اتالعان اكتسياعا 980 مىڭعا جۋىق ادام قاتىسىپ, 253 مىڭعا جۋىق اعاش وتىرعىزىلعان. سونداي-اق ءبىر كۇندە 46 مىڭ گەكتاردان استام اۋماق تازارتىلعان. ءىس-شاراعا 200-دەن استام ءىرى وندىرىستىك كاسىپورىن اتسالىسقان. سونىمەن قاتار, بيىل 100 جىلدىق مەرەيتويىن اتاپ ءوتىپ وتىرعان اقسۋ-جاباعىلى مەملەكەتتىك تابيعي قورىعى, باياناۋىل ۇلتتىق پاركى, جايىق پەن شاعان وزەندەرىنىڭ جايىلمالارى اۋماقتارىندا تازالىق جۇمىستارى مەن اعاش وتىرعىزۋ ءىس-شاراسى ۇيىمداستىرىلدى.
اكتسيا اياسىندا ەلىمىزدىڭ بارلىق ءوڭىرى ءبىر مەزەتتە قوسىلعان جالپىۇلتتىق تەلەكوپىر ۇيىمداستىرىلىپ, بۇل باستامانىڭ بۇكىلحالىقتىق سيپات العانىن ايقىن كورسەتتى.
«تازا قازاقستان»: ۇلىتاۋدا جىل باسىنان بەرى 2 مىڭ توننادان اسا قوقىس شىعارىلدى
تىكەلەي بەينەكونفەرەنتسيا رەجيمىندە ءوڭىر اكىمدەرى, ەرىكتىلەر جانە قوعامدىق ۇيىم وكىلدەرىنىڭ قاتىسۋىمەن مەملەكەت باسشىسى جازعى ەكولوگيالىق شارالاردىڭ رەسپۋبليكالىق كەزەڭىنە رەسمي تۇردە ستارت بەردى. پرەزيدەنت قاسىم-جومارت توقاەۆ ەكولوگيالىق مادەنيەتتى قالىپتاستىرۋدىڭ ماڭىزدىلىعىن اتاپ ءوتىپ, «تازا قازاقستان», «زاڭ مەن ءتارتىپ», «ادال ازامات» قاعيداتتارى ءبىرتۇتاس قۇندىلىقتار جۇيەسىن قۇراي وتىرىپ, كۇندەلىكتى باسقارۋ مەن قوعامدىق ومىردە بەرىك ورنىعۋى ءتيىس ەكەنىن جەتكىزدى.
ءوز سوزىندە مەملەكەت باسشىسى «تازا قازاقستان» قوزعالىسىنىڭ باستاۋ العانىنا ەكى جىل بولعانىن ەسكە سالىپ, اكتسياعا قاتىسۋشىلارعا, اسىرەسە جاستارعا ريزاشىلىعىن ءبىلدىردى.
توقاەۆ «تازا قازاقستان» اكتسياسىنا بەلسەندى قاتىسقان ازاماتتاردى ماراپاتتادى
ايتا كەتەيىك, «تازا قازاقستان» باستاماسىن ىسكە اسىرۋ كەزەڭىندە (2024-2026 جىلدار ارالىعى) ەل بويىنشا 1 477 ەكولوگيالىق اكتسيا وتكىزىلگەن. ولارعا 13,1 ميلليون ادام قاتىسىپ, 2 ميلليون تونناعا جۋىق قالدىق جينالدى, 2,8 ميلليون گەكتار اۋماق تازارتىلدى جانە 5,5 ميلليوننان استام اعاش وتىرعىزىلدى.
