تاراز قالاسىنا قاراستى قوڭىرتوبە تۇرعىن الابىندا «TRZ AGRO» جشس-نىڭ باستاماسىمەن سالىنعان جاڭا كوكونىس ساقتاۋ قويماسى پايدالانۋعا بەرىلدى. قويمانىڭ اشىلۋ سالتاناتىنا قاتىسقان ءوڭىر باسشىسى ەربول قاراشوكەەۆ اگروسەكتوردى وركەندەتۋ باعىتىندا اتقارىلىپ جاتقان جۇمىستارمەن تانىسىپ, كاسىپورىن ۇجىمىنىڭ قولعا العان جوبالارىنا ساتتىلىك تىلەدى.
رەسمي دەرەككە جۇگىنسەك, ىرگەلى جوبانىڭ قۇنى 1,8 ملرد تەڭگەنى قۇراپ وتىر. كوكونىس ساقتاۋ قويماسىنا 12 مىڭ توننا ءونىم ساقتاۋعا مۇمكىندىك بار. سولتۇستىك قازاقستان وبلىسىندا قولعا الىنعان ءتيىمدى تاجىريبەنى ەنگىزۋ ماقساتىندا مەملەكەت تاراپىنان 995 ملن تەڭگە كولەمىندە قولداۋ كورسەتىلىپتى. جاۋاپتى مامانداردىڭ ايتۋىنشا, وسى باعىتتاعى جۇمىستى ارمەن قاراي ساتىمەن جالعاستىرۋعا مۇمكىندىك مول كورىنەدى.
«بۇل كوكونىس قويماسى ۋاقىت سۇرانىسىنا ساي زاماناۋي تەحنولوگيالارمەن جابدىقتالعانىن ايتا كەتكەن ءلازىم. مۇنداعى قوندىرعىلار نيدەرلاند, يتاليا, رەسەي فەدەراتسياسى سەكىلدى ەلدەردەن جەتكىزىلگەن بولاتىن. ءبىز ءۇشىن كوكونىس ونىمدەرىنىڭ ساپاسىن ۇزاق ۋاقىت لايىقتى ساقتاۋدىڭ ماڭىزى زور. سول ءۇشىن نيدەرلاندىلىق تەحنولوگيانىڭ تاجىريبەسىنە ارقا سۇيەپ, ەدەن استى جەلدەتۋ جۇيەسىن قولدانىپ وتىرمىز. بۇل جۇيە قويمادا ساقتالاتىن كوكونىس ساپاسىنىڭ بۇزىلماۋىن قامتاماسىز ەتەدى. قىسقاسى, وزىق تاجىريبەلەردى ەنگىزۋ ارقىلى كوش باسىندا ءجۇرۋدى كوزدەدىك», دەيدى سەرىكتەستىك ديرەكتورىنىڭ ورىنباسارى ەرنار ساۋرانباەۆ.
مۇنداعى جۇمىس بارىسىمەن تانىسقان ءوڭىر باسشىسى ەربول قاراشوكەەۆ ەتتى تەرەڭدەتىپ وڭدەيتىن زاماناۋي كەشەن مەن جىل بويى ءۇزىلىسسىز جۇمىس ىستەيتىن جىلىجاي كەشەنى جوباسىنىڭ الەۋەتىن زەردەلەپ, ءوز ويىمەن ءبولىستى.
«TRZ AGRO» جشس ديرەكتورىنىڭ ورىنباسارى ەرنار ساۋرانباەۆتىڭ ايتۋىنشا, ەتتى تەرەڭ وڭدەۋ كەشەنىندە شيكىزات تولىق كادەگە جاراتىلىپ, ءوندىرىس قالدىقسىز تەحنولوگيا قاعيداتىمەن جۇزەگە اسىرىلادى. قازىرگى تاڭدا نىسان قۇرىلىسىنىڭ شامامەن 70 پايىزى اياقتالعان. كەشەن قۇرامىندا مال سويۋ جانە بولشەكتەۋ الاڭى, شۇجىق ءوندىرۋ, كونسەرۆىلەۋ تسەحتارى, سونداي-اق قايتا وڭدەلگەن ءونىم نەگىزىندە ءۇي جانۋارلارى مەن بالىقتارعا ارنالعان جەم شىعاراتىن تسەح جۇمىس ىستەيدى.
مۇنداعى جىلىجاي كەشەنىنىڭ ءبىرىنشى كەزەڭىنىڭ قۇرىلىسىن بيىل باستاۋ جوسپارلانىپ وتىر. جوبادا تەمپەراتۋرا مەن ىلعالدىلىقتى اۆتوماتتى تۇردە رەتتەيتىن جۇيەلەردى, ەنەرگيا ۇنەمدەيتىن تەحنولوگيالار مەن ءونىمدى قارقىندى ءوسىرۋ تاسىلدەرىن ەنگىزۋ كوزدەلگەن. بۇل جوعارى ونىمدىلىككە قول جەتكىزىپ, جىل بويى ساپالى ءونىم وندىرۋگە مۇمكىندىك بەرەدى.
ماماندار كەلتىرگەن دەرەككە سەنسەك, ءۇش جوبانى جۇزەگە اسىرۋ ارقىلى 300 جاڭا جۇمىس ورنىن اشۋ مۇمكىندىگى تۋادى. ونىڭ ىشىندە كوكونىس ساقتاۋ قويماسىندا 30-دان استام ادامدى ماۋسىمدىق جۇمىسپەن قامتۋعا مۇمكىندىك بار ەكەن.
«مۇنداي ىلكىمدى جوبالاردىڭ ءوڭىر ومىرىندە الاتىن ايرىقشا ورنى بار ەكەنىن اتاپ وتكەن ءجون. بىرىنشىدەن, ازىق-ت ۇلىك باعاسىن تۇراقتاندىرۋعا ايتارلىقتاي سەپتىگىن تيگىزەدى. ەكىنشىدەن, كوكونىس ساقتاۋ جانە وتكىزۋ جۇيەسىن جەتىلدىرۋگە, سونداي-اق اۋىل شارۋاشىلىعى ونىمدەرىنىڭ ساپاسى مەن ساقتاۋ مەرزىمىن ارتتىرۋعا ىقپال ەتەدى.
جالپى, وڭىردە قولعا الىنعان ءاربىر اۋقىمدى جوبا وبلىس الەۋەتىن ۇستەمەلەي تۇسەتىنى داۋسىز. سوندىقتان ەت وڭدەۋ كەشەنى مەن جىلىجاي قۇرىلىسىنىڭ جۇيەلى تۇردە جۇزەگە اسۋ ءۇشىن جەرگىلىكتى اتقارۋشى بيلىك وكىلدەرى جان-جاقتى قولداۋ كورسەتۋى كەرەك. سوندا عانا قولعا العان شارۋا ۋاقتىلى اياقتالادى», دەيدى ءوڭىر باسشىسى.
رەسمي دەرەككە جۇگىنسەك, جامبىل وبلىسى كوكونىس جانە باقشا داقىلدارىن ءوسىرۋ بويىنشا ەلىمىزدەگى جەتەكشى وڭىرلەردىڭ ءبىرى سانالادى. وبلىس رەسپۋبليكا مەن ىشكى نارىقتى كوكونىس ونىمدەرىمەن قامتاماسىز ەتىپ وتىر. نەگىزگى داقىلداردىڭ ءبىرى – پياز. بۇگىنگى كۇنى ءوڭىر ىشكى نارىقتىڭ پيازعا دەگەن سۇرانىسىن 100 پايىز قاناعاتتاندىرىپ وتىرعانىن ايتا كەتكەن ءلازىم.
ايماقتا جالپى سىيىمدىلىعى 374 مىڭ تونناعا جۋىق 123 كوكونىس ساقتاۋ قويماسى جۇمىس ىستەيدى. 2028 جىلعا قاراي بۇل كورسەتكىشتى 560 مىڭ تونناعا دەيىن جەتكىزۋ جوسپارلانعان.
جامبىل وبلىسى,
تاراز قالاسى
