اۋىل شارۋاشىلىعى ەڭبەككەرلەرى كەيىنگى جىلدارى ەگىس قۇرىلىمىن ارتاراپتاندىرۋعا ايرىقشا كوڭىل ءبولىپ كەلەدى. كەيىنگى ءۇش جىلدا مايلى داقىلداردىڭ كولەمى التى ەسەگە كوبەيىپ, 715 مىڭ گەكتاردان استى. مال ازىعى داقىلدارىنا دا جەتكىلىكتى نازار اۋدارىلىپ وتىر. بۇل ماقساتتاعى داقىلدار 166,5 مىڭ گەكتار القاپقا ورنالاستىرىلسا, كارتوپ پەن كوكونىس القاپتارىنىڭ كولەمى دە كەڭەيە تۇسۋدە.
«جاۋاپتى ناۋقاندا ۇيىمشىلدىقپەن وتكىزۋگە ديقان مەحانيزاتورلاردىڭ كۇش-جىگەرلەرىن جۇمىلدىرۋمەن قاتار ماتەريالدىق-تەحنيكالىق بازانىڭ قاپىسىز دايىندىعى سەپتىگىن تيگىزدى. ەگىستىك القاپتاردىڭ قۇنارىن جاقسارتۋ ماقساتىندا 330 مىڭ توننا مينەرالدى تىڭايتقىش پايدالانىلدى. اۋىل شارۋاشىلىعى قۇرىلىمدارى وسىمدىكتەردى قورعاۋ قۇرالدارىمەن تولىق قامتىلعان», دەيدى وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى نۇربەك بادىراقوۆ.
كەيىنگى جىلدارى رەكوردتىق ءونىم الىپ, ماڭداي تەرلەرىنىڭ وتەۋىن كورىپ جۇرگەن ديقاندار بيىل دا ءۇمىتتى. كوكتەم جاۋىن-شاشىندى بولدى. جەردە ءنار بار. ال بار جۇمىستىڭ تولايىم اتقارىلۋى مەملەكەتتىك كومەككە دە بايلانىستى. اگرارشىلاردى قولداۋعا جەڭىلدەتىلگەن نەسيە مەن سۋبسيديا تۇرىندە 235 ميلليارد تەڭگە قاراجات باعىتتالىپ وتىر. «كەڭ دالا – 2» كوكتەمگى ەگىس جانە ەگىن جيناۋ جۇمىستارىن جەڭىلدەتىلگەن نەسيەلەۋ باعدارلاماسى ارقىلى 840 اۋىل شارۋاشىلىعى قۇرىلىمى تاۋارىن وندىرۋشىلەرگە 122 ميلليارد تەڭگە قاراجات ءبولىندى.
ماشينا-تراكتور پاركىن جاڭالاۋ جۇمىسى ودان ءارى جالعاسىپ كەلەدى. جىل باسىنان بەرى ديقاندار 789 بىرلىك اۋىل شارۋاشىلىعى تەحنيكاسىن ساتىپ الدى. وتاندىق وندىرىستەگى اۋىل شارۋاشىلىعى تەحنيكاسىن جەڭىلدەتىلگەن ليزينگكە بەرۋ باعدارلاماسى اياسىندا «قازاگروقارجى» اكتسيونەرلىك قوعامى ارقىلى 610 تەحنيكا ساتىپ الۋ تۋرالى كەلىسىمشارت جاسالدى. قوسىمشا قولداۋدى «ازىق-ت ۇلىك كورپوراتسياسى» ۇك» اكتسيونەرلىك قوعامى ارقىلى جۇزەگە اسىراتىن فورۆاردتىق ساتىپ الۋ تەتىگى كورسەتىپ وتىر. بيىل جالپى كولەمى 4,2 ميلليارد تەڭگەگە 38 اۋىل شارۋاشىلىعى تاۋارىن وندىرۋشىمەن كەلىسىم-شارت جاسالدى. 3,3 ميلليارد تەڭگە كولەمىندەگى 55 ءوتىنىم قارجىلاندىرىلدى. بۇل 59 مىڭ توننا اۋىل شارۋاشىلىعى ءونىمىن جەتكىزۋدى قامتاماسىز ەتۋگە مۇمكىندىك بەرەدى.
كوكتەمگى ەگىس اياقتالعانىمەن اقىق ءدان ايالاعان ديقاندار كەلەسى ناۋقاندى باستاپ كەتتى.
اقمولا وبلىسى
