بىلتىر ءدال وسى تۋرنيردە اننا دانيلينا مەن سەربيالىق الەكساندرا كرۋنيچ جۇبى باس جۇلدەگە تالاسىپ, شەشۋشى سىندا يتاليالىق سارا ەرراني مەن جاسمين پاولينيگە ەسە جىبەرگەن ەدى. بيىل دا ولار سول مەجەگە جەتتى. باستاپقى باسەكەلەردە بارلىق قارسىلاسىنان باسىم ءتۇسىپ, جارتىلاي فينالدا سيۋكو اوياما (جاپونيا)/ليان ەنشۋونى (تايپەي) ەركىن ەڭسەرگەن ولار شەشۋشى سىندا كاتەرينا سينياكوۆا (چەحيا)/تەيلور تاۋنسەندتەن (اقش) ۇتىلدى. 1 ساعات 33 مينۋتقا سوزىلعان سايىس 2:6, 5:7 ەسەبىمەن اياقتالدى. قاتارىنان ەكىنشى جىل «رولان گارروستىڭ» فينالىندا ونەر كورسەتكەن اننا مەن الەكساندراعا جانكۇيەرلەر ءدان ريزا.
جەكەلەگەن سايىستا جەرلەستەرىمىز تىم سۇرەڭسىز ونەر كورسەتتى. دۇنيەجۇزىلىك رەيتينگىدە ۇزدىك وندىقتى تۇيىندەگەن الەكساندر بۋبليك تۇساۋكەسەر كەزدەسۋىندە اتر تىزىمىندە وزىنەن 70 ساتى تومەن تۇرعان گەرمانيالىق تەننيسشى يان-لەننارد شترۋفتىڭ الدىندا دارمەنسىزدىك تانىتتى. الەمنىڭ ەكىنشى راكەتكاسى ەلەنا رىباكينا ەكىنشى كەزەڭدە بۇرىندارى ەش كوزگە تۇسپەگەن ۋكراينانىڭ ورتاڭقول ويىنشىسى يۋليا ستارودۋبتسەۆادان ويدا جوقتا ۇتىلدى. سول سەكىلدى الەكساندر شەۆچەنكو مەن يۋليا پۋتينتسەۆا دا ۇزاققا شاپپادى.
جالپى, بيىلعى تۋرنير توسىن ناتيجەلەرگە تولى بولدى. ماسەلەن, العاشقى اينالىمدا دانيل مەدۆەدەۆ (اتر №8) ادام ۋولتوننان (97), دجەسسيكا پەگۋلا (WTA №5) كيمبەرلي بيررەلدەن (86), ليندا نوسكوۆا (WTA №12) ماريا ساككاريدەن (49) جەڭىلدى. ەكىنشى كەزەڭدە الەمنىڭ ءبىرىنشى راكەتكاسى ياننيك سيننەر حۋان-مانۋەل چەرۋندولوعا (26) ەسە جىبەرسە, وسى سپورت ءتۇرى تاريحىنداعى ەڭ اتاقتى ويىنشى, سەرب نوۆاك دجوكوۆيچ (اتر №4) برازيليالىق جۋان فونسەكاعا (30) جول بەردى. ىلە-شالا فونسەكا ايگىلى كاسپەر رۋدتى (14) قاپى قالدىردى. سونىمەن قاتار بەن شەلتون (اتر №5) رافاەل كوللينوننان (62), يگا شۆەنتەك (WTA №3) مارتا كوستيۋكتەن (15), كوكو گاۋفف (WTA №4) اناستاسيا پوتاپوۆادان (27) ۇتىلدى. بۇگىندە تورتكۇل دۇنيەنىڭ تەڭدەسسىز تەننيسشىسى دەپ تانىلىپ وتىرعان ارينا سوبولەنكو (WTA №1) شيرەك فينالدا ديانا شنايدەرگە (№23) ەسە جىبەردى.
سەنساتسيالار ودان كەيىن دە جالعاستى. ايەلدەردىڭ جارتىلاي فينالىندا الەمدىك رەيتينگىدە 114-ورىندا تۇرعان پولشالىق مايا حۆالينسكا رەسەيلىك ديانا شنايدەردى ۇتتى – 7:6, 6:4. رەسەيدىڭ تاعى ءبىر وكىلى ميررا اندرەەۆا ۋكراينالىق مارتا كوستيۋكتى قاپى قالدىردى – 6:1, 6:3. فينالدا اندرەەۆا حۆالينسكادان ايلاسىن اسىردى – 6:3, 6:2. ءسويتىپ, 19 جاستاعى ميررا «ۇلكەن دۋلىعى» تۋرنيرىندە تۇڭعىش رەت توپ جاردى.
ەرلەر اراسىندا جارتىلاي فينالدا الەمنىڭ ءۇشىنشى راكەتكاسى, گەرمانيالىق الەكساندر زۆەرەۆتىڭ چەحيالىق ياكۋب مەنشيكتەن (№27) مەرەيى ۇستەم بولدى – 7:5, 6:2, 3:6, 6:3. يتاليانىڭ قوس تەننيسشىسى – فلاۆيو كوبوللي (اتر №14) مەن ماتتەو ارنولدي (№104) اراسىنداعى ايقاستا ەكىنشى فيناليست انىقتالۋعا ءتيىس ەدى. الايدا اياقاستى سىرقاتتانىپ قالعان ارنولدي كورتقا شىقپادى.
باس جۇلدە باسەكەسى زۆەرەۆ پەن كوبوللي اراسىندا ءوتتى. بۇعان دەيىن ەكەۋى دە «ۇلكەن دۋلىعادا» دارالانباعان. ءار جىلدارى اقش, اۋستراليانىڭ اشىق بىرىنشىلىگى, «رولان گارروستىڭ» فينالىندا ويناعان الەكساندر ءۇش رەتتە دە جەڭىلىستىڭ كەرمەك ءدامىن تاتتى. فلاۆيونىڭ ەڭ زور تابىسى – بىلتىر «ۋيمبلدوننىڭ» شيرەك فينالىنا شىعۋى. پاريجدە قوس ساڭلاق ۇزاق تىرەستى. 4 ساعات 20 مينۋتقا سوزىلعان تارتىس 6:1, 4:6, 6:4, 6:7, 6:1 ەسەبىمەن نەمىس تەننيسشىسىنىڭ پايداسىنا شەشىلدى. ءسويتىپ, ا.زۆەرەۆ تۋرنير جەڭىمپازى اتاندى.
جۇلدە قورى 61 723 000 ەۋرونى قۇراعان جارىستىڭ جەكەلەي سايىستاعى جەڭىمپازدارى 2,8 ملن ولجالاسا, فينالدا ۇتىلعاندار سول سومانىڭ تەڭ جارتىسىن يەلەندى. جارتىلاي فينالعا جولداما العاندار 750 مىڭ, شيرەك فينالعا شىققاندار 470 مىڭ ەۋرو ەنشىلەدى. وزگە تەننيسشىلەر مىناداي مولشەردە سىياقى الدى: ءتورتىنشى كەزەڭ – 285 مىڭ ەۋرو (158 283 300 تەڭگە), ءۇشىنشى كەزەڭ – 187 مىڭ (103 856 060 تەڭگە), ەكىنشى كەزەڭ – 130 مىڭ (72 199 400 تەڭگە), ءبىرىنشى كەزەڭ 87 مىڭ (48 318 060 تەڭگە).
