بارىس قاقپانعا ءتۇسىپ قالدى

كليماتتىق جاعدايى ءشولدى بولىپ سانالاتىن ماڭعىستاۋ وڭىرىندە بارىستىڭ كەزىگۋى جۇرتشىلىق تاراپىنان قىزىعۋشىلىق تۋدىرۋدا. اتالمىش وقيعا مەن قاقپاندا ءولىپ جاتقان بارىستىڭ سۋرەتىن Sayat Lucky ەسىمدى ازامات Facebook الەۋمەتتىك جەلىسىندەگى جەكە پاراقشاسىندا حابارلاعان. قاراقيا اۋدانىنىڭ قۇرىق اۋىلى ماڭىن­داعى شارۋا قوجالىقتارىنىڭ مالىنا شاۋىپ تىنىم بەرمەگەن اڭدى قولعا ءتۇسىرۋ ءۇشىن شوپاندار قاقپان قۇرىپ تاستايدى. ولار, ارينە, مالعا شاۋىپ جۇرگەن جىرتقىشتى قاسقىر دەپ ويلايدى. الايدا, بىرنەشە كۇننەن سوڭ, ايدالاداعى قاقپاندى كورۋگە بارعان شوپاندار وندا ءولىپ جاتقان بارىستى كورەدى. دەرەك كوزدەرى ەلىمىزدە مىسىق تۇقىمداس بۇل اڭنىڭ سەگىز ءتۇرى تارالعاندىعىن ايتادى. ولاردىڭ ىشىندە قابىلان, قامىس جانە شاعىل مىسىقتارى, سابانشى, قاراقۇلاق شولەيتتى, ءشولدى, دالالى-ايماقتاردى مەكەندەسە, سىلەۋسىن تاۋلى القاپتارداعى ورمان ىشىندە, ءىلبىس, ياعني قار بارىسى بيىك تاۋلى وڭىردە كەزدەسەدى. نەگىزىندە ورماندى ايماقتا جۇرەتىن مىسىق تۇقىمداس بارىس (لەوپارد) بۇرىن ورتالىق ازيادا تىرشىلىك ەتكەنمەن, كەيىنگى كەزدەرى ول جويىلىپ كەتكەن دەپ سانالىپ كەلگەن بولاتىن. بىراق, اياعىن قاقپان قاۋىپ, مەرت بولعان تارعىل بارىس جەرگىلىكتى تۇرعىنداردى تاڭعالدىرىپ وتىر. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.