ۇشۋ-كونسترۋكتورلىق سىناقتار اياسىندا زىمىراننىڭ ءبىرىنشى جانە ەكىنشى ساتىلارى شتاتتىق رەجيمدە جۇمىس ىستەپ, گاباريتتىك-ماسسالىق ماكەت ەسەپتەلگەن تراەكتورياعا ءساتتى شىعارىلدى. بۇل باستاما قازاقستاننىڭ الەمدىك عارىشتىق قىزمەت كورسەتۋ نارىعىنداعى ۇلەسىن ارتتىرۋ ءۇشىن كۇردەلى ينجەنەرلىك نىساننىڭ تولىق پايدالانۋعا دايىن ەكەنىن راستادى. «بايتەرەك» جوباسى –ەلىمىزدىڭ جەكە زاماناۋي ۇشىرۋ ينفراقۇرىلىمىن پايدالانۋعا كوشۋىنە مۇمكىندىك بەرەتىن ستراتەگيالىق جەتىستىك.
كەشەندى قۇرۋ بارىسىندا جەرۇستى ينفراقۇرىلىمىن جاڭعىرتۋ, ۇشىرۋ جۇيەلەرىن, باسقارۋ, جانارماي قۇيۋ جانە قاۋىپسىزدىك جۇيەلەرىن سالۋ مەن بەيىمدەۋ بويىنشا اۋقىمدى جۇمىستار جۇرگىزىلدى. ەنگىزىلگەن شەشىمدەر ۇشۋ الدىنداعى وپەراتسيالاردى اۆتوماتتاندىرۋدىڭ جوعارى دەڭگەيىن قامتاماسىز ەتەدى جانە حالىقارالىق سەنىمدىلىك ستاندارتتارىنا تولىق سايكەس كەلەدى.
«بايتەرەك» عزك جوباسىن ىسكە اسىرۋ –سوڭعى جىلدارداعى ەڭ كۇردەلى تەحنولوگيالىق جوبالاردىڭ ءبىرى. اۆتوماتتاندىرۋ جانە قاۋىپسىزدىك تالاپتارىنا تولىق جاۋاپ بەرەتىن زاماناۋي كەشەن قۇرىلدى. بۇگىنگى ۇشىرۋ سىناعى قازاقستاننىڭ عارىش يندۋسترياسىنا تولىققاندى قاتىسۋ ءۇشىن بارلىق قاجەتتى ەلەمەنتتى, سونىڭ ىشىندە جەكە ۇشىرۋ ينفراقۇرىلىمىن, ۇلتتىق سپۋتنيكتىك جوبالاردى جانە جوعارى بىلىكتى ينجەنەرلىك كادرلاردى قالىپتاستىرعانىن دالەلدەيدى.
«بايتەرەك» زىمىران كەشەنىنىڭ ءساتتى ۇشىرىلۋى عارىشتى يگەرۋدە جاڭا مۇمكىندىكتەرگە جول اشادى, ال جوبانى جۇزەگە اسىرۋ جاڭا جۇمىس ورىندارىن قۇرۋعا جانە وربيتاعا عارىش اپپاراتتارىنىڭ كەڭ جەلىسىن شىعارۋ الەۋەتىن كەڭەيتۋگە مۇمكىندىك بەرەدى. ۇشىرۋعا دايىندىق جۇمىستارى بارلىق توراپ پەن اگرەگاتتىڭ ءمىنسىز جۇمىس ىستەۋىنە باسىمدىق بەرە وتىرىپ, تەحنولوگيالىق رەگلامەنتتەرگە قاتاڭ سايكەستىكتە جۇرگىزىلدى», دەپ حابارلادى جاساندى ينتەللەكت جانە تسيفرلىق دامۋ مينيسترلىگى.
جاڭادان قۇرىلعان عارىش زىمىران كەشەنىن پايدالانۋ ءۇشىن 40-تان استام تەحنيكالىق جۇيە جۇمىلدىرىلدى. سىناقتاردىڭ تولىق تسيكلى بارىسىندا ولاردىڭ ءتيىمدى ءوزارا ءىس-قيمىلى قامتاماسىز ەتىلدى.
«پروگرەسس» زىمىران عارىش ورتالىعاندا ازىرلەنگەن «سويۋز-5/سۇڭقار» تاسىعىشىنىڭ تەحنيكالىق سيپاتتامالارى تومەن جەر ماڭى وربيتاسىنا 17 تونناعا دەيىن پايدالى جۇكتى شىعارۋعا مۇمكىندىك بەرەدى. زىمىران قۋاتتى ءارى تەكسەرىلگەن قوزعالتقىشتارمەن جابدىقتالعان: ءبىرىنشى ساتىدا - رد-171مۆ جانە ەكىنشى ساتىدا - رد-0124مس. Fregat كۇشەيتكىش قوندىرعىلار توبىن جانە ءارتۇرلى پايدالى جۇكتەمەنى ورناتۋ وپتسيالارىن پايدالانۋ تاپسىرمالاردىڭ كەڭ اۋقىمىن شەشۋدە يكەمدىلىكتى قامتاماسىز ەتەدى. «بايتەرەك» كەشەنى مەن «سويۋز-5/سۇڭقار» زىمىرانى كەروسين مەن سۇيىق وتتەگى سياقتى ۋلى ەمەس وتىندى قولدانا وتىرىپ, ەكولوگيالىق تازا كوسموناۆتيكانىڭ بولاشاعىن ايقىندايدى, سونداي-اق عىلىمدى دامىتۋ مەن ەلدىڭ يندۋستريالىق الەۋەتىن نىعايتۋ ءۇشىن جاڭا پەرسپەكتيۆالار اشادى.
