وتاندىق عىلىمنىڭ جەتىستىكتەرىن دارىپتەۋگە, عىلىمي قاۋىمداستىقتىڭ الەۋەتىن تانىتۋعا باعىتتالعان شارا اياسىندا الماتى قالاسى اكىمدىگىنىڭ قولداۋىمەن «عالىمدار اللەياسىنا» اعاش كوشەتتەرى وتىرعىزىلىپ, بۇل باستاما عىلىم مەن تابيعات ۇندەستىگىنىڭ سيمۆولىنا اينالدى.
سالتاناتتى جيىندا عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋىن ۆيتسە-مينيستر تالعات ەشەنقۇلوۆ وقىپ, عىلىم سالاسى قىزمەتكەرلەرىنە مەرەكەلىك لەبىزىن ءبىلدىردى. الماتى قالاسى اكىمىنىڭ ورىنباسارى ابزال نۇكەنوۆ عىلىمدى قولداۋ باعىتىنداعى باعدارلامالارعا توقتالىپ, الداعى ۋاقىتتا گرانتتىق قارجىلاندىرۋ اياسىندا ىسكە اساتىن بىرقاتار جوبالارعا توقتالىپ ءوتتى. ءوز كەزەگىندە ۇعا ۆيتسە-پرەزيدەنتى اباي سەرىكقانوۆ اكادەميا تاراپىنان ىسكە اسقان جۇمىستار بارىسىنا توقتالىپ, عىلىمدى, عالىمداردىڭ قولداۋ ىسىندەگى بىرقاتار ىلگەرىلەۋشىلىكتى اتاپ ءوتتى.
ءىس-شارا بارىسىندا اكادەميكتەر عىلىمي-زەرتتەۋ جۇمىستارىنىڭ ناتيجەلەرىن تانىستىرىپ, مەديتسينا, بيوتەحنولوگيا, ارحەولوگيا, گەنەتيكا جانە عىلىمي ازىرلەمەلەردى كوممەرتسيالاندىرۋ سالالارىنداعى وزەكتى ماسەلەلەردى قامتىعان مازمۇندى باياندامالار جاسادى. سونىمەن قاتار, وتاندىق عالىمدار مەن ونەرتاپقىشتاردىڭ عىلىمي جەتىستىكتەرى ۇسىنىلعان عىلىمي-تانىمدىق كورمە ۇيىمداستىرىلىپ, وندا يننوۆاتسيالىق جوبالار, جاڭا تەحنولوگيالار مەن «عىلىم قورى» اق گرانتتىق باعدارلامالارى اياسىندا جۇزەگە اسقان ونىمدەر كەڭىنەن تانىستىرىلدى. كورمە قاتىسۋشىلارعا عىلىمي جاڭالىقتارمەن تانىسىپ قانا قويماي, ارىپتەستىك بايلانىستار ورناتۋعا مۇمكىندىك بەردى.
جيىن قورىتىندىسىندا عىلىمدى دامىتۋعا ەلەۋلى ۇلەس قوسقان عالىمدار مەن جاس زەرتتەۋشىلەر ۆەدومستۆالىق ناگرادالارمەن ماراپاتتالدى.
