بۇگىندە مۇنايلى وڭىردەگى مۇگەدەكتەر سانى 27 901 ادامعا جەتىپ وتىر. ونىڭ ىشىندە ءبىرىنشى توپتا 3 001, ەكىنشى ساناتتا 9 977, ءۇشىنشى توپتا 9 869 مۇمكىندىگى شەكتەۋلى ادام بار. كامەلەت جاسىنا تولماعان مۇگەدەكتەر سانى – 5 054.
تاعدىردىڭ تەپەرىشىن تارتقان جاندارعا ارناپ اشىلعان جاڭا ورتالىق المالى اۋىلدىق وكرۋگىندە ورنالاسقان. بۇرىن بۇل اۋىل ماحامبەت اۋدانىنا قارايتىن ەدى. كەيىنگى جىلدارى اتىراۋ قالالىق اكىمدىگىنىڭ بولىنىسىنە بەرىلدى. بۇدان ءۇش جىل بۇرىن وسى اۋىلدا قۇرىلىسى باستالعان نىساننىڭ جالپى اۋماعى 22 مىڭ شارشى مەتردى قۇرايدى.
«المالى» الەۋمەتتىك وڭالتۋ ورتالىعىنىڭ ديرەكتورى انار قايۋپوۆانىڭ ايتۋىنشا, مۇنداعى قىزمەت ءتۇرى التى باعىتتا – الەۋمەتتىك- تۇرمىستىق, مەديتسينالىق, پسيحولوگيالىق, پەداگوگيكالىق, الەۋمەتتىك-ەڭبەك, مادەني وڭالتۋ باعىتتارىندا ۇيىمداستىرىلادى.
«ورتالىق ماماندارىنىڭ باستى ماقساتى – مۇمكىندىگى شەكتەلگەن جاندارعا جايلى ورتا قالىپتاستىرۋ. جاڭا مەكەمە كەشەندى وڭالتۋعا ارنالعان زاماناۋي قۇرال-جابدىقتارمەن جەتكىلىكتى قامتاماسىز ەتىلگەن. ءار قىزمەت الۋشىعا جەكە وڭالتۋ, الەۋمەتتىك بەيىمدەۋ باعدارلاماسى ازىرلەنەدى. ولارعا دارىگەرلەر, مەيىرگەرلەر, پسيحولوگتەر مەن لوگوپەدتەر, دەفەكتولوگتەر, بارلىعى 189 مامان قىزمەت كورسەتەدى», دەيدى ا.قايۋپوۆا.
ورتالىق ماماندارى ءبىر مەزەتتە 150 ادامدى قابىلدايدى. وسى كەزگە دەيىن جىل سايىن شامامەن مۇمكىندىگى شەكتەلگەن 1 100 ادامعا وڭالتۋ كومەگى بەرىلىپ كەلگەن. ەندى مۇنداي قولداۋ الاتىنداردىڭ سانى 2 300 ادامعا دەيىن كوبەيەدى.
ورتالىقتا كامەلەت جاسىنا تولماسا دا, مۇگەدەكتىك ساناتى بەرىلگەن بالالارعا دا ەرەكشە نازار اۋدارىلعالى وتىر. اسىرەسە تىرەك-قيمىلى بۇزىلعان, تسەرەبرالدى سال اۋرۋىنا شالدىققان, داۋن سيندرومى مەن اۋتيزم سپەكترىندەگى اۋىتقۋى بار 3 پەن 18 جاس ارالىعىنداعى بالالارعا كەشەندى وڭالتۋ قىزمەتى كورسەتىلەدى. وسىعان ارنالعان اۆا-تەراپيا كابينەتتەرى, مەحانوتەراپيا زالدارى, سەنسورلىق ينتەگراتسيا بولمەلەرى, سونداي-اق ەڭبەك, ارت-تەراپيا شەبەرحانالارى بار.
«ەرەسەكتەردى, اسىرەسە ءبىرىنشى, ەكىنشى توپتاعى مۇگەدەكتىك ساناتى بەرىلگەن ادامداردى وڭالتۋ كۋرسىنان وتكىزۋگە قولايلى جاعداي جاسالىپ وتىر. مۇندا فيزيوتەراپيا كابينەتتەرى, زاماناۋي قۇرىلعىلارمەن جابدىقتالعان ەمدىك دەنەشىنىقتىرۋ زالى, باسسەين, سۋ ەمدەۋ كەشەنى بار», دەدى ا.قايۋپوۆا.
اتىراۋ وبلىسى
