گالا-كونتسەرت باعدارلاماسىندا بۇكىلرەسەيلىك جانە حالىقارالىق بايقاۋلاردىڭ لاۋرەاتى سوفيا ونوپچەنكونىڭ, باشقۇرتتىڭ «Ay Yola» فولك-توبىنىڭ, «ساحا (ياكۋتيا) رەسپۋبليكاسىنىڭ مادەنيەت سالاسىنىڭ ۇزدىگى» قۇرمەتتى اتاعىنىڭ يەگەرى ولەنا ۋتايدىڭ جانە وزگە دە ونەرپازداردىڭ حورەوگرافيالىق, اسپاپتىق جانە ۆوكالدىق-اسپاپتىق نومىرلەرى ۇسىنىلدى. سونىمەن قاتار قالماقتىڭ حالىق مۋزىكاسى مەن بۋرياتتىڭ حالىق اندەرى شىرقالدى. كەشتە ماسكەۋ مەملەكەتتىك اكادەميالىق «گجەل» بي تەاترى, داعىستاننىڭ ەڭبەك سىڭىرگەن اكادەميالىق «لەزگينكا» بي ءانسامبلى جانە قالماقيا مەملەكەتتىك «ويراتى» بي تەاترى ونەر كورسەتتى.
قازاقستان مەن رەسەي مادەنيەت سالاسىندا قانداي جوبالاردى جۇزەگە اسىرماق؟
ايتا كەتۋ كەرەك, قازاقستانداعى رەسەي فەدەراتسياسىنىڭ مادەنيەت كۇندەرىنىڭ باعدارلاماسى ەكى ەل اراسىنداعى مادەني-گۋمانيتارلىق ىنتىماقتاستىقتى ودان ءارى نىعايتۋعا باعىتتالعان مازمۇندى ءىس-شارالاردى قامتيدى. وسى كۇنى قازاقستان رەسپۋبليكاسىنىڭ ۇلتتىق مۋزەيىندە «مادەني داستۇرلەردى بىرىكتىرۋ جانە زاماناۋي شىعارماشىلىق تاجىريبەلەر: قازاقستان مەن رەسەيدىڭ مادەني ىنتىماقتاستىعى» اتتى دوڭگەلەك ۇستەل ءوتىپ, وندا جاڭا بىرلەسكەن جوبالار تالقىلاندى. بۇدان بولەك, ەلوردادا قازاقستانداعى رەسەي كينوسىنىڭ فەستيۆالى باستالدى. فەستيۆال كورسەتىلىمدەرى 26 ساۋىرگە دەيىن جالعاسادى. ال, مادەنيەت كۇندەرىنىڭ اشىلۋىنداعى ەڭ باستى وقيعا رەسەي ونەرپازدارىنىڭ گالا-كونتسەرتى بولدى.
وسىدان التى اي بۇرىن رەسەيدە قازاقستاننىڭ مادەنيەت كۇندەرى تابىستى وتكەن بولاتىن. ونىڭ اياسىندا كورەرمەندەر ءا.قاستەەۆ اتىنداعى ۇلتتىق ونەر مۋزەيىنىڭ قورىنان جاساقتالعان «قازاقستان ونەرىنىڭ جاۋھارلارى» كورمەسىمەن تانىسىپ, قازاقستان كينوسى كۇندەرىنە قاتىسىپ, سونداي-اق «پاراسات مايدانى» سپەكتاكلىن تاماشالادى. باعدارلاما ۇلكەن تەاتردا ۇيىمداستىرىلعان قازاقستان ونەرپازدارىنىڭ گالا-كونتسەرتىمەن اياقتالدى. مەملەكەت باسشىلارىنىڭ قاتىسۋىمەن وتكەن ايتۋلى وقيعا مازمۇندى باعدارلاماسىمەن ايرىقشا اسەر قالدىردى.
