جاسوسپىرىمدەردىڭ ەڭبەگى ارنايى زاڭدىق تالاپتارمەن رەتتەلەدى. ياعني اتا-انانىڭ كەلىسىمىن الۋ مىندەتتى. سونداي-اق تۇنگى ۋاقىتتا ەڭبەك ەتۋگە, قاۋىپتى جۇمىسقا قاتاڭ تىيىم سالىنادى. ال ەڭبەكاقى مولشەرى قوعامدىق جۇمىستاردا 94 مىڭ تەڭگەدەن باستالسا, «جاسىل ەل» باعدارلاماسىندا 60-150 مىڭ تەڭگە ارالىعىندا بولادى. ورتاشا تابىس 80-100 مىڭ تەڭگە كولەمىندە.
جۇيەنىڭ جۇمىس الگوريتمى وقۋشىلاردىڭ جاس ەرەكشەلىگىنە بەيىمدەلگەن. پورتالدا الدىمەن اتا-اناسى نەمەسە زاڭدى قامقورشىسى جەكە كابينەت اشىپ, تىركەۋدەن وتەدى. جۇيە ينتەگراتسيا ارقىلى بالانىڭ دەرەكتەرىن اۆتوماتتى تۇردە كورسەتەدى. ەگەر وتباسىندا بىرنەشە بالا بولسا, اتا-انا قاي بالاعا جەكە كابينەت اشاتىنىن ءوزى تاڭدايدى. تىركەۋ ءراسىمى اياقتالعاننان كەيىن جەكە كابينەت ىسكە قوسىلادى.
ودان كەيىن وقۋشى جۇيەگە كىرىپ, ءوز تۇيىندەمەسىن تولتىرادى. جۇمىسقا قاتىستى شاقىرتۋلار وسى كابينەتكە تۇسەدى. باستىسى, اتا-انالار بالالاردىڭ ەڭبەك ۇدەرىسىن تولىق باقىلايدى. 16-18 جاس ارالىعىنداعى جاسوسپىرىمدەر ەلەكتروندىق تسيفرلىق قولتاڭبا ارقىلى جەكە كابينەت اشا الادى.
نەگىزى جاسوسپىرىمدەر جازدا كوبىنە ءدامحانا, ساۋدا, جەتكىزۋ قىزمەتى, جارناما تاراتۋ, كوگالداندىرۋ جانە ماۋسىمدىق جۇمىستا ەڭبەك ەتىپ ءجۇر. بۇل – ءبىر جاعىنان جاسوسپىرىمدەردىڭ تاجىريبە جيناقتاپ, ەڭبەك داعدىلارىن قالىپتاستىرۋىنا مۇمكىندىك. ودان بولەك, وقۋشىلار جاۋاپكەرشىلىكتىڭ ءمانىن ءتۇسىنىپ, ۋاقىتتى ءتيىمدى جوسپارلاۋدى مەڭگەرەدى.
نۇراي مۇحانوۆا,
ل.ن.گۋميلەۆ اتىنداعى ەۇۋ
جۋرناليستيكا جانە الەۋمەتتىك عىلىمدار جوعارى مەكتەبىنىڭ
2-كۋرس ستۋدەنتى
