زارينا دياس ماياميدەگى سايىcىن اياقتادى

استانا. 27 ناۋرىز. اقش-تىڭ مايامي قالاسىندا ءوتىپ جاتقان تەننيستەن WTA تۋرنيرىندە ەلىمىزدىڭ ءبىرىنشى راكەتكاسى زارينا دياس ەكىنشى اينالىمنان اسا المادى. كورت قوجايىنى كەترين بەلليسپەن كۇش سىناسقان ول 2:6, 1:6 ەسەبىمەن ەسە جىبەردى. بۇل تۋرالى egemen.kz حابارلادى. تۋرا ءبىر ساعاتقا سوزىلعان ويىندا قازاق تەننيسشىسى تەك ءۇش گەيمدە عانا ۇپاي الدى. قارسىلاسىنىڭ جاسى 15-تە عانا. سوعان قاراماستان ول ءار سەتتە ءۇش برەيكتەن جاساپ, زارينانىڭ ادىمىن اشتىرمادى. ال بىزدىڭ قىز ەكى كەزەڭدە ءبىر-بىردەن قارسىلاسىنىڭ دوبىن ءوز پايداسىنا جازعانىن ايتا كەتەيىك. وسى ويىننان كەيىن قوس تەننيسشى اراسىنداعى كەزدەسۋلەردىڭ جالپى ەسەبى 1:1 بولدى. العاش رەت وتكەن جىلى اقش اشىق بىرىنشىلىگىنىڭ ەكىنشى اينالىمىندا جولدارى تۇيىسكەن بولاتىن. ول كەزدە ماتچ ءۇش سەتكە سوزىلىپ, زارينا 6:3, 0:6, 6:2 ەسەبىمەن جەڭىسكە جەتتى. بۇگىن سول كەزدە كەتكەن ەسەنى كەترين ارتىعىمەن قايتاردى. ەندى ول ءتۋرنيردىڭ ءۇشىنشى اينالىمىندا ايگىلى وتانداسى سەرەنا ۋيليامسقا قارسى ويناۋى مۇمكىن. ول ءۇشىن الەمنىڭ ءنومىرى ءبىرىنشى راكەتكاسىنا رۋمىنيا تەننيسشىسى مونيكا نيكۋلەسكۋدى جەڭۋى كەرەك. ايتا كەتەيىك, زارينا بۇگىندە الەمنىڭ 32-راكەتكاسى. ال ماياميدەگى تۋرنيرگە مىقتىلار قاتارىنا قوسىلىپ, 29-راكەتكا رەتىندە قاتىستى. ءتىپتى جارىستى بىردەن ەكىنشى اينالىمنان باستادى. ياعني, بەلليسپەن بولعان ويىن ءبىزدىڭ قىز ءۇشىن وسى سايىستاعى العاشقى كەزدەسۋ. ال قارسىلاسى بۇگىندە WTA رەيتينگىنىڭ 211-ساتىسىندا تۇر. وتكەن جىلى زارينادان ۇتىلعان كەزدە ۇزدىك مىڭ تەننيسشىنىڭ قاتارىنا دا ەنبەيتىن ەدى. بۇگىنگى ويىننىڭ قورىتىندىسى قوس تەننيسشىنىڭ رەيتينگتىك كورسەتكىشتەرىنە ايتارلىقتاي وزگەرىس ەنگىزەتىنى ايتپاسا دا تۇسىنىكتى. ەلامان قوڭىر. دەرەك: egemen.kz. سۋرەت: wtatennis.com.