فوتو: egemen.kz/ەرلان ومار
جان باسىنا شاققانداعى ءىجو – ەلدەگى ەكونوميكالىق دامۋ مەن حالىق ءال-اۋقاتىنىڭ ورتاشا دەڭگەيىن كورسەتەتىن نەگىزگى ينديكاتورلاردىڭ ءبىرى. بۇل كورسەتكىش ءبىر جىل ىشىندە وندىرىلگەن بارلىق تاۋار مەن قىزمەتتىڭ جالپى قۇنىن حالىق سانىنا ءبولۋ ارقىلى ەسەپتەلەدى. قاراپايىم تىلمەن ايتقاندا, ەل ەكونوميكاسىندا وندىرىلگەن ءونىمنىڭ اقشالاي كولەمى ءبىر ادامعا شاققاندا قانشا ۇلەسكە تيەسىلى ەكەنىن كورسەتەدى.
مۇنداي ءتاسىل مەملەكەتتەردىڭ ءومىر ءسۇرۋ دەڭگەيىن سالىستىرۋعا مۇمكىندىك بەرەدى. ياعني, مۇندا حالىق سانى ەمەس, ەكونوميكانىڭ تيىمدىلىگى مەن ساپاسى نازارعا الىنادى.
حالىقارالىق ۆاليۋتا قورىنىڭ جاڭارتىلعان دەرەگىنە سايكەس, قازاقستاندا جان باسىنا شاققانداعى ءىجو 17 500 اقش دوللارىنا جەتكەن. سالىستىرمالى تۇردە ايتساق, 2025 جىلى ءدال وسى كورسەتكىش 14 770 دوللار بولعان. وسىلايشا, قىسقا ۋاقىت ىشىندە ءوسىم شامامەن 20%-دى قۇراپ وتىر.
بۇل حالىقارالىق ساراپشىلار قازاقستان ەكونوميكاسىنداعى ساپالى وزگەرىستەردى بايقاپ وتىرعانىن اڭعارتادى.
ال ايماقتاعى كورشى ەلدەردىڭ 2026 جىلعى ساۋىردەگى كورسەتكىشتەرى مىناداي:
- وزبەكستان – 4 660 دوللار;
- قىرعىزستان – 3 200 دوللار;
- تاجىكستان – 1 940 دوللار.
ۇسىنىلعان كورسەتكىشتەرگە قاراعاندا, قازاقستان ىشكى جالپى ءونىم كولەمى بويىنشا دا, جان باسىنا شاققانداعى ءىجو دەڭگەيى بويىنشا دا ايماقتاعى كوشباسشى ورنىن ساقتاپ وتىر. بۇل دەرەكتەر ەل ەكونوميكاسىنىڭ ساپالى دامۋ باعىتىن ناقتى كورسەتەدى.
تسيفرلىق ەكونوميكا ءىجو-گە قالاي اسەر ەتەدى؟ پرەزيدەنت ۇسىنىستار ەنگىزۋدى تاپسىردى
ساراپشىلاردىڭ ايتۋىنشا, ەكونوميكالىق ءوسىم جۇيەلى ءارى تۇراقتى سيپات الىپ كەلەدى. ىشكى جالپى ءونىم ۇلەسىندە وڭدەۋ ونەركاسىبىنىڭ كولەمى ارتقان. الەمدەگى تۇراقسىز جاعدايعا قاراماستان, نەگىزگى ماكروەكونوميكالىق كورسەتكىشتەردىڭ تومەندەمەۋى دە وسىنىڭ ايعاعى.
