تەستىلەۋگە قاتىسۋشىلاردىڭ 71 پايىزى قازاق ءتىلىن, 29 پايىزى ورىس ءتىلىن تاڭداعان. سونىمەن قاتار تالاپكەرلەر تەستىنى 259 رەت اعىلشىن تىلىندە تاپسىرعان. ءۇشىنشى اپتانىڭ قورىتىندىسى بويىنشا تالاپكەرلەردىڭ 67 پايىزى شەكتى بالل جيناعان. ال بەس ءپان نەگىزىندە ورتاشا ناتيجە 65 بالدى قۇرادى. ەڭ جوعارى كورسەتكىش – 140 بالل. بۇل ناتيجەگە ازىرشە
7 وقۋشى, اتاپ ايتساق, جامبىل وبلىسى قۇلان اۋدانىنان نازەركە سارسەنباي, سەمەيدەن ەراسىل سايلاۋوۆ, تۇركىستان قالاسىنان ايسۇلتان جاڭبىرباي مەن جاسۋر نىشانباي, تاراز قالاسىنان نۇرعانات قانات, قىزىلوردا قالاسىنان كاۋسار التىنسارى, پاۆلودار وبلىسىنان اسەت التاير قول جەتكىزدى.
مينيسترلىك دەرەگىنشە, ەرەكشە ءبىلىم بەرۋ قاجەتتىلىگى بار تالاپكەرلەر ءۇشىن دە قاجەتتى جاعداي جاسالعان. بيىلعى تەستىلەۋگە اتالعان ساناتتاعى 392 تالاپكەر قاتىسقان. تەستىلەۋ بارىسىندا تالاپكەرلەرگە اپەللياتسيا بەرۋ مۇمكىندىگى قاراستىرىلعان. تەست تاپسىرمالارىنىڭ مازمۇنىنا قاتىستى وتىنىشتەر ەمتيحان اياقتالعاننان كەيىن 30 مينۋت ىشىندە قابىلدانادى. ال تەحنيكالىق ماسەلەلەر بويىنشا اپەللياتسيا تەستىلەۋ كەزىندە بەرىلەدى. ناتيجەلەر كورسەتىلگەن سەرتيفيكاتتار اپەللياتسيا قارالعاننان كەيىن جەكە كابينەتتەردە قولجەتىمدى بولادى.
«ۇبت باستالعالى بەرى ءۇش اپتا ىشىندە 283 ەرەجە بۇزۋشىلىق تىركەلگەن. ونىڭ ىشىندە 168 تالاپكەر سمارتفون, سمارت كوزىلدىرىك, ميكروقۇلاققاپ, باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلگەن. سونداي-اق 115 ادام تەستىلەۋ كەزىندە ەرەجەلەردى بۇزعاندىقتان اۋديتوريادان شىعارىلىپ, ولاردىڭ ناتيجەلەرى جويىلعان. وزگە ادامنىڭ ورنىنا تەست تاپسىرۋ دەرەكتەرى انىقتالماعان. مينيسترلىك وكىلدەرىنىڭ حابارلاۋىنشا, ۇبت اياقتالعاننان كەيىن دە باقىلاۋ جۇمىسى جالعاسادى. وسى جىلدىڭ
31 قازانىنا دەيىن بەينەجازبالارعا تالداۋ جۇرگىزىلىپ, ەرەجە بۇزۋ فاكتىلەرى انىقتالعان جاعدايدا تالاپكەرلەردىڭ ناتيجەلەرى جارامسىز دەپ تانىلادى», دەلىنگەن.
ايتا كەتەيىك, بيىل نەگىزگى ۇبت-عا قاتىسۋعا 240 مىڭعا جۋىق تالاپكەر ەكى مۇمكىندىك بويىنشا جالپى سانى 446 مىڭنان استام ءوتىنىش بەرگەن.
ارۋجان دوسىمحان,
ە.ا.بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتىنىڭ ستۋدەنتى
