«Mazmundama», «Arman-PV», «Steppe & World Publishing», «East Publishing» سەكىلدى وتاندىق باسپالارعا حالىقارالىق جارمەڭكەدە كىتاپتارىن تانىستىرۋ مۇمكىندىگى تۋدى. وتاندىق باسپالاردىڭ بالالارعا ارنالعان ۇزدىك كىتاپتارى ۇلتتىق ستەندكە قويىلىپ, كوپشىلىككە تانىستىرىلدى. مادەنيەت جانە اقپارات مينيسترلىگىنىڭ وكىلى تولقىن تۇرعاليقىزىنىڭ ايتۋىنشا, بۇعان دەيىن اتالعان كورمەگە جەكەلەگەن باسپالار كەلسە, بۇل جولى ۇيىمداسقان تۇردە قازاقستان باسپاگەرلەر جانە پوليگرافيستەر قاۋىمداستىعىنىڭ قولداۋىمەن ۇلتتىق ستەند ۇيىمداستىرىلدى.
«مينيسترلىك بولونيا كورمەسىنە كوپ كوڭىل ءبولىپ وتىر. ەكى جىل قاتارىنان فرانكفۋرتتا وتكەن حالىقارالىق كىتاپ كورمەسىنە قازاقستاننىڭ ۇلتتىق ستەندىن قويدىق. بيىل مىنە, وسى ءۇردىس بولونيا كورمەسىندە جالعاسىن تاپتى. ءبىزدىڭ ستەندتى تاماشالاۋشىلار وتە كوپ. مۇنداي كورمە وتاندىق باسپا سالاسىنىڭ دامۋىنا وتە قاجەت. سەبەبى كورمە حالىقارالىق بايلانىس ورناتۋعا, بىرلەسكەن جوبالار مەن قۇقىق الماسۋعا, ۇلتتىق كىتاپتارىمىزدى, سونىڭ ىشىندە بالالارعا ارنالعان تۋىندىلارىمىزدى حالىقارالىق اۋديتورياعا تانىستىرۋعا, الەمدىك تاجىريبەلەر مەن ترەندتەردى تانۋعا, بالالار ادەبيەتىنىڭ جاڭا باعىتتارىن بايقاۋعا, يلليۋستراتسيا ستيلدەرىن مەڭگەرۋگە, ەڭ باستىسى, زاماناۋي تالاپتارعا ساي كىتاپ شىعارۋعا كومەكتەسەدى», دەيدى تولقىن تۇرعاليقىزى.
حالىقارالىق كورمەگە ەلىمىزدىڭ اتىنان 18 دەلەگات, اتاپ ايتقاندا, باسپا وكىلدەرى, يلليۋستراتورلار, اۆتورلار, اۋدارماشىلار بارعان. سونداي-اي كورمەدە العاش رەت وتاندىق سۋرەتشىلەر تالقىلاۋ سەسسياسىنا قاتىسۋعا مۇمكىندىك الدى. يلليۋستراتور, گرافيكالىق ديزاينەر جانە ۆيزۋالدى سۋرەتشى ايسۇلۋ الماسباي, داۋرەن تاسبولاتوۆ, «East Publishing» باسپاسىنىڭ ديرەكتورى ءامينا جەمەنەي «مۇرانى بەينەلەۋ: بالالار كىتاپتارىنداعى ۇلتتىق بولمىستى قايتا تانۋ» تاقىرىبىندا وتەتىن كاسىبي كەزدەسۋگە قاتىستى. «بىزگە حالىقارالىق كورمە بارىسىندا ورتالىق ازيا اۆتورلارى مەن يلليۋستراتورلارىنىڭ العاشقى كاسىبي كەزدەسۋىنە قاتىسۋ مۇمكىندىگى تۋدى. بالالار كىتاپتارىنداعى ۇلتتىق بولمىستى تانۋ تاقىرىبىندا وي قوزعالدى. سونداي-اق قازاق بالالار ادەبيەتىن الەمگە تانىتۋدىڭ قادامدارى تۋرالى پىكىر ايتىلدى», دەيدى يلليۋستراتور ايسۇلۋ الماسباي.
ال «Mazmundama» باسپاسىنىڭ جەتەكشىسى شىڭعىس مۇقان حالىقارالىق كورمەدە قازاقستان بۇرىشىنىڭ اشىلۋىن قازاق بالالار ادەبيەتىنە كورسەتىلگەن قولداۋ دەپ بىلەدى. «بۇل ىسكە تۇرتكى بولعان «Nomad Cultural Foundation» قورىنىڭ جەتەكشىسى – بايان قابىلاش. تەك قازاقستان عانا ەمەس, وزبەكستان مەن قىرعىزستاننىڭ بۇرىشىن قاتار ۇيىمداستىرىپ, ورتالىق ازيا بولىپ قاتىسىپ جاتىرمىز. كورمەگە 100-دەن اسا ەلدىڭ باسپاسى كەلدى. بىرنەشە پاۆيلون قاز-قاتار تۇر, ءبىرىن ارالاپ شىعۋعا جارتى كۇنىڭ جەتپەي قالادى. مۇندا نەبىر تاماشا كىتاپتار بار», دەيدى شىڭعىس مۇقان. باسپاگەر سونىمەن قاتار بالالار كىتاپتارىنىڭ ماراپاتتاۋ راسىمىنە قاتىسىپ, ۇلكەن اسەر العانىن دا اتاپ ءوتتى.
كورمە بارىسىندا بالالار ادەبيەتى سالاسىنداعى الەمدەگى ەڭ جوعارى حالىقارالىق ماراپات – اندەرسەن سىيلىعى لاۋرەاتتارىنىڭ ەسىم-سويى جاريالاندى. بيىل بۇل مارتەبەلى سىيلىقتى بالالار قالامگەرى Michael Rosen ( ۇلىبريتانيا) يەلەندى. ال يلليۋستراتسيا بويىنشا Cai Gao (قىتاي) ەنشىلەدى. ولار 44 ەلدەن ۇسىنىلعان 78 ۇمىتكەردىڭ ىشىنەن حالىقارالىق 10 ساراپشىدان تۇراتىن قازىلار القاسى ارقىلى تاڭدالدى. اندەرسەن سىيلىعى بالالار قالامگەرلەرىنە 1956 جىلدان بەرى (1966 جىلدان يلليۋستراتورعا) ەكى جىلدا ءبىر رەت بەرىلىپ كەلەدى. بيىل مارتەبەلى سىيلىقتىڭ بەرىلە باستاعانىنا 70 جىل تولدى.
