وتكەن جىلدىڭ قاراشا ايىندا ۆاشينگتوندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قاتىسۋىمەن «ورتالىق ازيا – اقش» ءسامميتى وتكەن بولاتىن. سامميت قورىتىندىسىندا قاتىسۋشى مەملەكەتتەر اراسىنداعى ءوزارا ءىس-قيمىلدىڭ جاڭا باعىتتارى ايقىندالىپ, مادەني-گۋمانيتارلىق ىنتىماقتاستىقتى تەرەڭدەتۋگە ەرەكشە ءمان بەرىلدى.
وسى ۋاعدالاستىقتاردى ىسكە اسىرۋ ماقساتىندا تاشكەنت قالاسىندا ورتالىق ازيا ەلدەرى مەن اقش مادەنيەت مينيسترلەرىنىڭ C5+1 فورماتىنداعى كەزدەسۋى ءوتتى. قازاقستان تاراپىنان جيىنعا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا قاتىستى. ءىس-شاراعا سونداي-اق اقش مەملەكەتتىك حاتشىسىنىڭ قوعامدىق ديپلوماتيا جانە قوعامدىق بايلانىستار ماسەلەلەرى جونىندەگى ورىنباسارى سارا رودجەرس قاتىستى.
كەزدەسۋ بارىسىندا تاراپتار مادەني-گۋمانيتارلىق ىنتىماقتاستىقتى ودان ءارى دامىتۋ پەرسپەكتيۆالارىن تالقىلادى. ايدا بالاەۆا مەملەكەت باسشىلارى ءسامميتى اياسىندا مادەني مۇرانى ساقتاۋ جونىندەگى بىرلەسكەن مالىمدەمە قابىلدانعانىن اتاپ ءوتىپ, بۇل قۇجات مادەني قۇندىلىقتاردى قورعاۋ, مۋزەي ءىسى سالاسىنداعى ىقپالداستىقتى دامىتۋ جانە مادەني مۇرانى تسيفرلاندىرۋ باعىتىنداعى كوپجىلدىق ارىپتەستىكتى نىعايتۋعا ارنالعان ورتاق ۇستانىمدى ايقىندايتىنىن جەتكىزدى.
مينيستر C5+1 فورماتىنداعى ىنتىماقتاستىق اياسىن كەڭەيتۋ بىرلەسكەن جۇمىستى جاڭا دەڭگەيگە كوتەرۋگە مۇمكىندىك بەرەتىنىن اتاپ ءوتتى. ونىڭ ايتۋىنشا, مادەنيەت جانە كرەاتيۆتى يندۋستريالار سالاسىنداعى ءوزارا ءىس-قيمىلدى كۇشەيتۋ, تسيفرلىق جوبالاردى دامىتۋ, كاسىبي تاجىريبە الماسۋدى جولعا قويۋ, تۋريستىك مارشرۋتتاردى ىلگەرىلەتۋ جانە حالىقارالىق سەرىكتەستىكتى كەڭەيتۋ الداعى كەزەڭدەگى نەگىزگى باسىمدىقتاردىڭ ءبىرى بولىپ قالا بەرەدى.
كەزدەسۋ قورىتىندىسىندا قاتىسۋشىلار ورتالىق ازيا ەلدەرى مەن امەريكا قۇراما شتاتتارى مادەنيەت مينيسترلەرى كەڭەسىنىڭ حاتتاماسىنا قول قويدى. قۇجاتتا تاراپتار مادەني مۇرانى ساقتاۋ جونىندەگى بىرلەسكەن مالىمدەمەنىڭ ەرەجەلەرىن ىسكە اسىرۋعا بەيىلدىلىگىن قۋاتتاپ, ونەر, ادەبيەت, تەاتر, كينەماتوگرافيا جانە مۋزىكا سالالارىندا بىرلەسكەن ءىس-شارالار مەن فەستيۆالدار وتكىزۋ ارقىلى ىنتىماقتاستىقتى ودان ءارى دامىتۋعا ۋاعدالاستى.
C5+1 فورماتىنداعى كەزدەسۋ اياسىندا ايدا بالاەۆا اقش مەملەكەتتىك حاتشىسىنىڭ ورىنباسارى سارا رودجەرسپەن دە جەكە كەزدەسۋ وتكىزدى. كەلىسسوزدەر بارىسىندا مادەنيەت سالاسىنداعى بايلانىستاردى نىعايتۋ, سونداي-اق جاساندى ينتەللەكت باعىتىنداعى بىرلەسكەن جوبالاردى دامىتۋ ماسەلەلەرى تالقىلاندى. تاراپتار قول جەتكىزىلگەن كەلىسىمدەر الداعى ۋاقىتتا ءوزارا ارىپتەستىكتى كەڭەيتۋگە بەرىك نەگىز بولاتىنىنا سەنىم ءبىلدىردى.
تاشكەنتتەگى حالىقارالىق كەزدەسۋ الاڭى قازاقستان مەن وزبەكستان اراسىنداعى مادەني-گۋمانيتارلىق ىنتىماقتاستىقتى ودان ءارى نىعايتۋعا دا مۇمكىندىك بەردى. وسىعان وراي ايدا بالاەۆا وزبەكستان رەسپۋبليكاسىنىڭ مادەنيەت ءمينيسترى وزودبەك نازاربەكوۆپەن ەكىجاقتى كەزدەسۋ وتكىزدى.
تاراپتار ەكى ەل اراسىنداعى مادەني-گۋمانيتارلىق بايلانىستاردى دامىتۋ ماسەلەلەرىن جان-جاقتى تالقىلاپ, اسىرەسە ادەبيەت پەن تەاتر ونەرى سالالارىنداعى ىنتىماقتاستىقتى كەڭەيتۋگە ەرەكشە نازار اۋداردى. كەزدەسۋ بارىسىندا 2024–2025 جىلدارعا ارنالعان ءىس-شارالار جوسپارىنىڭ تولىق ورىندالعانى اتاپ ءوتىلدى.
كەلىسسوزدەر قورىتىندىسىندا قازاقستان رەسپۋبليكاسى مادەنيەت جانە اقپارات مينيسترلىگى مەن وزبەكستان رەسپۋبليكاسى مادەنيەت مينيسترلىگى اراسىندا 2026–2027 جىلدارعا ارنالعان مادەني-گۋمانيتارلىق ىنتىماقتاستىق جونىندەگى جاڭا ءىس-شارالار جوسپارىنا قول قويىلدى. قۇجات ەكى ەل اراسىنداعى مادەني بايلانىستى ودان ءارى نىعايتۋعا, بىرلەسكەن ءىس-شارالار وتكىزۋدى كەڭەيتۋگە جانە ورتاق جوبالاردى ىسكە اسىرۋعا باعىتتالعان.
وسىلايشا, تاشكەنتتە وتكەن كەزدەسۋلەر مادەنيەت سالاسىنداعى وڭىرلىك جانە حالىقارالىق ىنتىماقتاستىقتى جاڭا دەڭگەيگە كوتەرۋگە سەرپىن بەرىپ, قازاقستاننىڭ ورتالىق ازيا كەڭىستىگىندەگى مادەني ىقپالداستىقتى دامىتۋعا باعىتتالعان باستامالارىنا حالىقارالىق قولداۋدىڭ جوعارى ەكەنىن كورسەتتى.
