كومپانيا مالىمەتىنشە, بارلىق جولاۋشىلار پويىزدارىنىڭ جولسەرىكتەرى العاشقى مەديتسينالىق كومەك كورسەتۋ بويىنشا ارنايى دايارلىقتان وتكەن, ال ءار قۇرام مەديتسينالىق قوبديشامەن تولىق جابدىقتالعان. سوندىقتان دەنساۋلىققا قاتىستى كۇتپەگەن جاعداي تۋىنداسا, ەڭ اۋەلى جولسەرىكتىڭ كومەگىنە جۇگىنگەن ءجون.
25% جانە 33% جەڭىلدىك: زەينەتكەرلەر مەن جاستار ءۇشىن پويىز بيلەتى ارزاندايدى
جول ۇستىندە جولاۋشى ءوزىن جايسىز سەزىنگەن جاعدايدا الدىمەن ۆاگون جولسەرىگىنە دەرەۋ حابارلاۋ قاجەت. جولسەرىك جولاۋشىنىڭ جاعدايىن باعالاپ, ءوز قۇزىرەتى شەڭبەرىندە العاشقى كومەك كورسەتەدى. ەگەر قوسىمشا شارا كەرەك بولسا, ول پويىز باستىعىن حاباردار ەتەدى. پويىز باستىعى مەديتسينالىق قىزمەتتەرمەن بايلانىس ورناتىپ, جاعدايعا ساي شەشىم قابىلدايدى.
شۇعىل جاعداي تۋىنداعان كەزدە جەدەل جاردەم شاقىرىلادى. قاجەت بولسا, پويىزدى جاقىن ستانتسيادا مەديتسينا قىزمەتكەرلەرى قارسى الادى نەمەسە بەلگىلەنگەن تارتىپكە ساي جوسپاردان تىس توقتاۋ جاسالۋى مۇمكىن. مۇنداي شەشىم جولاۋشىنىڭ ءومىرى مەن دەنساۋلىعىن ساقتاۋ ماقساتىندا قابىلدانادى.
ۇلتتىق تاسىمالداۋشى سوزىلمالى اۋرۋى بار جولاۋشىلارعا جەكە ءدارى-دارمەكتەرىن وزىمەن بىرگە الىپ ءجۇرۋدى جانە ىقتيمال قاۋىپتەر تۋرالى جولسەرىكتى الدىن الا ەسكەرتكەن دۇرىس ەكەنىن اتاپ وتەدى. بۇل كۇتپەگەن جاعدايدىڭ الدىن الىپ, كومەك كورسەتۋدى جەدەلدەتەدى.
پويىزداردا توتەنشە جاعدايلار تەك دەنساۋلىقتىڭ ناشارلاۋىمەن شەكتەلمەيدى. پويىز بريگادالارىنىڭ تاجىريبەسىندە ءتۇرلى وقيعالار كەزدەسەدى, ونىڭ ىشىندە ساپار بارىسىندا بوسانۋ جاعدايلارى دا بار. سوڭعى ءۇش جىلدا ۇلتتىق تاسىمالداۋشى پويىزدارىندا جولسەرىكتەر مەن پويىز باستىقتارىنىڭ قولداۋىمەن شامامەن 15 ءسابي دۇنيەگە كەلگەن.
پويىزدا بوسانعان جولاۋشى جولسەرىككە ءبىر جىلدان سوڭ العىسىن ءبىلدىردى
كومپانيا جولاۋشىلاردىڭ قاۋىپسىزدىگى مەن دەنساۋلىعى ءاردايىم باستى نازاردا ەكەنىن ايتادى. وسى ورايدا جولاۋشىلاردى ءوز دەنساۋلىعىنا جاۋاپكەرشىلىكپەن قاراپ, قاجەت كەزدە قىسىلماي كومەك سۇراۋعا شاقىرادى.
