادا, ەڭ الدىمەن, جوعارى تەحنولوگياسى بار زاماناۋي وندىرىستەر اشۋعا باسىمدىق بەرىلۋگە ءتيىس. وسى تۇرعىدان العاندا, جەكە بيزنەس ايرىقشا ءرول اتقارادى. كاسىپكەرلەر ەكونوميكامىزعا ساپالى ينۆەستيتسيا سالۋ ارقىلى جۇمىس ورىندارىن اشادى, جۇرتتىڭ تابىسىن ارتتىرۋعا ۇلەس قوسادى.
ءبىز «بايتەرەكتى» ينۆەستيتسيالىق حولدينگ رەتىندە قايتا قۇردىق. مۇنداي قادامنىڭ ناقتى سەبەبى بولدى. حولدينگ نارىقتىق ەكونوميكاعا سەرپىن بەرۋدە, بىراق بۇل قادام جەكە باستامالاردى شەكتەمەۋگە ءتيىس. «سامۇرىق-قازىنا» قورىنا دا ءدال وسىنداي تالاپ قويىلادى.
«سامۇرىق-قازىنا» قورى جانە ۇلتتىق كومپانيالاردىڭ باسشىلارىمەن قاتاڭ اڭگىمە بولدى. كومپانيالاردىڭ قۇرىلىمىن تۇبەگەيلى قايتا قاراپ, جاڭا زامانعا بەيىمدەۋ كەرەك. قوسشىدان باسشى كوپ. باسشىلىق قۇرامى ەل ايتىپ جۇرگەندەي «سول جاعالاۋدىڭ» ادامدارىنا تولىپ قالعان. ولاردىڭ جۇمىسقا كومىلىپ جاتقان ەشتەڭەسى جوق. كەيدە نە ىستەرىن بىلمەي, الەۋمەتتىك جەلىلەردە اركىممەن پىكىر تالاستىرىپ وتىرادى. بۇل ءتۇبى جاقسىلىققا اپارمايدى», دەدى پرەزيدەنت.
توقاەۆ ۇكىمەتكە ءۇي شارۋاشىلىقتارىنىڭ الەۋمەتتىك تسيفرلىق ءپروفيلىن قالىپتاستىرۋدى تاپسىردى
مەملەكەت باسشىسى ينفلياتسيا دەڭگەيى تۇراقتالىپ, تومەندەگەننەن كەيىن نارىق قاعيداتتارىن كۇشەيتۋ كەرەك بولاتىنىن اتاپ ءوتتى.
«دامۋ ينستيتۋتتارى بيزنەسپەن جانە قارجى سەكتورىمەن ءتيىمدى قارىم-قاتىناس ورناتىپ, بۇل قاتىناس باسەكەلەستىككە ەمەس, ءوزارا سەرىكتەستىككە نەگىزدەلۋى كەرەك. ەلىمىزدە ينۆەستورلاردىڭ قىزىعۋشىلىعىن ارتتىراتىن سالالار كوپ. وسى سالالاردى دامىتۋ ءۇشىن مەملەكەت پەن بيزنەس اراسىندا سىندارلى ىنتىماقتاستىق بولۋعا ءتيىس. اسىرەسە, سيرەك كەزدەسەتىن مەتالدار, مۇناي-گاز حيمياسى, تسيفرلىق ينفراقۇرىلىم, جاڭارتىلاتىن ەنەرگيا كوزدەرى, كولىك جانە اگرووڭدەۋ سالالارىنا باسا ءمان بەرگەن ءجون.
مىسالى, قازىر تەحنولوگيالار قارقىندى دامىپ جاتقان كەزدە اسا قاجەتتى ماتەريالدارعا, ياعني, سيرەك مەتالدارعا سۇرانىس كۇرت ارتىپ كەلەدى. قازاقستاندا مۇنداي جوبالاردى جۇزەگە اسىرۋعا باتىس ەلدەرى جانە باسقا دا دامىعان مەملەكەتتەردىڭ ينۆەستورلارى زور قىزىعۋشىلىق تانىتىپ وتىر. بۇل – قازاقستاننىڭ جاھاندىق باسەكەدەگى ارتىقشىلىعى. وسى ارتىقشىلىقتى ءتيىمدى پايدالانۋىمىز كەرەك, ونى ەل يگىلىگىنە جاراتۋ قاجەت», دەدى مەملەكەت باسشىسى.
الايدا ينۆەستورلارمەن جۇمىستىڭ قازىرگى تاسىلدەرى ساپالى ينۆەستيتسيا تارتۋعا كەدەرگى كەلتىرىپ وتىر. قاعازباستىلىق ءالى كوپ, ءبىر مىندەت بىرنەشە ورگانعا قاتار جۇكتەلگەن.
«ينۆەستيتسيالىق شتاب رومان سكلياردىڭ ارقاسىندا ءوز جۇمىسىن جالپى ءتيىمدى اتقارىپ وتىر. كوپ نارسە ءبىرىنشى باسشىعا بايلانىستى. ولار ينۆەستيتسيالىق جوبالاردىڭ ءتيىمدى جۇزەگە اسىرىلۋىن قامتاماسىز ەتۋگە ءتيىس. جوبا ىسكە قوسىلعاننان كەيىن دە ينۆەستورعا قولداۋ كورسەتە بەرۋ كەرەك. جۇمىس بارىسىنا ۇنەمى مونيتورينگ جۇرگىزىپ, اكىمشىلىك كەدەرگىلەرگە جول بەرمەۋ قاجەت. مەن ينۆەستيتسيالار ماسەلەسىمەن اينالىساتىن ارنايى كومەكشىنى تاعايىندادىم. شەتەلدىك نەمەسە وتاندىق ينۆەستورلاردىڭ سۇراقتارى بولسا, مۇرات نۇرتىلەۋگە Focal point رەتىندە شاعىمدانۋعا بولادى.
ال حالىقارالىق قارجى ينستيتۋتتارىمەن ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى – پرەزيدەنتتىڭ كەڭەسشىسى اسەت ەرعاليەۆ بايلانىستا بولادى. ينۆەستيتسيالىق جوبالاردى جۇزەگە اسىرۋعا مۇمكىندىك بەرەتىن ماڭىزدى ءتاسىلدىڭ ءبىرى – ۇزاق مەرزىمگە ارنالعان وفتەيك-كەلىسىمشارتتار جاساۋ. بىراق قازىر ەلىمىزدە مۇنداي كەلىسىمشارت جاساۋدىڭ بىرىڭعاي ءارى تۇسىنىكتى ەرەجەسى جوق. ونىڭ ۇستىنە, مەملەكەتتىك ورگاندار سەلقوستىق تانىتۋدا. سونىڭ سالدارىنان ستراتەگيالىق ماڭىزى بار بىرقاتار ينۆەستيتسيالىق جوبا ىسكە اسپاي جاتىر.
ۇكىمەت پەن باسەكەلەستىكتى قورعاۋ جانە دامىتۋ اگەنتتىگىنە وسى ماسەلەنى شەشۋ ءۇشىن ءتيىمدى شارالار قابىلداۋدى تاپسىرامىن», دەدى قاسىم-جومارت توقاەۆ.
ۇلتتىق انتيفرود-ورتالىعى 90 مىڭ ازاماتتى الاياقتاردىڭ ارباۋىنان ساقتاپ قالدى
